Read urhobo Une rẹ Ejiro 69 Bible Online

Une rẹ Ejiro 69 - urhobo bible

Une rẹ Ejiro 69

¹Sivwe, E Ọghẹnẹ! kidie ame na rhi te vwe ohọre

²Mi divwiri vwẹ evun rẹ ibehre, vwẹ asan rẹ owọ de je otọ ete, Me rhe ro ame okokodo, ọkẹre ko hwerhe uvwe vrẹn.

³Oma re oviẹ mẹ rhọ vwe, upho mẹ ọ yamu Ẹro mẹ rhi dje koi re me vwọ hẹrhẹ Ọghẹnẹ mẹ.

⁴Ayen otu ri di tuoma mẹ ekueku; ibunọ ẹto rẹ uyovwi mẹ ayen otu re guọnọ ovwẹ ghwọrọ ganre gangan; ayen otu re vwọrọn efian nyẹ vwe. Obo ri mi jecho kọye me rhan rhivwi?

⁵E Ọghẹnẹ, wọwẹ re riẹn ugheghẹ mẹ; oruchọ ri mi ruru si oma nu kẹ wẹ-ẹ.

⁶Wo jẹn ihwo ri phiẹro phihọ owẹ mrẹ omaẹvuọ fiki mẹ-ẹ, E Ọrovwohwo Ọghẹnẹ rẹ otuofovwi; wo jẹn ihwo re guọnọ owẹ mrẹ ophọphọvwe fiki mẹ-ẹ, E Ọghẹnẹ rẹ Izrẹl

⁷Kidie fiki wẹn ọye a vwọ bọphiẹ ovwẹ, rẹ omaẹvuọ vwọ vọn opharo mẹ.

⁸Me rhoma rhe dia ọrhorha kẹ imoni mẹ, ọ rẹ isiorho kẹ emọ rẹ oni mẹ

⁹Kidie oruru rẹ erhuvwu rẹ uwevwi wẹn mu vwe rọ, ekan rẹ ayen otu re harhe owẹ mẹvwẹ i she teye.

¹⁰Ọke re me da vwẹ oma mẹ kpotọ vwẹ owẹvwe echiro, o mi hirhe oma phihọ ẹghwọ kẹ vwẹ.

¹¹Ọke me da vwẹ esiso ru amwa vwo rhuo, mẹvwẹ e vwo bru oha

¹²Mẹvwẹ kọye otidia ohwarha vwo gbe ikun, e rẹ idi muẹ ke omẹvwẹ ayen vwọ so ine.

¹³Ẹkẹvuọvo vwọ kẹ vwẹ, wẹ me nẹ ẹrhovwo kẹ, E Ọrovwohwo Vwe ọke ro shephihọ, E Ọghẹnẹ, vwẹ obuebu rẹ ẹguọnọ wẹn ro jẹ rhẹriẹ na gba kpahe kẹ vwẹ.

¹⁴Vwẹ ọchuko rẹ esiri wẹn na yoro uvwe no re mi je sheruọ evun rẹ ibehre; je sivwi uvwe nẹ obọ rẹ ivwighrẹ mẹ ne evun re ame okokodo.

¹⁵Wo jẹn ọkere na hwerhe uvwe wa-an, eyẹ okokodo na re vwe-e, eyẹ ọgọdọ na gbe ghene uvwe-e.

¹⁶Kpahe kẹ vwẹ, E Ọrovwohwo, kidie ẹguọnọ wẹn ro jẹ rhẹriẹ na oyoyovwi; kirobo rẹ aruẹdọ wẹn bute, hirhe oma ku vwe.

¹⁷Wọ siẹ opharo wẹn nẹ kẹ odibo wẹ-ẹn kidie oma bru vwe ku, jọ phẹre owẹ obọ wọ rhe kpahe kẹ vwẹ.

¹⁸Si kẹrẹ ovwẹ, tan vwẹ, jẹn oma fu vwe fiki rẹ ivwighrẹ mẹ.

¹⁹Wọwẹ re riẹn obo ra ghwọ ku vwe te, omaẹvuọ mẹ kugbe omaẹphọphọ mẹ ivwighrẹ mẹ ejobi wọ riẹn ayen.

²⁰Ekan vwirhi udu mẹ, ọtiọye na iroro mẹ da rhan. Me guọnọ ehrọre, ẹkẹvuọvo me mrẹre-e ibruche, ẹkẹvuọvo me mrẹre kakaka-a.

²¹Ayen da vwẹ obi ru emuọre kẹ vwẹ, ki viniga me dare vwo fue urhuru rẹ ame mẹ.

²²Gbe jẹn imẹjẹ rẹ obọ rayen rhoma hirhe phihọ ugodo kẹ ayen, jẹn orẹ rẹ izobo rayen hirhe phihọ ufi kẹ ayen.

²³Jẹn ẹro rayen mu ebri, rere ayen jẹ orẹ ẹmrẹ; rere ehun rayen phariẹ kọke kọke.

²⁴Ku ivuemiovwo wẹn ku ayen, gbe jẹn ọtotorhẹ rẹ ophu wẹn na ghworo ku ayen.

²⁵Gbe jẹn erhọn rayen dia ofefe, wo jẹn ohwo ọvuọvo dia itughẹ raye-en.

²⁶Kidie ayen kpokpo ohwo ro wọ ghwiẹ nure, ohwo ru wọ woma nure, kọye ayen kpokpo phihọ.

²⁷Vwẹ ehwe kpahe ehwe vwọ kẹ ayen; wo jẹn ayen mrẹ obo esionẹ wẹn bẹdẹ-ẹ.

²⁸Jẹn ephoro odẹ rayen nẹ ọbe rẹ ihwo ekpokpọ na; ẹ jẹn e si odẹ rayen phihọ ohri rẹ evwata-a.

²⁹Ẹkẹvuọvo me hẹ ukpokpogho vẹ odjadja rode; jẹn esivwo wẹn, E Ọghẹnẹ, mu vwe kpenu!

³⁰Me vwẹ une jiri odẹ rẹ Ọghẹnẹ Me vwẹ ẹkpẹvwẹ brọrho phihọ oma.

³¹Ọnana ko je Ọrovwohwo nọ erhuẹn ọshare eyẹ ẹrhuẹn ọshare ra ghwanrẹ vẹ ighoro te ichukawọ.

³²Jẹn ohwo re shenyẹ mrẹ rọ ghọghọ, wẹ rọ guọnọ Ọghẹnẹ, jẹn udu wẹn sasa.

³³Kidie Ọrovwohwo nyo ohwo rọ bẹn, ọ jẹ ọrọye re mu kare fia-a.

³⁴Jẹn odjuvwu vẹ akpọ jirọ, te abadi kugbe obo re yan vwẹ evun rọye ejobi.

³⁵Kidie Ọghẹnẹ se sivwi Zayọn ọ me rhoma bọn irere ri Juda; idibo rọye ke dia etiyin kẹ ayen vwo,

³⁶emọ rẹ idibo rọye ke cha vwọ reuku, otu re guọnọ odẹ rọye ke cha dia evun rọye.