Read urhobo Une rẹ Ejiro 7 Bible Online

Une rẹ Ejiro 7 - urhobo bible

Une rẹ Ejiro 7

¹Ọrovwohwo Ọghẹnẹ mẹ, evun wẹ mi de si oma nu, si vwe nẹ obọ rẹ ihwo re vwọ tua vwẹ na, re wo sivwi uvwe,

²ọ dia ọtiọye-e ayen da rha chẹghẹ ovwẹ kerẹ okpohrokpo, ayen kpono uvwe yanran, yẹ ohwo herọ ro sivwi uvwe-e.

³E Ọrovwohwo Ọghẹnẹ mẹ, ọ da dianẹ mi ru ọnana, ọ da dianẹ oruchọ hẹ obọ mẹ,

⁴ọ da dianẹ me hwa osa rẹ umwemwu kẹ ọrivẹ mẹ mi de gborho ọvweghrẹ mẹ ekueku,

⁵gbe jẹn ọvweghre mẹ vwọ tua vwẹ rọ dje mu vwe, gbe jo chiyi arhọ mẹ muotọ, rọ riẹn erhi mẹ phihọ iwurhie.

⁶Vrẹn, E Ọrovwohwo, vwẹ evun rẹ ophu wẹn, kpare oma vwọ so ọrhorhorho rẹ ophu rẹ ivwighrẹ mẹ, rhọvwọ, E Ọghẹnẹ mẹ, wo bru ẹdẹ re ẹdjọeguo nure.

⁷Jẹn ukoko rẹ ihwo na gba riariẹ owọ, re wọ vẹn phihọ ekete wẹn vwẹ enu rayen.

⁸Ọrovwohwo guẹdjọ rẹ ihwo na, brorhiẹ mẹ, E Ọrovwohwo, kirobo rẹ evun ọfuanfon mẹ epha kirobo rẹ ọsoso rọ hẹ evun mẹ epha.

⁹E jẹn umwemwu rẹ ohwo umwemwu rhi vwo oba, ẹkẹvuọvo vwẹ owọ rẹ ọvwata muotọ, wẹ rọ davwa udu vẹ iroro na, wẹ Ọghẹnẹ rẹ ọvwata.

¹⁰Ekpọfia mẹ rhe Ọghẹnẹ, ro sivwẹ ohwo re udu rọye dia ọsoso.

¹¹Ọghẹnẹ oguẹdjọ rẹ ọvwata, Ọghẹnẹ ro mu ophu kẹdẹ kẹdẹ.

¹²Ohwo gbi rhe ku rhẹriẹ-ẹ, Ọghẹnẹ kọ nọ oda rọye, o kpirhiro o ku umurhabọ rọye,

¹³ọ rhuẹrẹ umuesia kpahe nure, ọ nabọ bru unegbe ẹrovwo phihọ edada rọye re.

¹⁴Nighere, ohwo umwemwu jẹn iroro umwemwu, ọ mrevun rẹ ogbarogba, o de vwiẹ efian.

¹⁵O bru ọgọdọ, ọ da nabọ ghwẹ fia, o de she ro ukpotọ rẹ ọye ọvo tọnre na.

¹⁶Ogbarogba na kẹ uyovwi rọye ọ da mrẹ. Oma-obọ rọye kọye ogbarogba na che she teye.

¹⁷Ke me kẹ Ọrovwohwo ẹkpẹvwẹ ro fo kẹ ọvwata rọye, ke me so une rẹ ejiro kẹ odẹ rẹ Ọrovwohwo, ro me Kpenu.