Read urhobo Une rẹ Ejiro 71 Bible Online

Une rẹ Ejiro 71 - urhobo bible

Une rẹ Ejiro 71

¹Vwẹ evun wẹn, E Ọrovwohwo, mi de si oma nu; wo rhe jẹ oma vo vwẹ bẹdẹ-ẹ!

²Vwẹ evun rẹ ọvwata wẹn sivwi uvwe ru wo yoro uvwe no, rhie erhọn wẹn phihọ kẹ vwẹ rere wo sivwi uvwe!

³Gba dia oragha rẹ odjahọ kẹ vwẹ, ogba ogangan, ro sivwi uvwe, kidie wẹ oragha mẹ kugbe ogba ọgangan mẹ

⁴Yọro uvwe no, E Ọghẹnẹ mẹ, nẹ obọ rẹ ihwo umwemwu na, nẹ ẹgbanọ rẹ ohwo egbẹlẹke kugbe ohwo umwemwu na

⁵Kidie wẹ, E Ọrovwohwo, ọye iphiẹrohọ mẹ, ẹro ẹvwo suọ mẹ, E Ọrovwohwo, nẹ ọke emọ mẹ rhe.

⁶Wẹ me vwẹ oma rẹrẹ nẹ ọke re vwo vwiẹ vwẹ rhe; wọwẹ re reyọ ovwẹ nẹ evun rẹ oni mẹ rhe. Ejiro mẹ kọ wẹn ọ dia kọke kọke.

⁷Me dia ohwoka kẹ ihwo buebu re, ẹkẹvuọvo wọwẹ hẹ asan odjahọ ọgangan mẹ

⁸Unu mẹ vọnre vẹ ejiro wẹn, ọ vẹ urinrin wẹn vwẹ ẹdẹ na ejobi.

⁹Wo mu vwe kufia vwẹ ọke rẹ ọghwọ mẹ-ẹ, wọ sen vwẹ vwẹ ọke rẹ ogangan mẹ da lọhọ-ọ

¹⁰Kidie ivwighrẹ mẹ ta ota kpahe ovwẹ, otu re rhẹrẹ arhọ mẹ ra jẹ iroro kugbe,

¹¹ayen me tanẹ, Ọghẹnẹ senrọ nure; vwọ tua ru wo shabọ phihọ kidie ohwo ro che sivwo herọ-ọ.

¹²E Ọghẹnẹ, wo sherẹ kẹ vwẹ-ẹ, E Ọghẹnẹ mẹ, jọ phẹrẹ owe obọ wọ rhe cha vwẹ uko!

¹³Jẹn oma vo ayen otu ri mu vwe vwo guẹdjọ na re a ghwọrọ ayen; jẹn a vwẹ ehwẹjẹ vẹ omaẹvuọ vwo rhurhu ayen otu re guọnọ ovwẹ woma.

¹⁴Ẹkẹvuọvo mi phiẹrohọ kọke kọke, ke me rhoma jiri uwe phihọ

¹⁵Unu mẹ se gbe ikun rẹ uruemu rẹ ọvwata wẹn, uruemu rẹ esivwo wẹn vwẹ ẹdẹ na ejobi, kidie me sa riẹn unu rayen keri-i.

¹⁶Vẹ uruemu rẹ ẹgba rẹ Ọrovwohwo Ọghẹnẹ me cha rhe, mi se jiri ọvwata wẹn, ọwẹn na ọvo kpoi.

¹⁷E Ọghẹnẹ, nẹ emọ rhe wẹ ri yono uvwe, ki mi ghwoghwo uruemu rẹ igbunu wẹn.

¹⁸Ọtiọye ọ jepha kẹ ọmare vẹ uyovwi esha, E Ọghẹnẹ, wọ sen vwẹ-ẹ, bẹsiẹ mi vwọ ghwoghwo ẹgba wẹn kẹ uvwiẹ rọ cha ejobi.

¹⁹Ogangan wẹn kugbe ọvwata wẹn, E Ọghẹnẹ, o te obo irharheghe rẹ odjuvwu. Wọwẹ ro ruẹ imu ride na, E Ọghẹnẹ, kono re họhọ owẹ?

²⁰Wọwẹ ri ru vwe vwọ mrẹ ikpokpogho edjadja buebu wẹ re rhoma rhọvwọ ovwẹ; ne obo okokodo rẹ akpọ na rhe oboyi wọ da reyọ ovwẹ rhivwi rhe.

²¹Wọwẹ ri ru ọghọ mẹ buphihọ, wọ rhoma rhi bru vwe uche.

²²Me sa vwẹ akpata jiri uwe fiki rẹ esegbuyota wẹn, E Ọghẹnẹ mẹ; Me sa vwẹ isorogun so ejiro kẹ wẹ, E Ọfuanfon Ọvuọvo rẹ Izrẹl.

²³Ẹbẹrunu mẹ ko kperi ukperi rẹ aghọghọ, vwẹ ọke re me da so ejiro kẹ wẹ, te erhi mẹ rhe, ri wo yoro nẹ ughwu.

²⁴Ẹrenvwe mẹ kọ ta ota rẹ ọchuko re ọvwata wẹn vwẹ ẹdẹ na ejobi, kidie a phọphọ ayen oma vo ayen re guọnọ oma ẹwan mẹ.