Read urhobo Une rẹ Ejiro 74 Bible Online

Une rẹ Ejiro 74 - urhobo bible

Une rẹ Ejiro 74

¹E Ọghẹnẹ, die wọ vwọ djẹ avwanre kufia bẹdẹ? Die ophu wẹn vwọ teye igodẹ re egbri wẹn?

²Karohọ ukoko wẹn, ru wo vwori nẹ awanre rhe, ru wọ tan hirhe nẹ ọ dia orua rẹ uku wẹn! Karohọ Ugbenu ri Zayọn, asan ro wọ diare jovwo na.

³Vwẹ owọ yan kpo asan erhurhu re rara na; ọvweghrẹ guọghọ emu kemu ejobi rọ he enu rẹ ẹshẹ wẹn na!

⁴Ivwighrẹ wẹn ke gbọ vwẹ uherevie rẹ asan ọfuanfọn wẹn, ayen da vwẹ oka rẹ obọ rayen vwo vi.

⁵Vwẹ anurhoro rẹ obenu na ke ayen vwẹ ushurhe she umukpe rẹ ephapha ra so phihọ.

⁶Etiyin irhe ra kare phihọ ejobi ayen da vwẹ eda rẹ ibrogba vwọ guọghọ ayen

⁷Ayen de phi erhanre phihọ ẹshẹ na, ayen de kporo asan rẹ odẹ wẹn epha na te otọ

⁸Ayen da ta ke oma rayen, Avwanre che phi ayen kua tototo; ayen da torhẹ ẹdia rẹ ukoko rẹ Ọghẹnẹ ejobi re he otọ na.

⁹Avwanre mrẹ ekan re avwanre-e, ọmraro ọvuọvo gbe herọ-ọ, o gbi vwo ohwo vwe ohri re avwanre na rọ riẹn obo ro krite-e.

¹⁰Mavọ o krite, E Ọghẹnẹ, re ivwighrẹ vwọ jehwẹ te? ọvweghre na kọ va ku odẹ wẹn bẹdẹ?

¹¹Die wọ vwọ da obọ wẹn ji, die wo vwo phi obọrhe wẹn phihọ agada?

¹²Dede Ọghẹnẹ Ovie mẹ nẹ awanre rhe, o vwo ru iruo re esivwo vwẹ uherevie rẹ akpọ na

¹³Wọwẹ re vwẹ ẹgba wẹn ghare abadi na, wọwẹ re guọghọ iyovwi ri dragọn vwẹ enu rẹ ame.

¹⁴Wọwẹ re guọghọ Iyovwi ri Liviathan, wọwẹ ri vwiro ru emuọre kẹ emama re evun rẹ aghwa na

¹⁵Wọwẹ re nẹrhẹ ogbugbu kugbe ẹtẹrhe varhe, wọwẹ re nẹrhẹ utọ rọ djẹ ọkere kpọ ya.

¹⁶Uvo ọ wẹn, ason je vwe ọwẹn rhe; wọwẹ re vwẹ isio na kugbe ọnre na vwo mu.

¹⁷Wọwẹ re vwẹ ughwru re akpọ na ejobi mu, wọwẹ re ma ọkeuvo kugbe ohwahwa.

¹⁸Karohọ ọnana, E Ọrovwohwo, obo re ọvweghrẹ na jehwẹ te, rẹ ihwo ri jẹfuọn vwọ harhe odẹ wẹn

¹⁹Wo phi ẹnwẹ rẹ ilekuku wẹn phihọ obọ rẹ eranvwe re djoma-a; wo jẹn arhọ rẹ ovwiogbere wẹn chọrọ owẹ ẹro bẹdẹ-ẹ.

²⁰Mu ọghọ kẹ ọphọ wẹn na; kidie asan ibiebi rẹ otọ na e vọnre vẹ ẹdia rẹ ihwo ọgbarogba

²¹Wo jẹn ihwo ra tua muotọ mrẹ oma-vọvwẹ-ẹ, jẹn ivwiogbere vẹ otu rẹ akpọ bẹn jiri odẹ wẹn.

²²Vrẹn, E Ọghẹnẹ, mie vwe unu vwo gu, karohọ obo ri jẹfuọn na vwe owẹ jehwẹ vwe ẹdẹ na ejobi na!

²³Wo jẹn oseghc re ivwighrẹ wẹn chọrọ owẹ ẹro-o, enuebro rẹ ukọn na rọ mra kpenu kọke kọke.