Read urhobo Une rẹ Ejiro 76 Bible Online

Une rẹ Ejiro 76 - urhobo bible

Une rẹ Ejiro 76

¹Vwi Juda a da riẹn Ọghẹnẹ, odẹ rọye ọrhuarho vwẹ Izrẹl.

²A bọn ẹdia rọye phihọ salẹm, asan rọ dia ki Zayọn.

³Etiyin o de vwirhi edada re wranwran, ekpọfia, ọlọkọ, kugbe ekuakua rẹ ofovwi.

⁴Wo muẹ urinrin, wọ rhoro gangan nọ igbenu ri bẹdẹ na.

⁵Ihwo vẹ udu kokoroko na aghwie udu na mie ayen, aycn de she ro ovwerhẹ; ihwo rẹ ofovwi na ejobi gbe sa vwẹ abọ rayen ru emuọvo-o.

⁶Vwẹ unu rẹ ẹghwọ wẹn, E Ọghẹnẹ ri Jekọp te iyesi te ọ rọ gua de she teye otọ gbragada.

⁷Ẹkẹvuọvo wẹ, wo mu oshọ gangan! Ono se mudia vwẹ obaro wẹn siẹ rẹ ophu wẹn da kpare rhe?

⁸Nẹ obo odjuvwu rhe wo de brorhiẹ, akpọ na djẹ oshọ ọ da fọ ghiei,

⁹vwẹ ọke rẹ Ọghẹnẹ vwo vrẹn che vwo brorhiẹ ro che vwo sivwi ihwo re shenyẹ vwẹ akpọ na.

¹⁰Uyota ophu rẹ iliwo rẹ akpọ che jiri uwe; ọmophu ri chekọ vwẹ akpọ na ku wọ vwẹ ayen rhuo oma wẹn.

¹¹Ve ive wẹn kẹ Ọrovwohwo Ọghẹnẹ wẹn, ru wo ru ayen, Jẹn ihwo re riarierẹ ejobi phare ọko rhe ohwo ro te oshọẹdjẹ kẹ na,

¹²ohwo rọ nyavwe erhi rẹ isun kufia ohwo ro muoshọ kẹ ivie rẹ akpọ na.