Read urhobo Une rẹ Ejiro 78 Bible Online

Une rẹ Ejiro 78 - urhobo bible

Une rẹ Ejiro 78

¹Kerhọn, E ihwo mẹ, vwọ ke uyono mẹ; rhie erhọn phihọ kẹ eta rẹ unu mẹ!

²Mi che rhie unu vwo kpe itẹ, Me cha ta eta ikokodo ri nẹ awanre rhe,

³obo rẹ avwanre nyori ra riẹnre, rẹ ese re avwanre ta kẹ avwanre.

⁴Avwanre se si ayen nu kẹ emọ raye-en, ẹkẹvuọvo ke gbe ayen kẹ uvwiẹ rọ cha iruo rẹ urinrin rẹ Ọrovwohwo, kugbe ẹgba rọye, kugbe igbunu ro ruru.

⁵Ọ vwẹ iseri rọye mu vwi Jekọp, o de ji urhi vwẹ Izrẹl, ro ji kẹ esẹ rẹ avwanre ne vwo yono emọ rayen,

⁶rere uvwiẹ rọ cha vwọ riẹn ayen, emọ re ji vwiẹ-ẹ, ayen mi rhe vrẹn rhe rhi gbe ayen kẹ emọ rayen ,

⁷rere ayen sa vwẹ ẹro rayen kpahe Ọghẹnẹ, re iruo rẹ Ọghẹnẹ vwo je ayen ẹ chọrọ ẹro, ẹkẹvuọvo rẹ ayen sẹro rẹ urhi rọye;

⁸rere ayen vwo jẹn esẹ rayen ẹhọhọ, uvwiẹ vẹ udu kpoi uvwiẹ rẹ okpetu, uvwiẹ rẹ vwẹ udu rayen kpahe ovwẹ-ẹ, rẹ erhi rọye se Ọghẹnẹ gbuyota-a.

⁹Ihwo rẹ Ifrem, re vwẹ umurhabọ choma, ayen de chuko ku vwẹ ẹdẹ rẹ ofovwi.

¹⁰Ayen yọnrọn ọphọ rẹ Ọghẹnẹ-ẹ, ẹkẹvuọvo ayen da sen nẹ ayen yan nene urhi rọye-e.

¹¹Obo ro ruru da chọrọ ayen ẹro, iruo re igbunu ro dje vwọ kẹ ayen.

¹²Vwẹ irharo rẹ esẹ rayen o de ru igbunu na vwe otọ re Ijipt, vwe evun rẹ udju ri Zoan.

¹³O da ghare abadi na ọ da vwẹ ayen wan vrẹn, ọ da nẹrhẹ ukori rẹ ame na mudia kpehre.

¹⁴Vwẹ oghẹruvo ọ da vwẹ ukori rẹ egho sun ayen, vwẹ ason ejobi kẹ erhanre rọ la.

¹⁵O bru uphrophro phihọ oragha vwẹ aghwa, ọ da vwẹ ame nẹ asan okokodo rhe kẹ ayen da.

¹⁶Ọ da nẹrhẹ ito va nẹ evun rẹ oragha rhe, ame da dje nẹ evun rọye rhe kerẹ irhie.

¹⁷Dede ayen ji ru umwemwu kpahọ, ayen da vwọ so Ọ ro Me Kpenu na vwẹ evun rẹ aton.

¹⁸Ayen da davwe Ọghẹnẹ ni vwẹ evun rẹ udu rayen vwọ nọ ekpẹn rẹ emuọre ro si ayen urhuru.

¹⁹Ayen da ta ota kpahe Ọghẹnẹ, tanẹ, Ke Ọghẹnẹ sa tan imẹjẹ ke avwanre vwẹ evun re aghwa na?

²⁰Ọ da ghwiẹ oragha, etiyin ame da mwavwe rhe ito da djẹ ọkẹre vọn asan ejobi. Ke ọ je sa ke ikara rhe, eyẹ eranvwe vwọ kẹ ihwo rọye?

²¹Fiki re ọtiọye na, rẹ Ọrovwohwo vwo nyo, ọ da vọn vẹ ivuemiovwo; erhanre da rhe la nene Jekọp; ophu rọye da tua kpahe Izrẹl;

²²Fikiridie ayen vwo esegbuyota kpahe Ọghẹnẹ-ẹ, ayen je vwẹ ẹro so ogangan rẹ esivwo rọye-e.

²³Dede na o ji ji urhi kẹ obenu na, o de rhie ẹchẹ rẹ odjuvwu;

²⁴O da rhọ osio ri mana rhe otọ kẹ ayen re, ọ da vwẹ ọka rẹ odjuvwu kẹ ayen.

²⁵Ohwo rẹ akpọ da re ikara rẹ emakashe, ọ da vwẹ emuọre buebu kẹ ayen

²⁶O da vwẹ odju ne obaro ọnre re odjuvwu rhe, vwẹ ogangan rọye odju de dju nẹ obuko ọnre rhe;

²⁷ọ da rhọ uvwo phihọ otọ kere iwurhie, emephran vẹ ibekpe kere ibiekpẹn rẹ abadi;

²⁸o de jẹn ayen she phihọ uherevie rẹ erhọn rayen, riariẹ asan rẹ ayen dia ejobi.

²⁹Ayen da re evun da vọn ayen, kidie ọ ke ayen obo rẹ ayen brenu rọye hwe na.

³⁰Ẹkẹvuọvo bẹsiẹ rẹ ayen vwo hiẹ urhuru rayen nu, rẹ emuọre na je vwọ unu rayen na,

³¹ophu rẹ Ọghẹnẹ da tua vwọ kpahe ayen ọ da ghwiẹ egba re herọ hwe, ọ da vwẹ otu ra sanọre vwẹ Izrẹl sherhẹ te otọ

³²Vwẹ evun rẹ ọnana ejobi na ayen ji ru imwemwu; vwẹ evun rẹ igbunu rọye na ayen ji segbuyota-a.

³³Ọtiọye o de ru ẹdẹ rayen ranvwiẹ kerẹ ẹnwẹ, ikpe rayen vwẹ uguegue

³⁴Ọke rọ vwọ ghwiẹ ayen hwe, ayen da guọnọ, ayen kurhẹriẹ ayen da vwẹ oma kpotọ guọnọ Ọghẹnẹ.

³⁵Ayen da karohọ nẹ Ọghẹnẹ oragha rayen, nẹ Ọ ro Me Kpenu ọye ọtan rayen.

³⁶Ẹkẹvuọvo da yẹ ayen de vwẹ unu brugu phihọ oma, ayen da vwẹ ẹrenvwe rayen vwọrọn efian kẹ.

³⁷Udu rayen mudia asan ọvo kẹ-ẹ; ayen se ọphọ rọye na gbuyota-a.

³⁸Dede na, rọ vwọ dia ọgba rẹ ehrọre na, o da vwẹ orukuruku rayen vwo rhovwe ayen, ọ gbe ghwọrọ aye-en, ọ da da ophu rọye ji ọke ejobi, o rhe jẹ ivuemiovwo rọye kparọ-ọ.

³⁹O karọhọ nẹ uvwo gheghe ayen ruẹ, odju ro djuẹ wan nẹ ọ gbe cha ọfa-a.

⁴⁰Mavọ ayen vwọ suọ phẹre te vwẹ evun rẹ aghwa re ayen vwọ kpare ophu rọye vwẹ evun rẹ aton!

⁴¹Ayen davwọ cha davwọ kpọ, ayen da kpare ophu rẹ Ọfuanfon Ọvuọvo re Izrẹl na.

⁴²Ayen rha karohọ ogangan rọye-e, eyẹ ẹdẹ rọ tan ayen nẹ obọ rẹ ivwighrẹ-ẹ,

⁴³ọke ro vwo ru eka rọye vwẹ Ijipt, kugbe iruo re igbunu rọye vwẹ udju ri Zoan.

⁴⁴Ọ da rhẹriẹ irhie rayen phihọ ọbara, ọtiọye na ame re ito rayen gbi ja da-a.

⁴⁵O de ji ekru re iyẹn bru ayen ra, re ra ghwọrọ ayen, kugbe igoro, re guọghọ ayen

⁴⁶Ọ da vwẹ ekankọn rayen kẹ ekpihori, emamọ re owian rayen vwọ kẹ ebaka.

⁴⁷O da vwe ibiosio guọghọ vain rayen, urhe ri sikamọ rayen vẹ osio rẹ erhanre.

⁴⁸O de siobọ nẹ uchuru rayen kẹ ibiosio, ekru re igodẹ rayen vwọ kẹ umomo re agbrara

⁴⁹O de siobọ nẹ ophu ọtuatua rọye bru ayen ra, ophu, ivuemiovwo, omaẹguọghọ, usun rẹ emakashe re ghwọrọ.

⁵⁰O gbẹn idjerhe kẹ ophu rọye, ọ djẹ ayen ughwu-u, ẹkẹvuọvo ọ de siobọ nẹ ayen kẹ ọtiekọ.

⁵¹O hwe emekpako rẹ Ijipt ejobi, ọtuvwiẹ rẹ ogangan rayen vwẹ itughẹ ri Ham,

⁵²Etiyin ọ de sun ihwo rọye kerẹ igodẹ, ọ da rhẹrẹ ayen vwẹ evun rẹ aghwa kerẹ ekru rẹ igegede.

⁵³O de sun ayen egberhẹnẹdẹ, ọtiọye na oshọ gbi mu aye-en; ẹkẹvuọvo abadi da rọ ivwighrẹ rayen nu.

⁵⁴O da reyọ ayen rhe otọ ọfuanfon rọye na, vwọ rhe enu rẹ ugbenu re obọrhe rọye phi kua

⁵⁵Ọ da djẹ ẹgborho nẹ obaro kẹ ayen; ọ da ghare otọ na ẹkuẹko kẹ ayen ọ da vwẹ itughẹ royen vwọ kẹ orua rẹ Izrẹl dia.

⁵⁶Dede na ayen davwerọ ayen de mu kpahe Ọ rọ Me Kpenu Ọghẹnẹ, ayen gbe vwẹ ẹro te iseri rọye-e,

⁵⁷ẹkẹvuọvo ayen kuoma rhẹriẹ ayen de ru ogbigbiru kerẹ esẹ rayen; ayen de mu chahe kerẹ umurhabọ ro gbapre.

⁵⁸Ayen da vwẹ umukpe ra teye kpenu na vwọ kparọ ophu ayen da vwe ema re ayen kare vwọ kparọ ophu

⁵⁹Ọke rẹ Ọghẹnẹ vwo nyo, ọ da vọn vẹ ivuemiovwo, ọ da sen Izrẹl tototo.

⁶⁰Ọ da sen ẹdia rọye vwi Shiloh, utughẹ rọ dia vwẹ ohri rẹ ihwo,

⁶¹ọ da reyọ ogangan rọye vwọ kẹ ighuvwu, o de phi urinrin rọye phihọ obọ rẹ ọvweghrẹ.

⁶²O de siobọ nẹ ihwo rọye vwọ kẹ ọlọkọ, ọ da kpa ophu rọye ku ireuku rọye.

⁶³Erhanre da torhẹ imighene rayen, emetẹ rayen gbe so ine rẹ orọvwe-e

⁶⁴A vwe ọlọkọ nyavwe irherẹn rayen hwe, eyauku rayen gbe sa viẹ-ẹ.

⁶⁵Etiyin Ọrovwohwo da rhọvwọ rhe kerẹsiẹ ra vwerhẹ, kerẹ ọgba rọ kperẹ vwẹ ọke rẹ udi de muo.

⁶⁶O da nẹrhẹ ukọn rọye vadjẹ; ọ da vwẹ ọmaẹvuọ ri bẹdẹ kẹ ayen

⁶⁷Ọ da sen utughẹ ri Josẹf ọ gbe rha je orua rẹ Ifremu-u,

⁶⁸ẹkẹvuọvo ọ da je orua ri Juda reyọ, Ugbenu ri Zayọn, rọ guọnọre.

⁶⁹O da bọn ẹshẹ rọye kpenu re te odjuvwu, kerẹ akpọ na, re ọye ọvo mare bẹdẹ.

⁷⁰Ọ da jẹ Devid odioo rọye, ọ da reyọ nẹ urhuẹn rẹ igodẹ rhe,

⁷¹rọ ghẹre igodẹ vẹ emọ boba ri vwiẹ kẹ rọ dia osuigegede ri Jekọp ihwo rọye, rẹ Izrẹl ireuku rọye.

⁷²Vẹ udu rẹ ọsoso ọ vwọ ghẹrẹ ayen, ọ da vwẹ abọ rẹ ona vwo sun ayen.