Read urhobo Une rẹ Ejiro 81 Bible Online

Une rẹ Ejiro 81 - urhobo bible

Une rẹ Ejiro 81

¹Van so ine ke Ọghẹnẹ ogangan rẹ avwanre; kperi ukperi rẹ aghọghọ kẹ Ọghẹnẹ ri Jekọp!

²Kpare une, hworo ukiri na, isorogun ọvwevwerhe vẹ akpata na.

³Hworo owanre vwẹ ọtuphro rẹ emeranvwe, vwẹ ọke rẹ emeranvwe da vẹgbe, vwẹ ẹdorẹ rẹ avwanre.

⁴Kidie iji vwọ kẹ Izrẹl, egba rẹ Ọghẹnẹ ri Jekọp.

⁵O de ghwoghwo vwi Josẹf, ọke rọ vwọ yan wan otọ rẹ Ijipt na. Mi nyo urhuru rẹ me je riẹn dẹvo-o,

⁶Mi de mie we oghwa rọ hẹ igabọ wẹn; e de si abọ wẹn nẹ obere na.

⁷Vwẹ evun rẹ uvwerhe wo de se, Mi de sivwi uwe, Mi de nyo we vwẹ asan odjahọ rẹ agbrara; Me da davwe owẹ ni vwẹ asan ame ri Meriba.

⁸Nyo, E ihwo mẹ, vwẹ ọke mi de bru we uche! E Izrẹl, manẹ wọ sa kerhọn mẹ vwonẹ!

⁹A gbe sa mrẹ ọghẹnẹ ọrhorha vwẹ ohri wẹ-ẹn; wo gbi che shiguẹ kẹ ọghẹnẹ rẹ isiorho-o.

¹⁰Mẹvwẹ Ọrovwohwo rẹ Ọghẹnẹ wẹn, rọ reyọ owẹ nẹ otọ rẹ Ijipt rhe. Rhie unu wẹn te ẹtan, ke me sa vọn.

¹¹Ẹkẹvuọvo ihwo mẹ rha kerhọn rẹ urhuru mẹ-ẹ; Izrẹl rha davwerhọ mẹ-ẹ.

¹²Ọtiọye mi de siobọ nẹ ayen kẹ udu ọgangan rayen, re ayen nene iroro rẹ udu rayen.

¹³E manẹ kẹ ihwo mẹ sa kerhọn mẹ vwonẹ, rere Izrẹl yan vwẹ idjerhe mẹ!

¹⁴Nanana ki mi phi ivwighrẹ rayen kua, re mi hirhe abọ mẹ ku ivwighrẹ rayen.

¹⁵Otu ri tuoma rẹ Ọrovwohwo ke cha shọrọ bro rhe, urhiẹnvwe rayen kọ tọn rhiri bẹdẹ.

¹⁶Me vwẹ omamọ rẹ iwurhie rẹ ọka vwọ ghẹrẹ owẹ, vẹ ọnyọn ro nẹ evun rẹ oragha rhe Me vwọ vọn wẹ evun.