Read urhobo Une rẹ Ejiro 83 Bible Online

Une rẹ Ejiro 83 - urhobo bible

Une rẹ Ejiro 83

¹E Ọghẹnẹ, wo fotovwi-i; wo rhurhu unu wẹ-ẹn eyẹ wọ fọ-ọ, E Ọghẹnẹ!

²Kidie gbe no, ivwighrẹ wẹn re guẹ; ayen otu ri tuoma wẹ kpare uyovwi rayen kpenu.

³Ayen ra jẹ iroro rẹ egbẹlẹkẹ vwọ kpahe ihwo wẹn; ayen ra gba ẹguare rhurhu ihwo ru wọ sẹro rayen.

⁴Ayen me ta, Yanrhe, jẹn avwanre phoro ayen nẹ otọ na re i jẹ egborho ẹdia, e gbi jẹn a karohọ odẹ rẹ Izrẹl ọfa-a!

⁵E, ayen hworo ẹnwrọn kugbe; ayen re ọphọ kpahe owẹ —

⁶itughẹ rẹ Idọm kugbe Ishmael, Moab kugbe ihwo ri Hag,

⁷Gẹbal vẹ Amọn kugbe Amalẹk, Filistia kugbe ihwo ri Taya;

⁸Asiria ji rhi ku oma gbe ayen re; Ayen igbabọ egangan rẹ emọ ri Lọt.

⁹Ru kẹ ayen kirobo we ru ki Midian, vwọ ke Sisira vi Jabin vwẹ asan urhie ri Kishọn,

¹⁰ra ghwọrọre vwẹ Ẹndọr, ri hirhe phihọ isọn kẹ otọ na.

¹¹Ru ehọnvwọnre rayen kerẹ Orẹb vi Zeeb, isun rayen ejobi kerẹ Zeba vi Zalmunna,

¹²rọ tare, Jẹn avwanre ghwẹ ẹkẹn rayen kẹ oma rẹ avwanre vwẹ usun rẹ egbri rẹ Ọghẹnẹ?

¹³E Ọghẹnẹ mẹ, gbe ru ayen kerẹ iwurhie ri kiẹ riariẹ, kerẹ iphopho rẹ odju muẹ.

¹⁴Kirobo re erhanre torhẹ egbo na, kirobo rẹ ogiderhanre la vwẹ enu rẹ igbenu na,

¹⁵ọtiọye wọ vwẹ ogiribo wẹn vwọ tua ayen wọ mẹ vwẹ aphopho rode vwo guegue ayen!

¹⁶Vwẹ omavovwẹ vọn opharo rayen, rere ayen vwọ guọnọ odẹ wẹn, E Ọrovwohwo.

¹⁷Jẹn a phọphọ ayen re oma vo ayen bẹdẹ; jẹn ayen ghwọrọ vwẹ omaẹphọphọ.

¹⁸Jẹn ayen riẹn nẹ wọwẹ ọvo kpoi, rẹ odẹ rọye Ọrovwohwo na, ri Me Kpenu vwẹ enu rẹ kpọ na ejobi.