Read urhobo Une rẹ Ejiro 85 Bible Online

Une rẹ Ejiro 85 - urhobo bible

Une rẹ Ejiro 85

¹Ọrovwohwo, wo vwo evun esiri kẹ otọ wẹn; wọwẹ re vwẹ ughwẹ ri Jekọp rhivwi rhe.

²Wọwẹ rẹ vwẹ orukuruku rẹ ihwo wẹn ghovwo ayen; wẹ re vwẹ umwemwu rayen vwo ghovwo ayen.

³Wọwẹ ri se ivuemiovwo ejobi reyọ wọwẹ ri rhẹriẹ nẹ ophu ọtuatua wẹn.

⁴Vwẹ avwanre rhivwi rhe, E Ọghẹnẹ re esivwo rẹ avwanre, re wo se ivuemiovwo wẹn ne avwanre oma!

⁵Ku wo mu ophu rẹ avwanre bẹdẹ? ku wo mu ophu wẹn na rhiri re te uvwiẹ rọ cha?

⁶Wọ ra rhoma rhọvwọ avwanre-e, rere ihwo wẹn vwọ ghọghọ vwẹ oma wẹn?

⁷Dje ẹguọnọ wẹn ro je rhẹriẹ na, E Ọrovwohwo, re wọ kẹ avwanre esivwọ wẹn.

⁸Ju vwe nyo obo re Ọghẹnẹ Ọrovwohwo na cha ta, kidie ọ cha ta ota re ufuoma kẹ ihwo rọye, kẹ ihwo efuanfon rọye, kugbe ayen otu re vwẹ udu rayen ejobi hirhe bro rhe.

⁹Uyota esivwo rọye ọkẹkẹre kẹ ihwo re djẹ oshọ rọye, rere urinrin vwọ dia otọ rẹ avwanre.

¹⁰Ẹguọnọ ro jẹ rhẹriẹ vẹ esegbuyota cha vwa oma; ọvwata vẹ ufuoma cha fiọnfiọn ohwohwo unu.

¹¹Esegbuyota cha va nẹ otọ rhe, ọvwata ko che ni otọ nẹ obenu rhe.

¹²E, Ọrovwohwo sa kẹ obo ri yovwiri, otọ rẹ avwanre ko yovwi emu buebu.

¹³Ọvwata kọ cha ka obaro kẹ ko ru ichiyi rọye hirhe phihọ idjerhe.