Read urhobo Une rẹ Ejiro 86 Bible Online

Une rẹ Ejiro 86 - urhobo bible

Une rẹ Ejiro 86

¹Rhie erhọn wẹn, E Ọrovwohwo, re wo nyo vwẹ, kidie mẹvwẹ ogbere rẹ akpọ bẹn.

²Sẹro rẹ arhọ mẹ, kidie mẹvwẹ ohwo esiri; sivwi odibo wẹn rọ vwẹ ẹro so wẹ.

³Wọwẹ ọye Ọghẹnẹ mẹ; ni aruẹdọ mẹ, E Ọrovwohwo, kidie wẹwẹ mi kperẹ se vwẹ ẹdẹ na ejobi.

⁴Phi omavwerhe phihọ udu rẹ odibo wẹn, kidie wẹ, E Ọrovwohwo, me kpare ẹnwẹ mẹ ni.

⁵Kidie wọwẹ, E Ọrovwohwo, ohwo esiri vẹ evwoghovwo, wọ vọnre vẹ ẹguọnọ ro jẹ rhẹriẹ kẹ ihwo ejobi ri se we.

⁶Kerhọn rẹ ẹrhovwo mẹ, E Ọrovwohwo, nyo oviẹ rẹ oyare mẹ.

⁷Vwẹ ẹdẹ rẹ ukpokpogho mẹ mi dẹ sẹ wẹ, kidie wo ghine nyo vwe.

⁸O vwo ọvuọvo rọ họhọ owẹ vwẹ usun rẹ ẹdjọ na-a, E Ọrovwohwo, eyẹ o ji vwo iruo efa re họhọ ewẹ-ẹn.

⁹Ẹgborho ejobi ru wọ mare na cha rhe rhi diguẹ vwẹ obaro wẹ, E Ọrovwohwo, ayen ki che jiri odẹ wẹn.

¹⁰Kidie wọ pha rhuarho wo ruẹ emu rẹ igbunu, wọwẹ ọvo ọye Ọghẹnẹ.

¹¹yono uvwe idjerhe wẹn, E Ọrovwohwo, rere me yan phihọ uyota wẹn; ku udu mẹ gbe rọ vwo djẹ oshọ wẹn.

¹²Me vwe ẹkpẹvwẹ kẹ wẹ, E Ọrovwohwo Ọghẹnẹ mẹ, vẹ udu mẹ ejobi, ki mi se jiri odẹ wẹn bẹdẹ.

¹³Kidie ẹguọnọ wẹn ro jẹ rhẹriẹ na pha rhuarho kẹ vwẹ; wọwẹ ri sivwi ẹnwẹ mẹ nẹ obo okokodo rẹ Erivwi

¹⁴E Ọghẹnẹ, ihwo ri yivwaro vrẹn vwọ so vwẹ; otu rẹ ihwo zighi zighi guọnọ arhọ mẹ, ayen rha vwẹ owẹ ka obaro rẹ aye-en.

¹⁵Ẹkẹvuọvo wẹ, E Ọrovwohwo, wẹ Ọghẹnẹ ro nẹ aruẹdọ vẹ ehrọre, ọ fobọ mu ophu-u, ọ vọnre ve ẹguọnọ ro jẹ rhẹriẹ kugbe esegbuyota.

¹⁶Rhivwi bru vwe rhe re wọ re ehrọre mẹ, vwẹ ogangan wẹn kẹ odibo wẹn, re wo sivwi ọmọ rẹ ọmọtẹ wẹn.

¹⁷Dje oka rẹ evun esiri wẹn kẹ vwẹ, rere otu ri tuoma mẹ vwọ mrẹ re oma vo ayen kidie wẹwẹ, E Ọrovwohwo, re cha vwẹ uko wo de bru vwe uche.