Read urhobo Une rẹ Ejiro 88 Bible Online

Une rẹ Ejiro 88 - urhobo bible

Une rẹ Ejiro 88

¹E Ọrovwohwo, Ọghẹnẹ mẹ, me nekpẹn rẹ ọchuko vwẹ oghẹruvo, mi kperi se we vwẹ ọke rẹ ason.

²Jẹn ẹrhovwo mẹ bru we rhe, rhie erhọn phihọ kẹ oviẹ mẹ!

³Kidie ẹnwẹ mẹ vọnre vẹ ukpokpogho, arhọ mẹ re siẹ kẹrẹ Erivwi.

⁴E kere uvwe kugbe ihwo ri kpo obo Ukpotọ, mẹvwẹ ohwo ro je ogangan evwo,

⁵kerẹ ohwo ra senre vwẹ ohri rẹ irivwi, kere ihwo re hweri ra riẹn phihọ ushi, kere ihwo re wọ gbe karohọ ọfa-a, kidie a nyavwe ayen kufia nẹ obọ wẹn.

⁶Wọwẹ ri phi vwe phihọ obo okokodo re Ukpotọ na, vwẹ ubrakpọ obiebi kokodo.

⁷Ophu wẹn pha họhọhọ kẹ vwẹ, wọ vwẹ ọgbogho wẹn na ejobi re vwe phihọ

⁸Wọwẹ re sorọ rẹ otu mẹ ejobi vwọ kẹnẹ oma kẹ vwẹ; wọ da vwẹ ovwẹ ru emu rẹ ọfianvwe kẹ ayen. a kare ẹchẹ gbe vwe me gbe sa vabọ-ọ,

⁹ẹro mẹ re dje fiki rẹ oja. Kẹdẹ kẹdẹ mi vwo se we, E Ọrovwohwo; re riẹn abọ mẹ bru we.

¹⁰Wo ru iruo re igbunu ke irivwi? Uhoho re ihwo se vrẹn rhi jiri uwe?

¹¹E se dje ẹguọnọ wẹn ro je rhẹriẹ vwẹ evun rẹ ushi, eyẹ esegbuyota vwe evun rẹ Abaddọn?

¹²A sa riẹn igbunu wẹn vwe evun re ebri, eye ogangan rẹ esivwo wẹn vwe otọ re ẹchọẹro?

¹³Ẹkẹvuọvo mẹvwẹ, E Ọrovwohwo, re viẹ hwe we; vwẹ irhiọke ẹrhovwo mẹ bru we cha.

¹⁴E Ọrovwohwo, die wo vwọ djẹ vwẹ kufia? Die wo vwo siẹ opharo wẹn nẹ kẹ vwẹ?

¹⁵Ukpokpogho ro bi kẹrẹ ughwu mi epha nẹ ọke emọ mẹ rhe, Me re oja rẹ oshọ wẹn; me pha ghwrọghọ.

¹⁶Ivuemiovwo wẹn hwerhe uvwe wan, oshọ rẹ ẹghwọ wẹn ghwọrọ ovwẹ.

¹⁷Ayen riariẹ ovwẹ kerẹ oghwe vwẹ ẹdẹ na ejobi; ayen bi gba vwẹ kikiriki.

¹⁸Wọwẹ re nẹrhẹ ọnse te ugbeyan kẹnẹ oma kẹ vwẹ; otu mẹ he evun rẹ ebri.