Read urhobo Une rẹ Ejiro 89 Bible Online

Une rẹ Ejiro 89 - urhobo bible

Une rẹ Ejiro 89

¹Me sa so ine rẹ ẹguọnọ wẹn ro jẹ rhẹriẹ na, E Ọrovwohwo, bẹvwẹdẹ; unu mẹ mi vwo ghwoghwo esegbuyota wẹn ke uvwiẹ na ejobi

²Kidie a bọn ẹguọnọ wẹn ro je rhẹriẹ na phihọ rhiri bẹdẹ, esegbuyota wẹn pha kokoroko kere odjuvwu na.

³Wọwẹ re tare, Me vẹ ọ re Me jẹreyọ na re ọphọ, Mi duvwu iyori kẹ odibo mẹ Devid nure:

⁴Me vwẹ owọ re uvwiẹ wẹn muotọ bẹdẹ, Me bọn ekete wẹn na phihọ kẹ orua na ejobi bẹdẹ.

⁵Jẹn idjuvwu jiri igbunu wẹn, E Ọrovwohwo, esegbuyota wẹn vwẹ ọghwẹgbe rẹ ihwo efuanfon!

⁶Kidie kono obenu na re vwo dje we Ọrovwohwo? Ono vwe ohri re ihwo re obo odjuvwu na re họhọ Ọrovwohwo,

⁷Ọghẹnẹ ra dje oshọ rọye vwẹ ukoko re ihwo efuanfon wẹn, rọ rhoro ro mu oshọ nọ ayen ejobi rẹ riarierẹ phihọ?

⁸E Ọrovwohwo Ọghẹnẹ re otuofovwi, Ono re goma kere owẹ, E Ọrovwohwo, vẹ esegbuyota wẹn rọ riariẹ owẹ wan?

⁹Wọwẹ ri sun oseghe re abadi na; vwe ọke re ọgbogho rọye da kpara, wọwẹ ri fue ayen.

¹⁰Wọwẹ re ghwọrọ Rihab kerẹ orivwi, wọwẹ re vwe obọ re egba wẹn hra ivwighrẹ wẹn

¹¹Idjuvwu na ewẹn, akpọ na rhe je vwẹ ọwẹn; akpọ na kugbe obo re he evun rọye na, wọwẹ re ma ayen ejobi.

¹²Te obọrhe ọnre te obọhwere ọnre, wọwẹ re ma ayen. Tabọ kugbe Hammon re jiri odẹ wẹn vẹ aghọghọ.

¹³Wọwẹ ri vwẹ ugbobọ re ẹgba, obọ wẹn ganre, obọrhe wẹn kpenu gangan.

¹⁴Ọvwata kugbe ọsoso eye ichiyotọ rẹ ekete wẹn; ẹguọnọ wẹn ro jẹ rhẹriẹ vẹ esegbuyota ka obaro kẹ wẹ.

¹⁵Ebruphihọ kẹ ihwo re riẹn ekpere rẹ orẹ na, re yan vwẹ urhukpẹ rẹ opharo wẹn, E Ọrovwohwo,

¹⁶re ghọghọ vwe odẹ wẹn vwẹ edẹ na ejobi, re kpare ọvwata wẹn kpenu.

¹⁷Kidie wọwẹ urinrin re ogangan rayen, vwẹ oma re ẹroesiri wẹn a vwọ kpare ighoro re avwanre kpenu.

¹⁸Kidie ekpọfia re avwanre rhe Ọrovwohwo na, ovie re avwanre Ọfuanfon Ọvuọvo rẹ Izrẹl.

¹⁹Wẹ re ja ta ota vwẹ emramrẹ vwẹ ọke re awanre ke ihwo efuanfon wẹn, tanẹ, Me vwe erhu rẹ ovie tughẹ o ro vwo ẹgba, Me kpare ọvo ra jẹreyọ nẹ uherevie re ihwo na rhe kpenu.

²⁰Me mrẹ Devid odibo mẹ nure, vẹ evwri ọfuanfon mẹ na mi vwo ghworo;

²¹rere obọ mẹ vwo nene dia bẹdẹ, ugbobọ mẹ kọ vwe egba kẹ.

²²Ọvweghrẹ na che se reghe-e ohwo umwemwu na che se vwo ghotọ-ọ.

²³Me cha ghwọrọ ivwighrẹ rọye vwe obaro rọye Ke me ghwiẹ otu ri tuoma rọye she teye otọ.

²⁴Esegbuyota mẹ vẹ ẹguọnọ ro jẹ rhẹriẹ na ko nene dia, vwẹ odẹ mẹ kọye a vwọ kpare ighoro rọye kpenu.

²⁵Me vwe abọ rọye mu vwẹ enu te abadi obọrhe rọye vwẹ enu re irhie.

²⁶Ọ cha viẹ se vwe, Wọwẹ Ọsẹ mẹ, Ọghẹnẹ mẹ, kugbe Oragha rẹ esivwo mẹ,

²⁷Ki mi vwo ru ọmọkpako, ovie ro me kpenu vwẹ akpọ na.

²⁸Ẹguọnọ mẹ ro je rhẹriẹ na ke me sẹro rọye nu kẹ bẹdẹ, ọphọ mẹ ko mudia kokoroko kẹ.

²⁹Me vwẹ uvwiẹ rọye muotọ bẹdẹ ekete rọye kerẹ ẹdẹ rẹ obo odjuvwu na.

³⁰O da dianẹ emọ rọye sen urhi mẹ re ayen gbe yan nene egha mẹ-ẹ,

³¹re ayen de gbe iji mẹ ku rẹ ayen gbe sa sẹro re irhi mẹ na-a,

³²ke me vwẹ ubiurhe hwe ogbeku rayen orukuruku rayen ke ugbudia,

³³ẹkẹvuọvo mi se si ẹguọnọ mẹ ro jẹ rhẹriẹ na no oma-a, eyẹ ophiẹvwe rha sa dia esegbuyota mẹ-ẹ

³⁴Mẹvwẹ ọvo rha sa chọ urhi rẹ ọphọ mẹ-ẹ, eyẹ se ku ota ro nẹ unu mẹ rhe rhẹriẹ-ẹ.

³⁵Obo ọvo rhiri bẹdẹ me vwẹ ọfuanfon mẹ duvwu iyori; Me sa vwọrọ efian ki Devidi-i.

³⁶Uvwiẹ rọye kọ dia bẹdẹ, ekete rọye kirobo rẹ ọnre na dia krite vwẹ obaro mẹ

³⁷Ka tọn phihọ bẹdẹ kerẹ emeranvwe; ko mudia kokoroko vwẹ ọke rẹ enu na tọn te.

³⁸Ẹkẹvuọvo Asakiephana wọ djẹ kufia wọ je ghwa sen, wọ vọnre vẹ ophu kpahe ọ re wọ vwẹ evwri ghworo.

³⁹Wọwẹ re pha ọphọ ru wọ vẹ odibo wẹn gba re, wọwẹ ri gbe erhu rẹ uvie rọye ẹgua phiphọ otọ.

⁴⁰Wọwẹ ri bru iphrophro phihọ igbẹhẹ rọye ejobi, wọwẹ re ghwọrọ ogba ọgangan rọye phihọ erhurhu.

⁴¹Ayen otu re wanvrẹn ejobi ki miovwo; o rhi hirhe phihọ ehwẹjẹ kẹ irivẹ rọye.

⁴²Wọwẹ re kpare obọrhe rẹ ivwighrẹ rọye kpenu, wọwẹ re nẹrhẹ ivwighrẹ rọye ejobi ghọghọ.

⁴³E, wọwẹ re rhẹriẹ ako rẹ ọlọkọ rọye kpuko, wo gbi jo mudia vwẹ ofovwi-i.

⁴⁴Wọwẹ ri si ọkpọ rẹ uvie na nẹ obọ rọye, wọ da vwẹ ekete rọye phiotọ.

⁴⁵Wọwẹ ri bru ẹdẹ rẹ ọmoha rọye krẹ; wọwẹ re vwẹ omaẹvuọ rhurho.

⁴⁶Mavọ okrite, E Ọrovwohwo, ru wo vwo si oma wẹn nu bẹdẹ? Mavọ ophu wẹn torhẹ kerẹ erhanre krite?

⁴⁷Karohọ, E Ọrovwohwo, obo rẹ ovwavwọn rẹ arhọ rẹ ohwo epha, mavọ emama wẹn emọ rẹ ohwo ejobi họhọ emu diọdi te!

⁴⁸Didi ohwo re dia akpọ na ro de jẹ ughwu emrẹ? Kono ri se sivwi ẹnwẹ rọye nẹ ọgangan rẹ Erivwi?

⁴⁹Ọrovwohwo, tivọ ẹguọnọ wẹn ro jẹ rhẹriẹ nẹ awanre rhe na epha, ru wọ vwẹ esegbuyota wẹn vwo duvwu iyori ki Devid?

⁵⁰Karohọ, E Ọrovwohwo, obo ra vwẹ odibo wẹn jehwẹ te, obo re me mrẹ osọnọ te fiki rẹ ihwo na,

⁵¹re ivwighrẹ wẹn vwọ bọphiẹ, E Ọrovwohwo, rẹ ayen vwọ vwẹ ichiyi rọ ra vwẹ evwri wẹn ghworo na jehwẹ.

⁵²Ebruphihọ kẹ Ọrovwohwo rhiri bẹdẹ! Isẹ kugbe Isẹ.