Read urhobo Une rẹ Ejiro 9 Bible Online

Une rẹ Ejiro 9 - urhobo bible

Une rẹ Ejiro 9

¹Me vwẹ ẹkpẹvwẹ kẹ Ọrovwohwo vẹ udu mẹ ejobi; Mi gbe ikun rẹ uruemu rẹ igbunu wẹn.

²Me ghọghọ re oma vwerhe ovwẹ kpahe owẹ, Me so ine rẹ ejiro kẹ odẹ wẹn, E Ọ ro me Kpenu.

³Ọke rẹ ivwighrẹ mẹ da rhoma kpuko, ayen ki she guọghọ vwẹ obaro wẹn.

⁴Kidie wẹ re riẹn oyan rẹ ọvwata mẹ; wo tidia vwẹ enu rẹ ekete de brorhiẹ rẹ ọvwata.

⁵Wẹ re ghwọ ku ẹgborho na, we re ghwọrọ iruimwemwu; we ri phoro odẹ rayen nu bẹdẹ bẹdẹ

⁶Ọvweghre na ravwiẹn kufia vwẹ ẹghwọrọ ri bẹdẹ, wo ghwie irere rayen kufia; ẹkarophihọ rayen te otọ karekare.

⁷Ẹkẹvuọvo Ọrovwohwo tidia ekete rọye bẹdẹ, ọ vwẹ ekete re ẹdjọeguo rọye vire,

⁸ọvwata kọye o vwo brorhiẹ rẹ akpọ na, o guẹdjọ rẹ ihwo na erhẹnrhẹnre.

⁹Ọrovwohwo na ogba ọgangan kẹ otu re shenyẹ, ogba ọgangan vwẹ ọke rẹ ukpokpogho.

¹⁰Ihwo re riẹn odẹ wẹn vwẹ ẹro so wẹ, kidie wẹ, E Ọrovwohwo, wọ je sen ihwo re guọnọ owẹ dẹvo-o.

¹¹So ine rẹ ejiro kẹ Ọrovwohwo rọ dia Zayọn! Gbe ikun rẹ uruemu rọye vwẹ ohri rẹ ihwo na!

¹²Kidie ihwo re reihri rẹ ọbara ọ karophihọ ayen, oviẹ rẹ ohwo rọ ukpokpogho sa chọrọ ẹro-o.

¹³Ni arodọvwẹ mẹ, E Ọrovwohwo! Nighe obo re me re oja rọye vwẹ obọ rẹ ihwo ri tuoma mẹ, E wẹ re kpare ovwẹ kpenu nẹ anurhoro rẹ ughwu,

¹⁴rere me vwẹ obọ te otọ gbe ikun rẹ ejiro wẹn, rere vwẹ anurhoro rẹ ọmọtẹ ri Zayọn. Me sa vwọ ghọghọ vwẹ esivwo wẹn.

¹⁵Ẹgborho na she phihọ ukpotọ rẹ ayen ọvo tọnre na; vwẹ ariri rẹ ayen ọvo sinu awọ rẹ obọ rayen da rhoma muo

¹⁶Ọrovwohwo na ru oma rọye ne a riẹn ọye, ọye ri brorhiẹ; orumiwemwu mu ufi re iruo re obọ rayen.

¹⁷Oruimwemwu cha yanran kpo Erivwi kugbe ẹgborho ejobi rẹ Ọghẹnẹ chọrọ ẹro.

¹⁸Kidie ọ ra akpọ bẹn cha sa chọrọ ẹro-o, iphiẹrohọ rẹ ovwiogbere se ghwru kufia bẹdẹ-ẹ

¹⁹Vrẹn, E Ọrovwohwo, wo jẹn obọ rẹ ohwo kpara-a, jẹn a vwe ẹgborho na guẹdjọ vwẹ obaro wẹn!

²⁰Djẹ oshọ mu ayen, E Ọrovwohwo! Jẹn ẹgborho na riẹn nẹ ohwo ghevweghe ayen ruẹ.