Read urhobo Une rẹ Ejiro 90 Bible Online

Une rẹ Ejiro 90 - urhobo bible

Une rẹ Ejiro 90

¹Ọrovwohwo, wọwẹ hẹ ẹdia rẹ avwanre rhabae rhe, vwẹ uvwiẹ ejobi.

²Tavwe rẹ igbenu na ke rhe tan phia, eyẹ tavwe wọ ke rhe mama otọ na vẹ akpọ na, nẹ irhiri re duvwu irhiri wọwẹ ọye Ọghẹnẹ

³Wọwẹ ri ku ohwo rhẹriẹ phihọ iwurhie, ọ Me ta, Rhoma rhe, E emọ rẹ ihwo!

⁴Kidie ikpe uriori vwẹ obaro wẹn e họhọ odẹ ro kpori na, eyẹ kerẹ ohẹrhẹ vwẹ evun rẹ ason.

⁵Wọwẹ ri hwerhe ihwo kuẹfia; ayen họhọ evwerhẹ, kerẹ odi rọ rhoma dia ọkpokpọ vwẹ irhiọke.

⁶vwẹ irhiọke ki gbodo gbodo ọ Me rhoma dia ọkpokpọ; vwe ovwọnvwọn ọ mi vwioro ọ me kpare she.

⁷Kidie ophu wẹn ghwọrọ avwanre, ivuemiovwo wẹn reghe avwanre phihọ.

⁸Wọwẹ ri mu imwemwu rẹ avwanre phihọ obaro wẹn, imwemwu rẹ avwanre re djahere he evun rẹ urhukpẹ rẹ opharo wẹn.

⁹Kidie ẹdẹ rẹ avwanre ejobi ra wanvrẹn vwẹ evun rẹ ophu wẹn, ikpe rẹ avwanre ri te oba kerẹ unuẹfiọn

¹⁰Ikpe rẹ akpọ rẹ avwanre ujorha gbe ihwe, eyẹ ọkeọvo ugbegangan o vwo te ujọne, dede na ẹdẹ rẹ akpọ rayen vọnre vẹ omaesuo vẹ ukpokpogho; nananana ayen wanvrẹn nure, avwanre ke rhan yanran

¹¹Kono ri se roro ogangan rẹ ophu wẹn, ivuemiovwo wẹn kirobo rẹ oshọẹdjẹ wẹn epha?

¹²Ọtiọye na gbe yono avwanre me vwo kere ẹdẹ rẹ avwanre rere avwanre vwo vwo udu rẹ aghwanre.

¹³Rhoma, E Ọrovwohwo! Mavọ okrite? Re ehrọre rẹ idibo wẹn!

¹⁴Vwẹ ẹguọnọ wẹn ro jẹ rhẹriẹ na vọn avwanre evun vwẹ irhiọke, rere oma vwerhe avwanre re ma ghọghọ vwẹ ẹdẹ rẹ akpọ rẹ avwanre ejobi.

¹⁵Gbe jẹn avwanre ghọghọ kerẹ uche ẹdẹ ru wọ lagha avwanre krite, kerẹ uche ikpe re avwanre mrẹ umiovwo krite.

¹⁶Jẹn iruo wẹn phia kẹ idibo wẹn mrẹ, urinrin re ogangan wẹn kẹ emọ rayen.

¹⁷Jẹn ẹroesiri rẹ Ọrovwohwo Ọghẹnẹ re avwanre dia uyovwi rẹ avwanre, rere wo ru iruo rẹ abọ rẹ avwanre ghwa otọ ke avwanre, e, iruo rẹ abọ rẹ avwanre vwọ ghwa otọ.