Read urhobo Une rẹ Ejiro 94 Bible Online

Une rẹ Ejiro 94 - urhobo bible

Une rẹ Ejiro 94

¹E Ọrovwohwo, wọwẹ Ọghẹnẹ rọ reihri, wọwẹ Ọghẹnẹ rọ reihri na, la phia!

²Vrẹn mudia, E oguẹdjọ rẹ akpọ na, hwa ke ọ ro herẹ na ẹkẹn osa rayen!

³E Ọrovwohwo, mavọ okrite re ohwo umwemwu, mavọ okrite re ohwo umwemwu vwọ kpare oma kpenu?

⁴Ayen re kuojoro rẹ eta rẹ ọjẹfia rayen, ayen yan eyan, ihwo ri ruẹ imwemwu ejobi.

⁵Ayen guọghọ ihwo wẹn, E Ọrovwohwo, ayen lagha ireuku wẹn.

⁶Ayen hwe ayeuku kugbe ọyoyan, ayen ozighẹ re ọmọphrorivwi;

⁷ayen da ta, Ọrovwohwo sa mrẹ-ẹ, Ọghẹnẹ ri Jekọp se vughe-e.

⁸Ọ ro wẹ, E ọ ro me ghẹn vwẹ usun re ihwo na! Ẹkpa na, ọkevọ wa vwọ ghwanre?

⁹Ohwo rọ vwẹ erhọn na tamu, o gbi se nyo-o? Ohwo ro ma ẹro na, ọ gbe sa mrorẹ?

¹⁰Ohwo rọ ghwọ ku ẹgborho na, ọ gbe sa ghwọ-ọ? Ọ rọ yono ihwo aghwanre,

¹¹Ọrovwohwo na, riẹn iroro rẹ ohwo, nẹ ayen ẹnwẹ diodi.

¹²Ebruphihọ kẹ ohwo ru wọ ghwọ ku, E Ọrovwohwo kugbe ohwo ru wo yono nẹ evun re urhi wẹn rhe

¹³vwọ kẹ ofuvwegbe nẹ evun re ukpokpogho, bẹsiẹ ra vwọ tọn ukpotọ ohwo umwemwu.

¹⁴Kidie Ọrovwohwo cha sen ihwo rọye-e ọ cha djẹ je ireuku rọye vwọ-ọ,

¹⁵Kidie ọsoso che rhivwi bru ọvwata rhe, ihwo re dia ọsoso vwẹ udu ejobi ki nene.

¹⁶Ono ri vrẹn nene uvwe vwọ so ihwo umwemwu? Ono ri mudia kẹ vwẹ vwọ so ihwo ebrabra?

¹⁷O dianẹ kẹ Ọrovwohwo re cha vwẹ uko vwo-o, mane nananana ẹnwẹ mẹ ke obo otọ ra da fọ gbiẹi kọye a ra.

¹⁸Ọke mi de roro, Owọ mẹ kọ ghworiẹ, ẹguọnọ wẹn ro je rhẹriẹ na, E Ọrovwohwo, da yọnrọn ovwẹ mudia.

¹⁹Ọke rẹ enwan rẹ udu mẹ de rhi buphihọ, uchebro wẹn kọye sasa ẹnwẹ mẹ.

²⁰Ke ihwo umwemwu ri suẹn na se kuoma kugbe uwe, re vwẹ urhi na ruẹ emu ogbarogba?

²¹Ayen se oma koko vwọ so erhi rẹ ọvwata, ayen mi brorhiẹn rẹ ughwu hwe ọ rọ fuevun.

²²Ẹkẹvuọvo Ọrovwohwo rhoma hirhe phihọ ogba ọgangan mẹ. Ọghẹnẹ mẹ ọye oragha rẹ odjahọ mẹ.

²³O cha rhoma reyọ orukuruku rayen vwọ nyẹ ayen kọ hwerhe ayen kufia fiki rẹ uvumwemwu rayen, Ọrovwohwo Ọghẹnẹ rẹ avwanre che hwerhe ayen kufia.