Read urhobo Isẹ 18 Bible Online

Isẹ 18 - urhobo bible

Isẹ 18

¹Ohwo ra phiẹn ghwru ri ruẹ omeru rere ọ vwọ guọghọ omamọ rẹ orhiẹn kufia.

²Ẹkpa vwo omavwerhovwẹ kẹ ẹruọ-ọ, ẹkẹvuọvo takpọ ọ sa ta obo ro nẹ evun rọye rhe.

³Ọke rẹ uvumwemwu da rhe, ehwẹjẹ kọ nene cha rhe; jẹ ẹme enyo ọ vẹ oma ẹphọphọ gba yan.

⁴Eta rẹ unu rẹ ohwo họhọ ame okokodo, ogbugbu rẹ aghwanre djẹ kerẹ ọkere rẹ ame.

⁵Ofori rere a vẹ ohwo umwemwu vwọ dia obo vwẹ ẹdjọ-ọ, rere e brorhiẹ hwe ọvwata rọ riase-e.

⁶Ẹbẹrunu rẹ ẹkpa so eta; ugbunu rọye sua ohọre.

⁷Unu rẹ ẹkpa ọye ri hwe, igbenu rọye nẹrhẹ ufi muọ.

⁸Eta rẹ ọvwero họhọ uvwo rẹ eri rọ vwerha, e nabọ ghwọrọ ro ohwo oma ejobi.

⁹Ọvwiẹrẹ ro se ru iruo-o, yẹ oniọvo rẹ ohwo rọ ghwọrọ ekọn.

¹⁰Odẹ rẹ Ọrovwohwo na ọye ohẹrhe rode, ọvwata da djẹ ruọ kọ rhọ.

¹¹Efe rẹ ọdafe ọye orere rọ da djẹrhọ, ọ họhọ igbẹhẹ ro kpenu rọ vwọ gba ogba riariẹ oma.

¹²Tavwe rẹ ẹghwọrọ ke rhe yẹ udu miovwi nure, ẹkẹvuọvo omevwokpotọ re karo kẹ ọghọ.

¹³Wọ da kpahe ota tavwe wo ki nyo, ọyeẹkpa vẹ omẹvuọ.

¹⁴Erhi rẹ ohwo se chiranko rẹ emiavwe; ẹkẹvuọvo kono se chiranko rẹ erhi rọ hẹ uvweri?

¹⁵Udu rẹ ọvwiroro vwo erianriẹn, erhọn rẹ ọvwẹghwanre guọnọ erianriẹn.

¹⁶Ẹse rẹ ohwo ruẹ ọ vwẹ ẹdia kẹ, o mi rhe ji suo kpo obaro rẹ ihwo ride.

¹⁷Ohwo ro ke guẹdjọ o ruẹ kere ẹsiẹ ra mrẹ nẹ ọye rease, bẹsiẹ rẹ onẹdjọ rọye cha vwọ nọ ọrhiẹn.

¹⁸Itẹ ọye ri vwrẹ ufi rẹ aphro, o mi bru orhiẹn rẹ otu ri sivwe oseghe.

¹⁹Ukoecha ra vwọ kẹ oniọvọ ọ họhọ orere ọgangan, ẹkẹvuọvo ẹghwọ họhọ ogbẹn ra vwọ kanrẹ ighẹn.

²⁰Ubi ro nẹ unu rẹ ohwo rhe ọye re vọn evun, emamọ rẹ ugbenu rọye re nẹrhẹ evun vọn.

²¹Ughwu vẹ arhọ hẹ evun rẹ ogangan rẹ ẹrẹnvwe, ihwo re guọnerọ ke cha re emamọ rọye.

²²Ohwo rọ mrẹ aye reyọ mrẹ omamọ re emu, ọ je mrẹ ẹroesiri nẹ obọ rẹ Ọrovwohwo rhe.

²³Ogbere nabọ yovwo unu, ẹkẹvuọvo ọdafe kpahe ota waẹ wae.

²⁴Igbeyan evo herọ re vwẹ oma ruẹ igbeyan, ẹkẹvuọvo ugbeyan ọvo herọ re kẹrẹ ohwo nọ oniọvo.