Read urhobo Isẹ 21 Bible Online

Isẹ 21 - urhobo bible

Isẹ 21

¹Udu rẹ ovie epha kerẹ uto rẹ ame vwẹ obọ rẹ Ọrovwohwo na; o se kuo rhẹriẹ kirobo ri jere.

²Idjerhe rẹ ohwo rẹ akpọ ejobi yovwẹ re vwẹ ẹro rọye, ẹkẹvuọvo Ọrovwohwo vwanvwan udu.

³Re vwo ru emuesiri vẹ ọsoso o je Ọrovwohwo nọ izobo re zeri.

⁴Ẹro umwemwu vẹ udu rẹ eheri kugbe urhukpẹ rẹ ohwo umwemwu, ayen ejobi umwemwu.

⁵Iroro rẹ ohwo rọ vwẹ ẹro te otọ je yovwo-o, ẹkẹvuọvo ohwo ro bru okpakpa che fiabọ.

⁶Efe rẹ ovwọrefian vwori họhọ ivwirhi ri guvwie wan kugbe etan rẹ ughwu.

⁷Ozighi rẹ ohwo umwemwu na che hwerhe ayen kufia, fikiridie ayen gbobọnyẹ emuesiri eruo.

⁸Idjerhe rẹ ohwo rọ re abe pha gẹgẹre, ẹkẹvuọvo uruemu rẹ ohwo rọ fuevun shephihọ.

⁹O yovwi kẹ ohwo rọ vwọ dia akakọ rẹ enu rẹ uwevwi, nọ ra vẹ aye rọ kunu vwọ dia uwevwi ọvo.

¹⁰Erhi rẹ ohwo umwemwu umiovwo ọvo ọ guọnọ; ivun rẹ ọrivẹ rọye vwerhọn kakaka-a.

¹¹Ọke ra da fa ohwo rọ jẹ ohwo fia re, ohwo ghenghẹn kọ ghwanre; e de yono ọvwaghwanre, kọ riẹn phihọ.

¹²Ọvwata nabọ nẹ uwevwi rẹ ohwo umwemwu sua, e gere ohwo umwemwu na she ghwọrọ.

¹³Ohwo ro dierhọn kẹ unuebo rẹ ovwiogbere; ọke ro de che bunu vwẹ esiẹfa a gbe mrẹ ohwo nyo kẹ-ẹ.

¹⁴Ẹse ra bebe ru kẹ ohwo o kuẹ ophu rhẹriẹ, udi-ẹjẹ ra wan obuko jẹ nẹrhẹ ophu gan.

¹⁵Orhiẹn rẹ uyota nẹrhẹ oma vwerha ohwo esiri, ẹkẹvuọvo ọ nẹrhẹ ofu dje oruimwemwu.

¹⁶Ohwo ro suosuo nẹ idjerhe rẹ ẹruọ vwo, ko che rovwoma vwẹ ọghwẹgbe rẹ ughwu.

¹⁷Ohwo rọ guọnọ unuavwerhe rẹ akpọ cha dia ogbere, ohwo ro rhe nenesi rẹ udi vẹ udẹ che se fe-e.

¹⁸Oruimwemwu ọye a vwọ tan ọvwata, ohwo ro vwo esegbuyota-a kọye a rha vwọ tan ọ ro mudia gan.

¹⁹Ofori kẹ ohwo rọ vwọ dia evun rẹ aton, nọ re vwo nene aye ro muẹ ophu ro djẹ ẹghwẹghwọ dia.

²⁰Efe eghaghare a mrẹ vwẹ uwevwi rẹ ọvwẹghwanre ẹkẹvuọvo ẹkpa me guọghọ ayen kufia.

²¹Ohwo ro nenesi rẹ ọvwata vẹ arodọvwẹ cha mrẹ arhọ vẹ ọghọ reyọ.

²²Ohwo rọ ghwanre re sa gadiẹ orere rẹ ọgba, o mi kporo ogba ọgangan rẹ ayen vwẹ ẹro so ejobi.

²³Ohwo ro sẹro rẹ unu rọye vẹ ẹrẹnvwe rọye, kọ je sẹro rẹ oma rọye nẹ ukpokpogho.

²⁴Ọjihwofia ọye ọde rẹ ohwo ro herẹ, ro vwo ọnko ro yivwaro vẹ omaephuo.

²⁵Ẹguọnọ rẹ ọvwiẹrẹ ọye ri hwe kidie abọ rọye guọnọ owia-an.

²⁶Ẹdẹ na ejobi ọye ohwo umwemwu vwo phiẹro, ẹkẹvuọvo ọvwata kẹ, o mie-e.

²⁷Izobo rẹ ohwo umwemwu ẹgua ọ dia, komavo ọ dia ọ da dianẹ ọ vwẹ ọnko ze.

²⁸Oseri rẹ efian cha ghwọrọ kufia, ẹkẹvuọvo ota rẹ ohwo ro nyo ẹme cha tọn.

²⁹Oruimwemwu oma vuọ-ọ, ẹkẹvuọvo ohwo rọ fuevun nabọ roro idjerhe rọye te.

³⁰O vwo aghwanre-e, o vwo ẹruọ-ọ, o vwo iroro-o o se ru emuọvo kpahe Ọrovwohwo-o.

³¹A rhuẹrẹ iyesi kpahe hẹrhẹ ẹdẹ rẹ ofovwi, ẹkẹvuọvo obọẹkparo kẹ ọ rẹ Ọrovwohwo na.