Read urhobo Isẹ 24 Bible Online

Isẹ 24 - urhobo bible

Isẹ 24

¹Wọ rioma kpahe ihwo umwemwu-u, wọ je guọnọ ugbeyan raye-en;

²kidie ozighi ọvo udu rayen roro, eta rẹ ogbarogba eye ayen ta.

³Aghwanre ọye a vwọ bọn uwevwi, ẹruọ kọye e vwo muo viẹ.

⁴Erianriẹn ọye ivun na ejobi vwọ vọn vẹ efe re ghare ri yovwiri.

⁵Ohwo ro vwo aghwanre gan nọ ohwo ro vwo ẹgba, eriyin ohwo ro vwo erianriẹn je gan nọ ohwo ro vwo ogangan;

⁶kidie aghwanre ọye e vwo phiẹ ofovwi kua, iroro buebu ọye obọẹkparọ.

⁷Aghwanre kpenu nọ kẹ ẹkpa, o che se rhie unu vwẹ anurhoro na-a.

⁸Ohwo rọ jẹ iroro rẹ umwemwu eruo; ọye e se ohwo ogbarogba.

⁹Umwemwu ọye iroro ẹjẹ rẹ ẹkpa; ọjẹfia ẹgua kẹ ihwo.

¹⁰Oma de bruro owẹ vwẹ ọke rẹ ukpokpogho, yẹ ogangan wẹn ọhahavwe.

¹¹Sivwi ihwo ra teye hwe; ihwo re yan chedi chedi kpo ughwu da ayen ji.

¹²Wọ da ta, Nighe, avwanre riẹn ọnana-a. Ọ rọ vwanvwan udu rẹ ihwo ejobi na rha riẹ-ẹn? Ọ rọ rhẹrẹ erhi wẹn na rha riẹ-ẹn, wọ rha riẹn nẹ ọ cha hwa osa kẹ ihwo kirobo rẹ iruo rayen epha-a?

¹³Ọmọ mẹ, re ọnyọn, kidie ọ pha yoyovwi, eriyin rhe ame ro suẹn nẹ ọchuyovwi rẹ ọnyọn cha ye vwerha gangan.

¹⁴Gba riẹn nẹ aghwanre họhọ ọtiọye kẹ erhi wẹn; wọ da sa guọnọ mrẹ, yẹ erhuvwu herọ vwẹ obaro, iphiẹrohọ wẹn rhe se ghwru-u.

¹⁵Wọ hwa phihọ kirobo rẹ ohwo umwemwu hwa phihọ hẹrhẹ ọvwata-a; wo kporo uwevwi rọye-e;

¹⁶kidie ọvwata she asiẹ ighwre ọ me rhoma vrẹn; ẹkẹvuọvo ukpokpogho ri gere oruimwemwu she.

¹⁷Ọke rẹ ọvweghrẹ wẹn de she wọ ghọghọ-o, wọ jẹn udu wẹn ghọghọ siẹ rọ da kpro owọ-ọ.

¹⁸Ọrovwohwo da rha mrẹ, ivun de miovwo, o de rhe ku ophu ro muo kpahọ jovwo na kufia.

¹⁹Wo kpokpo oma wẹn fiki rẹ iruimwemwu na-a, wo ji phiẹro kpahe ihwo umwemwu-u;

²⁰kidie ohwo umwemwu vwo iphiẹrohọ-ọ; urhukpẹ rẹ ohwo umwemwu che fuẹ.

²¹Ọmọ mẹ, djẹ oshọ rẹ Ọrovwohwo na kugbe ovie, wọ phra ota raye-en;

²²kidie okpetu che nẹ obọ rayen cha kpregede, kono cha riẹn ẹghwọrọ ro che nẹ obọ rayen ivẹ na cha.

²³Enana je vwẹ eta rẹ ọvwaghwanre. Ọriẹvwẹ re vwo brorhiẹn yovwiri-i.

²⁴Ohwo ro ta kẹ oruimwemwu nẹ, Wọ re ase, ihwo ke harhọn, ko che tuẹ ẹgborho ejobi oma;

²⁵ẹkẹvuọvo ohwo rọ ghwọ ku oruimwemwu che vwo omavwerhe, omamọ rẹ ebruba kọ dia kẹ ayen.

²⁶Ohwo rọ kpahe ota ro shephihọ fiọnfiọn unu.

²⁷Ghwẹ ekuakua re ona wẹn kpo ọsuere, tọrọ ekọn wẹn ejobi kpahe vwẹ obo aghwa,

²⁸Wo se oseri rẹ eku hwe ọrivẹ wẹ-ẹn, wọ je vwẹ unu wẹn phiẹn ihwo-o.

²⁹Wọ ta nẹ, Mi che ruo ọtiobo ro ru vwe na-a; me cha hwa osa robo ro ru vwe hirhe kẹ.

³⁰Me wan udju rẹ ọvwiẹrẹ vrẹn, kugbẹ ọgba rẹ ohwo oghenghẹn;

³¹nighe odin din rhurho ejobi; ekpia de si rhurhu otọ na.

³²Me vwọ mrẹ ona re mi de roro, mi vwo no me da mrẹ uyono reyọ.

³³Omovwerhẹ tutuno, omovwerhẹ ego tutuno, amahọ ẹgbanọ vwẹ omaerovwo,

³⁴ogbere ko che she hwe we kerẹ oji ro cho ohwo, ọbẹvwẹ kerẹ ohwo rọ choma rẹ ofovwi.