Read urhobo Isẹ 26 Bible Online

Isẹ 26 - urhobo bible

Isẹ 26

¹Kirobo rẹ imicho je fo vwẹ ọke uvo eyẹ osio vwẹ ọke orhọ ye, eriyin ọghọ ji je fo kẹ ẹkpa.

²Kirobo rẹ ọmọphran Ọghẹnẹ rue vwẹ ọke rọ da kua kpo asan ọfa ye, kugbe obo rẹ ọkan ruẹ vwẹ ọke rọ da rha ye eriyin ekan ẹharhọ ro vwo otọ-ọ se she amu-u.

³A vwẹ ophiaphia fa esi, a me rha vwẹ ufi gba unu rẹ ekẹtẹkẹtẹ, ukpokpo kọye a vwọ ghwiẹ ugbuko rẹ ẹkpa.

⁴Wọ kpahe ọta kẹ ekpa kirọhọ ro ghẹ te-e, wọ da rha họhọ ekpuyovwi rọye.

⁵Kpahe kẹ ẹkpa kirobo ro ghẹ te, o de rhe ni oma rọye nẹ ọye ma ghwanre.

⁶Ohwo ro ji ekpa uwevwi bru awo rọye ọ me rha sọ okpetu kẹ oma.

⁷Kirobo rẹ awọ rẹ ukpono phieghe ri se ruẹ emuọvoo na, eriyin isẹ epha vwẹ unu rẹ ẹkpa.

⁸Kerẹ ohwo ro phi ubi rẹ olalọ phihọ udoroku, eriyin ohwo ro mu ọghọ kẹ ẹkpa epha.

⁹Kerẹ unwe ro duvwu obọ rẹ ọgba-udi eriyin isẹ epha vwẹ unu rẹ ẹkpa.

¹⁰Kerẹ ọsedada ro di muẹ ihwo sa eriyin ohwo ro durhie ẹkpa rọ wanvrẹn epha, yẹrẹn ọgba-udi.

¹¹Ọtiobo rẹ eranko rhivwi ra re egerẹn rọye, eriyin ẹkpa muẹ ughenghẹn rọye ria.

¹²Wọ mrẹ ohwo rọ ghwanre kẹ omobọ rọye? iphiẹrohọ herọ kẹ ẹkpa nọ ohwo yena.

¹³Ọzuọn ọye re ta nẹ, Okpohrokpo hẹ obo idjerhe na! okpohrokpo ọ hẹ osuada na!

¹⁴Ọtiobo rẹ ẹchẹ kuẹdẹriẹ vwẹ enu re ikeneku ye eriyin ọzuọn kuọma rhẹriẹ vwẹ enu rẹ ehwa rọye.

¹⁵Ọzuọn duvwẹ obọ phihọ udo-emu, uvwerhi rhe jẹn ọ sa kpare obọ kpo unu rọye-e.

¹⁶Ọzuọn nẹ ọye ọvo re ghwanre nọ imiragua ighwrẹ re riẹn obo ra vwẹ aghwanre kpahe ota.

¹⁷Ohwo ro di phi oma phihọ eghwọ rẹ ihwo efa ọ họhọ ohwo rọ mrẹ eranko rọ yan wan ọ da yọnrọn orhọn.

¹⁸Kirobo rẹ ọrhuẹ vwẹ erhanre, vẹ edada kugbe ughwu phiẹ ikpokpo ye,

¹⁹eriyin ohwo rọ phiẹn ọrivẹ rọye epha rọ ta nẹ, ehwẹjẹ me e pha.

²⁰Irhe da tonre erhanre ko fuẹn, vwẹ ọtiọye na ogbejugbeje rha he asa-an ẹghwọ kọ re.

²¹Ọtiobo rẹ esia epha vwọ kẹ imwerhanre, rẹ irhe je epha kẹ erhanre ye, eriyin ohwo ro gbugbo rẹ ẹghwọ sua okpetu.

²²Ikuegbe rẹ ogbejugbeje vwerha kerẹ uvwo rẹ eranvwe; e nabọ ghwọrọ kpo obevun rẹ oma na ejobi.

²³Kirobo ra vwẹ ughegbe whoro ochẹ ye, eriyin unu-avwerhe rẹ ota rhurhe evun ọbrabra.

²⁴Ohwo rọ jẹ eghrẹn, ọ vwẹ unu phiẹn ohwo o mi rhurhu ophiẹvwe rọye ba udu.

²⁵Ọke rọ da vwẹ unu biẹnbiẹn wo se gbuyota-a, kidie uruemu ẹgua ighwrẹ hẹ udu rọye.

²⁶Owenẹ ọ vwẹ ọphiẹvwẹ rhurhu eghrẹn rọye dede, umwemwu rọye cha phia vwẹ evun rẹ ọghwẹgbe vwẹ obọ.

²⁷Ọ rọ tọn ọgọdọ che she phihọ, ukpokpo re phiri che rhivwi re she ohwo ro phiro.

²⁸Ẹrẹnvwe rọ vwọrọn ofian tuẹ oma re ohwo ro guẹn na, unu rọ ta ọpata cha ghwọrọ kufia.