Read urhobo Isẹ 27 Bible Online

Isẹ 27 - urhobo bible

Isẹ 27

¹Wọ yan eyan hẹrhẹ odẹ-ẹ, kidie wọ riẹn obo rẹ odẹ cha ghwa rhe-e.

²Wọ vwẹ unu jirẹ oma wẹ-ẹn, jẹn ohwo ọfa jiri uwe.

³Oragha epha họhọhọ, ekpẹn je vwo ọnyẹn, ẹkẹvuọvo ophu ẹkparọ rẹ ẹkpa họhọ nọ ayen ivẹ na.

⁴Ivuemiovwo ọbrabra, ophu-emuo pha yẹngbẹ; ẹkẹvuọvo kono se mudia hẹrhẹ omaẹriọ?

⁵Ẹghwọ ra ghwọ phia yovwi nọ ẹguọnọ ra vwọ djahe.

⁶Ugbeyan ro ohwo da wan ohwo oma ji ugbeyan ọ je epha; yẹ unuẹfiọnfiọn rẹ ọvweghrẹn buẹn gangan.

⁷Ohwo rẹ evun vọnre ọnyọn dede ko phuo cha, ẹkẹvuọvo ohwo rẹ ewẹvwe hwe obo re yara ejobi ke miẹmiẹ.

⁸Kere ọmọphran ro beghe jẹ ẹho rọye vwo eriyin ohwo ro suosuo jẹ uwevwi rọye vwo epha.

⁹Ori vẹ ishani nẹrhẹ udu rẹ ohwo ghọghọ, ẹkevuọvọ ukpokpogho hra erhi rẹ ohwo.

¹⁰Ugbeyan wẹn, eyẹ ugbeyan rẹ ọsẹ wẹn, wọ sen aye-en; wo kpo uwevwi rẹ oniọvo wẹn vwẹ ẹdẹ rẹ okpetu wẹ-ẹn. Ọrivẹ rọ dia kẹrẹ ohwo yovwi nọ oniọvo rọ hẹ ogboko.

¹¹Ghwanre, ọmọ mẹ, rere udu mẹ vwọ ghọghọ, rere me mrẹ ota kpahe kẹ ohwo rọ vwẹ ovwẹ jehwẹ.

¹²Ọvwaghwanre da mrẹ ukpokpogho rọ cha o mi sioma nu, ẹkẹvuọvo ohwo oghenghẹn me kọn ruọ o mi ghwu phihọ.

¹³Reyọ ewun rẹ ohwo na siẹ rẹ ohwo da re esarobọ kẹ ọrhora, gba yọnrọn ijọpha na siẹ rẹ ohwo da re esarobọ kẹ ohwo rẹ isiorho.

¹⁴Ohwo rọ van nẹ ẹrhovwo kẹ ọrivẹ rọye, vwẹ irhiọke rhirhi, e che se nẹ ekan ọ harhan.

¹⁵Eme eghwẹghwẹ rẹ osio ọ vẹ aye rọ dje ẹghwọ ẹghwọ abavo,

¹⁶Ohwo rọ darọ ji yọ je sa da odju ji eyẹ kọ họhọ ohwo rọ vwẹ obọrhe yọnre ọfigbọ.

¹⁷Utehru a vwọ nọn utehru, eriyin ohwo ọvo kpọ ọrivẹ viẹ.

¹⁸Ohwo rọ vwẹ ẹro te urhe rẹ owe ọ je cha fon ubi rọye, ọ rọ rhẹrẹ onini rọye che vwo ọghọ.

¹⁹Ọtiobo rẹ opharo mrẹ opharo vwẹ evun rẹ ame ye, eriyin ẹnwẹn rẹ ohwo djẹ obo re ohwo epha phia.

²⁰Tẹ ushi tẹ erivwi evun vọn aye-en evun je sa vọn ẹro rẹ ohwo rẹ akpọ-ọ.

²¹Ẹvwẹrẹ a vwọ wran idọnọ, ẹkuerhanre kọye a vwọ wran ọrọ, eriyin ejiro rẹ ohwo e vwo brorhiẹ rọye.

²²Mu ẹkpa phihọ odo wọ vwẹ omodo duvwo vẹ eka kugbe, ughenghẹn na che no oma bẹdẹ-ẹ.

²³Nabọ vughe obo rẹ ekru rẹ igode wẹn epha, rere wọ nabọ vwẹ ẹro te uchuru wẹn.

²⁴Kidie efe sa tọn dede-e; erhu rẹ uvie sa dia rara?

²⁵Ọke rẹ odi da torhẹ nu, re odi ọkpokpo da dje rhe nu, a da rhe ghwẹ ẹbe rẹ ugbenu na ejobi koko nu,

²⁶imigode na ki che rhuo we, ẹvwe na keye wọ cha vwọ dẹ otọ;

²⁷ku wọ cha mrẹ ameivie rẹ ẹvwe buebu da, ku wọ mrẹ emuọre ke evwruwevwi wẹn ku wọ mrẹ obo wọ vwọ ghẹre emetẹ wẹn.