Read urhobo Isẹ 28 Bible Online

Isẹ 28 - urhobo bible

Isẹ 28

¹Orumwemwu de djẹ yẹ ohwo ọvuọvo vwọ tua-a, ẹkẹvuọvo udu rẹ ọvwata epha kokoroko kerẹ okpohrokpo.

²Otọ de fi ẹdjọ ihwo ri suo ki buebu, ẹkẹvuọvo ihwo ri vwo iroro vẹ erianriẹn da herọ kọ se muẹdia krekri.

³Ogbere rọ shenyẹ ogbere ọ họhọ okposio ro toro emu ghwọrọ-ọ.

⁴Ihwo ri gbẹ urhi eye ri jirẹ oruimwemwu, ẹkẹvuọvo ihwo re yọnrọn urhi eye nene otu rẹ iruimwemwu họnra.

⁵Ihwo ebrabra sa riẹn obo rẹ ọsoso epha-a, ẹkẹvuọvo otu re guọnọ Ọrovwohwo na riẹn otọ rọye gbagba.

⁶Ovwiogbere ro vwo evun ọfuanfọn yovwi nọ ọdafe ro vwo ekan.

⁷Ohwo rọ yọnrọn urhi ọye omamọ rẹ ọmọ rọ ghwanre; ẹkẹvuọvo ohwo rọ dia ọgbọre nẹrhẹ oma vua ọsẹ rọye.

⁸Ohwo rọ vwẹ igho emomo vẹ igho esuo vwo fe o koko ayen kẹ ohwo ro nẹ aruẹdọ kẹ ivwiogbere.

⁹Ohwo ro ku erhọn kufia kẹ urhi enyo, ẹrhovwo ẹnẹ dede kẹ ẹgua kẹ.

¹⁰Ohwo ro sun ohwo esiri ghwru che she phihọ ọgọdọ rẹ ọye ọvo tọnre; ẹkẹvuọvo ohwo rọ rease ka gharọ ughwẹ esiri.

¹¹Ọdafe da ghwanre kẹ omobọ rọye, ovwiogbere gheghẹn ro vwo ẹruọ kọ mrẹ otọ rọye.

¹²Siẹ rẹ ọvwata da kparobọ, oma kọ vwerha ihwo ejobi, ẹkẹvuọvo ohwo umwemwu de vrẹn, ihwo ki sioma rẹ ayen nẹ.

¹³Ohwo ro si ogbeku rọye nu che se yovwẹ-ẹ, ẹkẹvuọvo ohwo rọ rhọvwerọ ro de siobọ nẹ ayen cha mrẹ arodọvwẹ.

¹⁴Ebruba kẹ ohwo rọ djẹ ọshọ rẹ Ọrovwohwo kọke kọke; ẹkẹvuọvo ohwo rẹ udu rọye ganre che she ro okpetu.

¹⁵Kirobo rẹ okpohrokpo ro denu eyẹ edjẹnẹkpo rọ djọma epha, eriyin ohwo umwemwu ro suẹn ivwioghere epha.

¹⁶Osun ihwo ro vwo ọhọ-ọ ko shenyẹ ihwo brabra, ẹkẹvuọvo ọ rọ guọnọ efe rẹ eku re-e che sun krekri.

¹⁷Ohwo ro kru oghwa rẹ ọbara rẹ ohwo ọfa ghwa, gbe jọ dia osoghoro tẹ ẹdẹ ughwu rọye; e jẹ ohwo ọvuọvo cha uko-o.

¹⁸Esivwo herọ kẹ ohwo rọ yan vwẹ evuesiri, ẹkẹvuọvo ohwo rọ yan vwẹ idjerhe rẹ ọkọn che she phihọ ọgọdọ.

¹⁹Ohwo rọ nabọ voro udju rọye cha mrẹ emu ria buebu, ẹkẹvuọvo ọ rọ yan nene ihwo ri gbe ọghwia ọbẹvwẹ che hwe ayen.

²⁰Ohwo ro vwo esegbuyota che vwo ebruphihọ buebu, ẹkẹvuọvo ohwo rọ guọnọ efe rẹ okpakpa che fiabọ rẹ ehwe-e.

²¹Orhiẹn re bruru abọvo yọma-a; ẹkẹvuọvo a cha mrẹ ohwo rọ vwi fiki rẹ emuọre ru oruchọ.

²²Ọtokpẹn ri broma rẹ efe, yọ gbe rha riẹn nẹ akpọ cha bẹn vwẹ obọ-ọ.

²³Ohwo rọ ghwọ ku ohwo ọye cha mrẹ aruesiri vwẹ ukuko rọye nọ ohwo rọ vwẹ unu fefe jirẹ ohwo.

²⁴Ohwo ro cho ọsẹ eyẹ oni rọye ọ me ta nẹ, Ọyena dia umwemwu-u; ohwo tiọye na ugbeyan rẹ ohwo rọ guọghọ asan.

²⁵Ọvwurhuru sua ohọnre, ẹkẹvuọvo ohwo rọ vwẹ ẹro so Ọrovwohwo che fe buebu.

²⁶Ohwo rọ vwẹ ẹro so udu robọ rọye yẹ ẹkpa; ẹkẹvuọvo ohwo rọ vwẹ aghwanre yan ọye e che sivwi.

²⁷Akpọ sa hẹn ohwo ro ru ẹse kẹ ogbere-e, ẹkẹvuọvo ohwo ro ku aro rọye fia kẹ ogbere che vwo ekan buebu.

²⁸Siẹ rẹ ohwo umwemwu de vrẹn, ihwo ke djẹ sioma nẹ, ẹkẹvuọvo ayen de she, evwata ki buẹ phihọ.