Read urhobo Isẹ 3 Bible Online

Isẹ 3 - urhobo bible

Isẹ 3

¹Ọmọ mẹ, wo jẹn uyono mẹ chọrọ owẹ ẹro-o, ẹkẹvuọvo sẹro rẹ irhi mẹ vwẹ evun rẹ udu wẹn;

²kidie ẹdẹ o grogro kugbe ikpe buebu kugbe omavwerhovwẹ buebu kọye wo che vwo.

³Wo jẹ omaevwokpotọ vẹ urhi ẹyọnrọn kanre owẹ-ẹ; gba ayen mu ohọre wẹn, si ayen phihọ udu wẹn.

⁴Kọye wọ vwọ mrẹ ẹroesiri vẹ odẹ esiri reyọ vwe obọ rẹ Ọghẹnẹ vẹ obọ rẹ ohwo rẹ akpọ.

⁵Vwẹ udu wẹn ejobi vwọ kpahe Ọrovwohwo, wọ vwẹ ẹro suọ oma obọ wẹ-ẹn.

⁶Vwẹ idjerhe wẹn ejobi rhọvwọ; kọ cha kpọ idjerhe wẹn ejobi vi.

⁷Wo roro nẹ wẹ ọvo re ghwanre-e, djẹ oshọ rẹ Ọrovwohwo, rere wo jẹ umwemwu vwo;

⁸kọ cha dia esivwo kẹ uvwo rẹ oma wẹn, ọ me rha vwẹ oma ọkpokpọ kẹ ibeku wẹn ejobi.

⁹Vwẹ emu wọ vwori ejobi bru ọghọ phihọ Ọrovwohwo oma, eriyin ji te emamọ rẹ esosuọ rẹ okọn wẹn ejobi;

¹⁰erhu wẹn kọ cha vọn vẹ emu buebu, ichẹ wẹn ke cha vọn hwefia vẹ udi.

¹¹Ọmọ mẹ, wọ jẹ uchebro rẹ Ọrovwohwo na fia-a eyẹ wo jẹ ofu rẹ ẹghwọ rọye dje we-e;

¹²kidie ohwo rẹ Ọrovwohwo guọnọre ọye ọ ghwọ kuẹ, kirobo rẹ ọsọmọ ghwọ kuẹ ọmọ rẹ ivun rọye ma vwerhọ.

¹³Aghọghọ kẹ ohwo ro vwo aghwanre kugbe ohwo ro vwo ẹruo,

¹⁴kidie erere rọye rho nọ erere rọ hẹ evun rẹ idọnọ efuanfon erere rọye jẹ nọ oro.

¹⁵Ọ ghare nọ ivie o vwo emu ọvuọvo wo se vwo dje ẹguọnọ rọye-e.

¹⁶Otọvwe hẹ obọrhe rọye; obọhwere rọye efe vẹ ọghọ.

¹⁷Idjerhe rọye idjerhe rẹ omavwerhovwẹ, ada rọye ejobi vọnre vẹ ufuoma.

¹⁸Ọye urhe rẹ arhọ kẹ ihwo re djẹ gbanọ ejobi, e re gbanerọ gangan eye ihwo ri vwo aghọghọ rọde na!

¹⁹Aghwanre ọye Ọrovwohwo vwọ ma akpọ na; erianriẹn rọye ọ rha vwọ tọn irharheghe na phihọ,

²⁰vwẹ erianriẹn rọye ọye irhie na vwọ va phia, ọye irhọ vwo she nẹ enu rhe.

²¹Ọmọ me, yọnron omamọ rẹ aghwanre vẹ ọhọ; wo jẹn ayen ghworiẹ va wẹ abọ-ọ,

²²ke cha dia arhọ kẹ ẹnwẹn wẹn kugbe ovwarha ru wo gba họ ọhọre.

²³Ko wọ sa yan idjerhe wẹn ejobi vwẹ egbemọphẹ wọ gbe sa kprọ owọ wẹ-ẹn.

²⁴Wo de tidia, ọshọ rhe mu we-e, wo de rhe shevwerhẹ ku wọ vwerhẹ omamọ rẹ ovwerhẹ.

²⁵Wo jẹ oshọ rẹ uguegue rẹ ọrharhiri mu we-e, eyẹ ọke rẹ anegbe rẹ ẹghwọrọ rẹ ohwo umwemwu da teye owe-e;

²⁶kidie Ọrovwohwo wọ vwẹ ẹro wẹn so o gbi rhe jẹn ufi mu we-e.

²⁷Wọ vwẹ emu esiri djahe uko kẹ ohwo ro vi ri-i, siẹ rẹ ogangan na de rhe we ru wo vwo ruo.

²⁸Wọ ta kẹ ọrivẹ wẹn nẹ, yanran wo rhivwi rhe-e, odẹ me vwọ kẹ wẹ, yẹ emu na rhe we vwẹ etiyin.

²⁹Wọ je iroro rẹ umwemwu kpahe ọrivẹ wẹ-ẹn rọ dia kẹrẹ owẹ rọ vwẹ evun nẹ wẹ.

³⁰Wo nene ohwo ghwọ ghevweghe-e, yo ru we emuọvo-o.

³¹Wọ vwẹ ẹro kere ohwo rọ djoma-a, wọ nene idjerhe rọye ọvuọvo-o;

³²kidie ohwo ọchọchọ ẹgua kẹ Ọrovwohwo, ẹkẹvuọvo ọ vwẹ ẹro sua ohwo rọ dia ọvwata.

³³Ekan rẹ Ọrovwohwo ọ hẹ enu rẹ uwevwi rẹ oruimwemwu na, ẹkẹvuọvo o bruphihọ kẹ ẹdia rẹ ọvwata.

³⁴Otu re jẹ ọjẹfia ọ je ghwa je ayen fia, ẹkẹvuọvo ọ vwẹ ẹroesiri ni ohwo rọ vwẹ oma kpotọ.

³⁵Ọvwẹghwanre cha re uku rẹ ọghọ, ẹkẹvuọvo ẹkpa kẹ uku rẹ ophọphọvwe.