Read urhobo Isẹ 8 Bible Online

Isẹ 8 - urhobo bible

Isẹ 8

¹Ọ diane aghwanre ri se na, ọ dia ẹruọ ri bunu na?

²Vwẹ enu rẹ ugbenu vwẹ akakọ rẹ idjerhe na, vwẹ oma rẹ obẹnẹ o de mudia.

³Vwẹ ughere vwẹ obaro rẹ orho na ejobi, vwẹ anurhoro vwẹ oma rẹ ẹchẹ etiyin o de bunu,

⁴Ovwan, E ihwo, ọye mi ro se na, fiki rẹ emọ rẹ ihwo rẹ akpọ mi vwo bunu na.

⁵E ihwo ughenghẹn na, we yono aghwanre ovwan, E ẹkpa rẹ ihwo na, wa kerhọn.

⁶We nyo, kidie eta ride mi cha ta na, obo ri shephihọ ọvo ri che nẹ unu mẹ rhe:

⁷kidie uyota ri che nẹ unu mẹ rhe, Oruimwemwu ẹgua vwọ kẹ ẹbẹrunu.

⁸Eta rẹ unu mẹ ejobi eta esiri; egbẹlẹkẹ vẹ eta echọchọ e hẹ aye-en.

⁹Ayen ejobi eta ọsoso kẹ ohwo ro vwo ẹruọ, iki rhe shehọ kẹ ohwo rọ mrẹ erianriẹn vughe.

¹⁰Reyọ uyono mẹ wo gbobọnyẹ idọnọ, erianriẹn vwọ nọ ọrọ ro me yovwi,

¹¹kidie aghwanre yovwi nọ irhu, emu kemu rẹ ihwo guọnọ na ejobi re se vwo dje ọ herọ-ọ.

¹²Mẹvwẹ, rẹ aghwanre, evun rẹ iroro me dia, me ke rha mrẹ erianriẹn vẹ ọhọ vughe.

¹³Omaetuo rẹ umwemwu ọye oshọ ẹdjẹ kẹ Ọrovwohwo na. Eheri vẹ eyan kugbe idjerhe rẹ umiovwo vẹ eta gẹgẹrẹ tu vwe oma.

¹⁴Mi vwo uchebro vẹ omamọ rẹ aghwanre, mi vwo erianriẹn rẹ emu ikokodo, mi ji vwo ogangan.

¹⁵Ogangan mẹ ọye ivie vwo suẹn, ọye isun na vwo ji urhi rẹ ọsoso.

¹⁶Ogangan mẹ ọye isun vwo suẹn, ọye ihwo ride na vwo sun akpọ na.

¹⁷Me guọnọ ihwo re guọnọ ovwẹ, ihwo re vwẹ oma kpotọ guọnọ ovwẹ ke mrẹ vwẹ.

¹⁸Efe vẹ ọghọ rhe vwe, efe rẹ ọtọn vẹ oyovwe ọ hẹ obọ mẹ.

¹⁹Omamọ mẹ yovwi nọ oro, ọ tobọ yovwi nọ omamọ rẹ oro, emamọ mẹ yoma nọ omamọ rẹ idọnọ efuanfọn.

²⁰Me yan vwẹ idjerhe rẹ ọvwata, vwẹ idjerhe rẹ ọsoso,

²¹mi bono efe kẹ ihwo re guọnọ ovwẹ, me me ghwẹ ekpo rayen vọn.

²²Vwẹ ẹtuọhọ rẹ emama rẹ Ọrovwohwo na ọye ọ vwọ ma vwẹ, mẹvwẹ iruo rẹ ẹsosuọ rọ ruru vwẹ ọke rẹ avwanre.

²³Ọke rẹ awanre rhe o vwo mu vwe vi, ẹsosuọ, tavwe ra ke mama akpọ na.

²⁴Ọke rẹ ikokodo na je dia-a ye me herọ nure, ya je mrẹ ogbugbu rẹ ame djẹ nẹ cha-a.

²⁵Tavwe ra ke ma igbenu ride vẹ itete na ejobi, ye vwiẹ vwẹ nure;

²⁶tavwe rọ ke rhe ma otọ vẹ aghwa ejobi, eyẹ tobọ ibiekpẹn rẹ ẹsosuọ rẹ otọ rẹ akpọ na.

²⁷Ọke rọ vwọ ma obo odjuvwu na, ye me hẹ etiyin, ọke rọ vwọ si usi riariẹ enu rẹ abadi na.

²⁸Ọke rọ vwọ gba irharheghe na mu kokoroko, rọ vwọ teye umukpe rẹ abadi na mu.

²⁹Ọke ro vwo gberi ughwru kẹ abadi na, rere ame na vwo jẹ urhi rọye ẹchọ, kugbe ọke rẹ ọye ọvo vwọ tọn uchivwo rẹ akpọ na phihọ,

³⁰yi mi mudia kẹrẹ, kerẹ onotu rẹ ọwena; mẹvwẹ kọye omavwerhovwẹ rọye kẹdẹ kẹdẹ, rọ ghọghọ vwẹ obaro rọye kọke kọke.

³¹Fiki rẹ akpọ rọ mare nẹ adia na kugbe fiki rẹ emọ rẹ ihwo re akpọ na.

³²Asakiephana, emọ mẹ, kerhọn mẹ, aghọghọ kẹ ihwo ri nene idjerhe mẹ.

³³Nyo uyono rere wọ ghwanre, wo no saka-a.

³⁴Aghọghọ kẹ ohwo rọ kerhọn mẹ, rọ rhẹrẹ vwẹ anurhoro mẹ kẹdẹ kẹdẹ, rọ hẹrhẹ vwẹ oma rẹ ẹchẹ mẹ.

³⁵Kidie ohwo rọ mrẹ vwẹ yọ mrẹ arhọ, kọ mrẹ aroesiri reyọ miẹ Ọrovwohwo na.

³⁶Ẹkẹvuọvo ohwo re me vabọ yọ wa omobọ rọye oma; ihwo ri tuoma mẹ ejobi ye ughwu eguọnọ.