Read urhobo Aghwoghwo 4 Bible Online

Aghwoghwo 4 - urhobo bible

Aghwoghwo 4

¹Me da rhoma rhe mrẹ vwẹ otọ rẹ ọnre na uruemu rẹ oshenyẹ buebu rọ herọ. Gbe nighe, ame oviẹ buebu rẹ ihwo re shenyẹ na, ayen rhe vwo ohwo ọvuọvo ro bru ayen uche-e! Abọ rẹ otu ri shenyẹ ayen na, oboyi ogangan epha, o rhe vwo ohwo ọvuọvo ro bru ayen uche-e.

²Mi de rhi roro mrẹ nẹ ihwo ri ghwu nure ri me yovwerhi nọ ihwo ekpokpọ re hẹ akpọ;

³ẹkẹvuọvo ọ ro me yovwi nọ ivẹ na kẹ ohwo re ji vwiẹ-ẹ rọ vwẹ ẹro mrẹ uruemu omiomiovwi re ruẹ vwẹ otọ rẹ ọnre na-a.

⁴Etiyin me da mrẹ nẹ owian vẹ ona vwẹ iruo, omẹriọ ra ria kpahe ọrivẹ rẹ ohwo o nẹcha. Ọnana rhe je hẹ odiodi kugbe odju re nene họnra.

⁵Ekpa na ghwẹ abọ rẹroma, uvwo rẹ oma rọye kọye ọ ria.

⁶Oyovwi kẹ obọ ọvo rọ vọnre vẹ ufuoma nọ abọ ivẹ re vọnre vẹ owian vẹ odju re nene họnra.

⁷Emu diodi, me rhoma mrẹ vwẹ otọ rẹ ọnre na;

⁸ohwo ro vwo ohwo-o, o vwo ọmọshare-e eyẹ oniọvo rẹ ọshare-e, yo siẹgba rẹ owian, yẹ efe ro vwori da ẹro-o, o rha nọ oma rọye nẹ, kono mi vwi fiki rọye wian owian nana rọ djẹ vwẹ omavwerhovwẹ e vwo na? Ọnana je hẹ odiodi vẹ iruo rẹ omaẹlaghọ.

⁹Emu ivẹ yovwi nọ ọvo, kidie ayen vwo erere oyoyovwi ọvo vwẹ owian rayen.

¹⁰Kidie ọvo rẹ ayen de she, ọrivẹ kọ kparọ vrẹn; ẹkẹvuọvo ekan kẹ ohwo rẹ ọye ọvo yan usun ọke ro de she o rhe vwo ọrivẹ rọ kpaherọ vrẹ-ẹn.

¹¹Ọfa rọye, ihwo ivẹ de shevwerhẹ kugbe, kẹ ayen rhorha mu ohwohwo; ẹkẹvuọvo mavọ ohwo ọvo vwọ rhorho mu oma rọye ọvo?

¹²Ohwo ọvo da rhe họnre ohwo ọfa ọrivẹ rọye kọ chochọ kẹ. Ogẹ rẹ oruru erha fobọ vwrẹ-ẹ.

¹³Ogbere rẹ emeghene rọ ghwanre yovwi nọ ọmare rẹ ovie ro gheghẹ rọ reyọ uche bro-o,

¹⁴owenẹ e siro nẹ uwodi rẹ ogbere re vwiẹrẹ phihọ na kpo enu rẹ ekete rẹ uvie rẹ obọ rọye.

¹⁵Me mrẹ ihwo rẹ akpọ re yancha yankpo vwẹ otọ rẹ ọnre na, kerẹ emeghene yena, ro mudia phihọ ẹdia rọye;

¹⁶o vwo oba kẹ ihwo na ejobi-i; ọ hẹ enu rayen ejobi nure. Yẹ otu re rhere vwẹ ukuko na mrẹ aghọghọ vwẹ oma rọye-e. Uyota ọnana rhe je hẹ odiodi kugbe odju re nene họnra.