Read urhobo Aghwoghwo 5 Bible Online

Aghwoghwo 5 - urhobo bible

Aghwoghwo 5

¹Sẹro rẹ owotọ wẹn vwẹ ọke wo de kpo uwevwi rẹ Ọghẹnẹ; re vwo sikẹre vwọ kerhọn yovwi nọ izobo rẹ ẹkpa, kidie ayen riẹnre nẹ emu omiomiovwi ayen ruẹ-ẹ.

²Wọ ta ota gbaegbae-e, eyẹ wo jẹ udu wẹn bru okpakpa ta ota vwẹ obaro rẹ Ọghẹnẹ-ẹ, kidie odjuvwu Ọghẹnẹ epha, akpọ na kọye wo rha epha; eriyin na jẹ eta wẹ dia krẹn.

³Kidie iruo buebu re ghwa evwerhe cha, ẹkpa vẹ upho rẹ eta buebu.

⁴Wo de ve ive kẹ Ọghẹnẹ, wo gbe eghẹrẹ wọ ke hwa-a; kidie o vwo omavwerhovwẹ kpahe ẹkpa-a. Hwa osa rẹ emu wo veri.

⁵Ofori wo vwo je ive eve nọ ru wo de ve nu wo hwa rọ-ọ.

⁶Wo jẹn unu wẹn sun we ru umwemwu-u, wọ ta vwẹ obaro rẹ ọyinkọn nẹ ọye na oruchọ-ọ; die sorọ rẹ Ọghẹnẹ vwo mu ophu kpahe urhuru wẹn rere ọ vwọ guọghọ iruo rẹ abọ wẹn?

⁷Kidie evwerhẹ de buẹ, eta ifefe ki buẹ phihọ ẹkẹvuọvo djẹ ọsho rẹ Ọghẹnẹ.

⁸Ọ da dianẹ wọ mrẹ ubrakpọ re de shenyẹ ivwiogbere na ra da kpare ọvwata vẹ ọsoso kuẹfia, wo jo gbe we unu-u; kidie oruiruo ro kpenu ji vwo ọfa ro kpenu nọ rọ rhẹrẹ, efa re je rhonọ eyena je hẹ enu rẹ ayen.

⁹Ẹkẹvuọvo vwẹ evun rọye ejobi, ovie vwẹ ẹkẹ vwẹ udju re voro phihọ otọ na.

¹⁰Ohwo rọ guọnọ igho, igho sa daro-o; eyẹ ohwo rọ guọnọ efe, erere je daro rhe-e; ọnana je hẹ odiodi rhe.

¹¹Eyere de buẹ, o bue vwọ ke ayen otu re riọ; didi erere te ohwo ro vwo ayen, ọ dianẹ ẹro ọ de vwọ mrẹ ayen?

¹²Ovwerhẹ rẹ ọgbowian miẹmiẹ, owenẹ ọ re emu bu eyẹ ọ re bu-u; ẹkẹvuọvo efe obuebu ja mrẹ ovwerhẹ vwerhẹ-ẹ.

¹³Emu omiomiovwi ọvo herọ re me mrẹre vwẹ otọ rẹ ọnre na: ọdafe sẹro rẹ efe vwọ guọghọ oma rọye,

¹⁴efe yena mi rhi ghwru vwi idjerhe omiomiovwi; yo vwo ọmọshare ọvo, ẹkẹvuọvo emu ọvuọvo rhere vwẹ obọ-ọ.

¹⁵Kirobo ro nẹ evun rẹ oni rọye rhe eriyin o che ji rhivwi kpo ẹbẹba ọ vwọ rhe, ọ cha vwẹ obọ rọye ghwa emu ọvuọvo rọ owianre na kpo-o.

¹⁶Ọnana je vwẹ emu omiomiovwi rhe: obo rọ rhere ọtiọye o ji kpo; didi erere ohwo rọ lagha oma wian kẹ odju na mrẹre,

¹⁷rọ ghwọrọ ẹdẹ rẹ akpọ rọye ejobi vwẹ evun rẹ ebri vẹ ọdjorho, vwẹ evun rẹ ivuemiovwo rode kugbe emiavwe vẹ ophu?

¹⁸Nighe, obo me mrẹre nẹ oyovwiri nẹ o fori rere a re rere a da rere e vwo omavwerhovwẹ vwẹ owian na ejobi rẹ ohwo wianre vwẹ uchẹ ẹdẹ rẹ Ọghẹnẹ vwọ kẹ vwẹ otọ rẹ ọnre na, kidie ọnana ẹkẹn ro tere.

¹⁹Ohwo kohwo rẹ Ọghẹne vwẹ efe kẹ, o de ji vwo ogangan rọ vwọ ghọghọ vwẹ evun rọye, jẹ oma vwerhọ fiki rẹ erere rẹ owian rọye; ọnana okẹ rẹ Ọghẹnẹ.

²⁰Kidie ọ rha sa karohọ ẹdẹ rẹ akpọ eyere rọye-e fikiridie Ọghẹnẹ ghwẹ aghọghọ vọn udu rọye.