Read urhobo Aghwoghwo 9 Bible Online

Aghwoghwo 9 - urhobo bible

Aghwoghwo 9

¹Ẹkẹvuọvo enana ejobi me phi phihọ udu me da davwẹ emu ejobi ni, obo rẹ ọvwata vẹ ọvwaghwanre vẹ iruo rayen hẹ obọ rẹ Ọghẹnẹ; owenẹ ọ dia ẹguọnọ eyẹ ometuo ohwo sa riẹ-ẹn. Kemu kemu re hẹ obaro rẹ ayen odiodi o ruẹ,

²rọ vwọ dia urhiẹvwe ọvuọvo na ri bru ayen cha na, ọvwata vẹ oruimwemwu, emuesiri vẹ umiovwo, ẹfuọn vẹ ijẹfuọn, o zizobo vẹ ọ ro jẹ izobo eze. Kirobo rọ epha kẹ ohwo esiri, ọtiọye ọ je epha kẹ oruimwemwu; kirobo rọ epha kẹ ohwo ro duvwi iyori eriyin ọ je epha kẹ ohwo ro jẹ iyori e duvwo.

³Ọnana ọye umiovwo rọ evun rẹ emu ejobi re ruẹ vwẹ otọ rẹ ọnre na, nẹ urhiẹvwe ọvuọvo na ri nene emu na ejobi; udu rẹ ihwo na vọnre vẹ umiovwo, nẹ orhuẹ vọn evun rẹ udu rayen vwẹ ọke rẹ ayen vwọ hẹ akpọ na, ọyena da wan nu ayen ki ghwu.

⁴Ẹkẹvuọvo ohwo ro kuoma kugbe ihwo ekpokpọ ọye ri vwo iphiẹrohọ, kidie eranko ọkpokpọ yovwi nọ okpohrokpo ro ghwuru.

⁵Kidie ihwo ekpokpọ riẹnre nẹ ayen che ghwu, ẹkẹvuọvo ihwo ri ghwuru riẹn emu ọvuọvo-o, ayen rhe vwo osa-a, ẹkẹvuọvo ẹkarophihọ rẹ ayen ghwruru.

⁶Ẹguọnọ rayen vẹ ometuo rayen vẹ omẹriọ rayen ghwọrọ kufia nure, ayen rhe vwo obọ vwẹ emu re ruẹ vwẹ otọ rẹ ọnre na ọfa-a.

⁷Yanran, ra re ikara wẹn vẹ aghọghọ, rere wọ da udi wẹn vẹ omavwerhvwẹ vwẹ udu, kidie Ọghẹnẹ phi obọ phihọ obo wo ruru.

⁸Jẹn iwun wẹn ejobi dia fuanfọn kọke kọke; wo jẹn ori kare uyovwi wẹ-ẹn.

⁹Wọ vẹ aye wọ guọnọre ghọghọ kugbe, vwẹ ẹdẹ wẹn ejobi vwẹ otọ rẹ ọnre na, fikiridie ọye ẹkẹn rẹ akpọ ro te we vwẹ evun rẹ owian ru wọ wianre vwẹ otọ rẹ ọnre na.

¹⁰Kemu kemu rẹ obọ wẹn se ru, vwẹ ogangan wẹn ruo; kidie ushi wọ cha ra na, o vwo iruo-o, eyẹ iroro-o eyẹ erianriẹ-ẹn eyẹ aghwanre-e.

¹¹Me da rhoma mrẹ vwẹ otọ rẹ ọnre na nẹ onẹdjẹ na dia ọ rẹ otu ri bro okpakpa-a, eyẹrẹ ofovwi na dia ọ rọ ma goma-a, eyẹrẹ ikara na dia ọ rọ ọvwaghwanre-e, eyẹrẹ efe na dia ọ rẹ ohwo ro me vwo ẹruọ-ọ eyẹrẹ ọghọ dia ọ rẹ ohwo ro ruona-a; ẹkẹvuọvo ọke vẹ uphẹ di bru ayen ejobi cha.

¹²Kidie ohwo riẹn ọke rọye-e. Ọ họhọ iyeri rẹ ariri muru, kerẹ emephran rẹ ufi muru, ọtiọye ẹdẹ umwemwu na je epha kerẹ ufi kẹ emọ rẹ ihwo, ro di fru ayen kpregede.

¹³Me je mrẹ oka rẹ aghwanre nana vwẹ otọ rẹ ọnre na, o da dia okpemu rode kẹ vwẹ.

¹⁴Omorere ọvo herọ rẹ ihwo tutuno dia; etiyin ovie rode ọvo da rhe, rhe vwọ suọ, ọ da gba ohẹrhẹ rhuarho riariẹ.

¹⁵Ẹkẹvuọvo ovwiogbere ọvo vẹ aghwanre da hẹ evun rọye, ọ da vwẹ aghwanre rọye sivwi orere na rhọ. Yẹ ohwo ọvuọvo karohọ ọshare na-a.

¹⁶Ẹkẹvuọvo me tare nẹ aghwanre yovwi nọ ẹgba owenẹ a jẹ aghwanre rẹ ogbere na fia, ra davwerhọn rẹ eta rọye-e.

¹⁷Eta vwiọrọvwiọrọ rẹ ọvwaghwanre nyori yovwi nọ ovan rẹ osun vwẹ uherevie rẹ ẹkpa.

¹⁸Aghwanre yovwi nọ ekuakua rẹ ofovwi, ẹkẹvuọvo oruimwemwu ọvo guọghọ emu esiri buebu.