Read urhobo Solomon 2 Bible Online

Solomon 2 - urhobo bible

Solomon 2

¹Mẹvwẹ ododo ri Sharọn, ododo rọ hẹ evun rẹ iyara.

²Kerẹ ododo rọ he ohri rẹ inwe otiọyo ọnse mẹ epha vwẹ ohri rẹ emetẹ na

³Kerẹ omamọ rẹ orhomrẹ vwẹ ohri rẹ irhe, ọtiọye ọnse mẹ epha vwẹ ohri rẹ imighene Omavwerhe rode mi vwo tidia vwẹ ophie rọye, omamọ rọye kọ miẹmiẹ ovwẹ nẹghẹ nẹghẹ.

⁴O de se vwe kpo asan ra da ria emu, aphiana ro vwọ tan enu mẹ kẹ ẹguọnọ.

⁵Vwẹ ukokodia rẹ ọkame vwọ ghẹre ovwẹ, vwẹ omamọ re orhomrẹ kẹ vwẹ re; kidie urhuru rẹ ọnse mẹ sivwe.

⁶E mane ka vwẹ obọhwẹre rọye cha vwẹ uyovwi vwonẹ rẹ obọrhe rọye da gbane ovwẹ.

⁷Ju vwe riẹn E emetẹ ri Jerusalẹm, mẹvwẹ orhua rẹ aghwa rọ vẹ awọ godogbo vwọ djẹ nẹ oma bru we ọjẹjẹ-ẹ bẹsiẹ rẹ urhuru rọye vwo si we.

⁸Urhuru rẹ ọnse mẹ! Nighe, ọ yan cha, o re pho kraekrae vwẹ obenu rẹ ugbenu, ọ ra rhan wan igbenu rẹ itete na.

⁹Ọnse mẹ ro je vwe na họhọ orhua, eyẹ kerẹ upene rẹ uguzuma. Nighe, o mudia vwẹ oboyi vwẹ obuko rẹ igbẹhẹ rẹ avwanre Ọ rọ wan evakpo na nẹ uwevwi, ọ rọ wan iphrophro na nẹ uwevwi.

¹⁰Ọnse mẹ ro je vwe ra tare, ọ vuẹ vwẹ: Vrẹn, ọnse mẹ ro je vwe na, Yanrhe ra yanran.

¹¹Kidie ohwahwa na ghwiẹre, osio na kare tototo re.

¹²Idodo re yoro nẹ otọ cha, ọke rẹ inẹsuọ tere, urhuru rẹ erurẹ kọye enyo vwẹ otọ re avwanre.

¹³Urhe rẹ owe ghwẹ phihọ re, Ivain ra kpa ipho; i re gbo ọnrhe phanphan. Vrẹn, ọnse mẹ ro je vwe na, Yanrhe ra yanran.

¹⁴E ilekuku mẹ, rọ egbogho rẹ oragha, rọ evun rẹ egadega rọ ugbenu na, ju vwe mrẹ opharo wẹn, ju vwe nyo urhuru wẹn, kidie urhuru wẹn miẹmiẹ, opharo wẹn vwerhe.

¹⁵Mu irhiranko kẹ avwanre, emọ rẹ urhiranko, re rhaphiẹ ogba ri vain, kidie ogba ri vain rẹ avwanre kpa ipho re.

¹⁶Ọnse mẹ na ọmẹ oruẹ mẹvwẹ je vwẹ ọrọye, o ro suẹn igodẹ rọye vwẹ ohri re idodo na.

¹⁷Bẹsiẹ rẹ ọke vwọ she rẹ uhoho vwọ djẹ, rhoma, ọnse mẹ rọ je vwe, gba họhọ orhua, eyẹ upene rẹ uguzuma rọ he egadega rẹ ugbenu.