Read urhobo Aizaya 11 Bible Online

Aizaya 11 - urhobo bible

Aizaya 11

¹Ẹro ko che yoro nẹ uchuku ri Jessi rhe, oghọn kọ cha tan nẹ esiri rọye rhe.

²Erhi rẹ Ọrovwohwo kọ cha rhan muo, erhi rẹ ẹghwanre vẹ ẹruọ; erhi rẹ iroro vẹ ẹgba, erhi rẹ erianriẹn vẹ oshọ ẹdjẹ rẹ Ọrovwohwo

³Ẹguọnọ rọye kẹ evun rẹ oshọ ẹdjẹ rẹ Ọrovwohwo ọ dia O dia obo rẹ ẹro rọye mrẹre o che ni vwo guẹdjọ-ọ eyẹ ọ cha vwẹ obo ro nyori brorhiẹ-ẹ,

⁴ẹkẹvuọvo ọvwata o vwo guẹdjọ rẹ ivwiogbere, o Me vwẹ ẹghwanre brorhiẹ rẹ ihwo dẹndẹn rẹ akpọ na, kọ cha vwẹ ọkpọ rẹ unu rọye ghwie akpọ na, ẹnwẹn rẹ unu rọye ọ vwọ hwẹ iruimwemwu

⁵Ọvwata kọye cha dia umuamwa ro vwo mu ehun, esegbuyota kọye dia umuamwa ro vwo fiẹbe,

⁶Okpohrokpo vẹ omogodẹ ke cha dia kugbe, ẹdjẹnẹkpo vẹ ẹmẹvwe ki rhuẹn vwẹ asan ọvo, te ọmọ rẹ erhuẹn vẹ ubido kugbe oghwara ke yan usun, omotete kọye che sun ayen.

⁷Erhuẹn vẹ okorhi ke re emu kugbe, emọ rayen ki rhuẹn vwẹ asan ọvo, udibo ko cha re egbri kẹre erhuẹn.

⁸Ọmọ ro vievie kọ heha vwẹ unu rẹ ọrobiebi, ọ ro brevie nure kọ ghwa obọ kpahe unu rẹ ọvwerhotọ

⁹Ayen cha wan ohwohwo oma-a vwe ugbenu ọfuanfon mẹ-ẹ; kidie akpọ na cha vọn vẹ erianriẹn rẹ Ọrovwohwo kirobo rẹ ame vọn urhie na.

¹⁰Vwẹ ẹdẹ yena owọ ri Jessi na ko che mudia pọe kerẹ oka vwọ kẹ ihwo na; ọye irere na cha guọnọ, ẹdia rọye kọ mu urinrin.

¹¹Vwẹ edẹ yena Ọrovwohwo kọ cha riẹn obọ rọye vwẹ obọ rivẹ rhe vwọ ghwẹ umuku rẹ ihwo rọye ri chekọ, nẹ Asiria rhe, nẹ Ijipt, nẹ Patios, nẹ Itiopia, nẹ Elam, nẹ Shinar, nẹ Hamat, kugbe irere re hẹ obo oma rẹ urhie.

¹²Kọ kpare aphiana kpenu kẹ irere na, ko si ihwo rẹ Izrẹl ra djẹ kufia koko, ihwo ri Juda re hrare ko bi koko nẹ igogo ẹne rẹ akpọ na rhe.

¹³Omẹriọ rẹ Ifrem kọ bioma, ihwo ri kpokpo Juda ke bru ayen kufia, Ifrem gbe rioma kpahe Juda ọfa-a.

¹⁴Ẹkẹvuọvo kẹ ayen che pho mu igabọ ri Filistia ri obuko ọnre, kẹ ayen kuomagbe ra kua ihwo ri obaro ọnre. Ke ayen riẹn obọ vwọ so Idọm kugbe Moab ihwo rẹ Ammọn ki mu ọghọ kẹ ayen.

¹⁵Ọrovwohwo kọ cha guọghọ ẹrenvwe rẹ urhie rẹ Ijipt tototo; ko kpogho obọ phihọ enu rẹ Abadi rẹ Ijipt Vẹ odju ọtotorhẹ rọye o me gharọ kpo abada ighwrẹ rẹ ihwo mrasan wan otọ ọyaya vrẹn.

¹⁶Idjerhe rode kọ cha wan nẹ Asiria rhe vwọ kẹ umuku rẹ ihwo rọye ri chekọ, kirobo rọ epha kẹ Izrẹl ọke rẹ ayen vwo nẹ otọ rẹ Ijipt cha.