Read urhobo Aizaya 13 Bible Online

Aizaya 13 - urhobo bible

Aizaya 13

¹Aroẹmrẹ rẹ Aizaya rẹ ọmọ rẹ Amọz mrẹ kpahe Babilọn

²Vwẹ enu rẹ ugbenu phrẹphrẹphrẹ na dje ọka, kperi phia wọ ta kẹ ayen, kpogho obọ kẹ ayen re ro anurhoro rẹ ikpihwo na.

³Ekpuyovwi mẹ ji urhi kẹ ihwo efuanfon mẹ nure, mi se egba mẹ nẹ e ra reihri rẹ ophu mẹ, ihwo mẹ ri herẹ mu oma kpenu na.

⁴Kerhọn, edo mu vwẹ enu rẹ igbenu na kerẹ edo rẹ urogho! Kerhọn, edo rẹ uvie ọ rẹ ẹgborho ri bi koko! Ọrovwohwo rẹ otuofovwi ro biẹ otuofovwi koko ri kpo ofovwi.

⁵Ayen re nẹ ogboko cha, nẹ oba rẹ odjuvwu cha, Ọrovwohwo vẹ ekuakua rẹ ophu rọye, re ọ rhe vwọ ghwọrọ akpọ ejobi.

⁶Beroma, kidie ẹdẹ rẹ Ọrovwohwo na kẹrire, kerẹ ẹghwọrọ ro nẹ obọ rẹ Ọrovwoẹgba rhe eriyin ọ cha rhe!

⁷Eriyin na abọ na ejobi ke dia ghwrọghọ, udu ri kohwo kohwo kọ wran,

⁸ofu ko dje ayen. Obi vẹ odjadja ko fru ayen, ke mrẹ odjadja kerẹ aye rọ chuẹ uvwiẹ. Kẹ ayen rhienu phihọ ni ohwohwo, opharo rayen ki mu la.

⁹Nighere, ẹdẹ rẹ Ọrovwohwo cha, brabra vẹ ophu kugbe ivuemiovwo rode, rọ cha nẹrhẹ akpọ na ejobi kua rọ guọghọ iruimwemwu rọye no.

¹⁰Kidie isio rẹ obo odjuvwu veẹ ọghwẹgbe rayen gbe cha vwẹ orẹmrẹ rayẹn phia-a; ọnre rọ vacha na ko che bi, emeranvwe na gbi che lo-o.

¹¹Ki mi hwe akpọ na fiki rẹ umiovwo rọye, oruimwemwu fiki rẹ orukuruku rọye; ki mi ru eheri rẹ ohwo ro phuoma vwo oba, ọkon rẹ ohwo ro shuẹ akpọ ko fue.

¹²Ihwo ke cha kanrẹ nọ uvi rẹ oro, ihwo ki kanre nọ oro rẹ Ọfa.

¹³Eriyin na ki mi che mu odjuvwu kpogho, akpọ na ko che kpogho nẹ ẹdia rọye, vwe ophu rẹ Ọrovwohwo rẹ ofovwi na vwẹ ẹdẹ rẹ ophu rode rọye na.

¹⁴Kerẹ eranvwe rẹ egba ra vwọ djẹ aghwa, eyẹ kerẹ igodẹ ra mrẹ ohwo ghwẹ ayen koko-o, dohwo dihwo rọye ki che rhivwi bru ra, dohwo dotọ rọye kọ cha djẹ ra.

¹⁵Kohwo kohwo ra mrẹre ke duvwo fi, kohwo kohwo re muru ka vwẹ ọlọkọ nyanvwọ brotọ.

¹⁶Emọboba na ka vwẹ ayen fa otọ hwe vwẹ irharo rayen; ke gborho uwevwi rayen ka gba eya rayen du.

¹⁷Nighere, me cha nẹrhẹ ihwo ri Mid vwọ so ayen, ihwo ri se idọnọ gbe emuọvo-o oma rẹ oro je vwerha aye-en.

¹⁸Umurhabo rayen cha sa imighene hwe; ayen vwo arodọvwẹ kẹ emamọ rẹ evu-un, ẹro rayen ria ehrọre kẹ imitete-e.

¹⁹Babilọn, rẹ urinrin re uvie ejobi na, udindin vẹ eheri rẹ ihwo ri Kaldia, ko cha họhọ Sọdọm vi Gomorrah vwẹ ọke rẹ Ọghẹnẹ vwọ guọghọ ayen.

²⁰A gbe sa vwọ reuku bẹdẹ-ẹ eyẹ e gbi yere vwẹ uvwiẹ na bẹdẹ-ẹ, ohwo rẹ Arebia ọvuọvo gbe sa bọn utughẹ phihọ-ọ ọsuigodẹ ọvuọvo sa vwẹ igodẹ rọye sherhe otọ vwẹ ẹtiyi-i.

²¹Ẹkẹvuọvo eranvwe re djoma ke cha etiyin, iwevwi rayen ejobi ke vọn vẹ eranvwe re guan; etiyin kọye igomugoro cha dia, etiyin ekanamudo de che gbe cha.

²²Ẹrha ki che kperi vwẹ uwevwi rẹ ẹhẹrhẹ rọye ehwa ke cha gọnọ vwẹ ighe esiri rayen; ọke rọye si kerire edẹ rọye gbi che kri-i.