Read urhobo Aizaya 17 Bible Online

Aizaya 17 - urhobo bible

Aizaya 17

¹Aruẹmrẹ ra mrẹ kpahe Damaskọs. Nighere, Damaskọs gbe cha dia orere-e, ko che hirhe vwọ ẹko rẹ erhurhu.

²Ka kua nẹ irere rọye bẹdẹ; ke cha dia ẹdia rẹ igodẹ, ri che sherhẹ te otọ, ohwo ọvuọvo gbe djẹ oshọ mu aye-en.

³Asan odjahọ ko nẹ Ifrem, uvie na ko nẹ Damaskọs; umuku ri Syria kọ cha dia kerẹ urinrin rẹ emọ rẹ Izrẹl, eriyin Ọrovwohwo rẹ otuofovwi na tarẹ.

⁴Vwẹ ẹdẹ yena ka cha vwẹ urinrin ri Jekọp hwa otọ, ivwri rẹ uvwo rọye ki che si dọn.

⁵Ke cha họhọ ọke rẹ ọkọreka da kọrọ eka ri mudia ra da ghwẹ ayen koko eghwabọ rọyen, kerẹ ẹsiẹn rẹ ohwo a da kọrọ eka vwẹ Iyara ri Rifaim.

⁶Ka kọrọ ẹvo chekọ vwọ, kere ẹsiẹn ra da gbẹrhiẹn urhe rẹ oliv eduru ivẹ eyẹ erha mi rhi chekọ vwẹ obi Irharheghe, ẹne eyẹ iyori vwẹ eghọn rẹ urhe rọ mọ na, eriyin Ọrovwohwo Ọghẹnẹ rẹ Izrẹl tare.

⁷Vwẹ ẹdẹ yena ihwo i che se Ọrọma ayen gbe ohwo, kẹ ayen cha rọ ẹro vi Ọfuanfọn Ọvuọvo rẹ Izrẹl na;

⁸ayen gbi che se agbada rẹ izobo gbe emu-u, iruo rẹ obọ rayen, ayen gbi che ni obo rẹ obọ rayen ruru-u, ọ dia ighriki eye agbada rẹ egẹ-ẹn.

⁹Vwẹ ẹdẹ yena irere rayen rẹ egangan ejobi ka cha kua nẹ ayen kerẹ asan ra kua nu vwi Hiv eyẹ Amọr, re ayen kua nu fiki rẹ emọ rẹ Izrẹl, asan na kọ dia ofefe.

¹⁰Kidie Ọghẹnẹ rẹ esivwo wẹn chọrọ owẹ ẹro, wo gbe karohọ Oragha rẹ odjahọ wẹ-ẹn; ọtiọye na owene wọ kọn ekankọn esiri, wo de mu ẹdjọ ọrhorha phihọ,

¹¹wo de se ru ayen djẹ vwẹ ẹdẹdẹ ru wọ kọn ayen na, re da sa kpipho vwẹ irhirhiọke ru wọ kọnrọn na; dede na orhọ rọye cha djẹ yanran vwẹ ẹdẹ rẹ ivuemiovwo na kugbe odjadja re je se sivwo na.

¹²E, agbranran rẹ otu buebu na, ayen van kerẹ ohọre rẹ obo abadi! E, ekuvwie rẹ irere na, ayen kuvwie kerẹ edo rẹ Abadi!

¹³Irere na do kerẹ edo rẹ ame rode, ẹkẹvuọvo kọ ghwọ ku ayen, kẹ ayen djẹ yanran shesheri, kọ djẹ kerẹ iphopho rọ hẹ enu rẹ ugbenu rẹ odju muẹ yanran, kerẹ odemu ro djuẹ iwurhie kpenu vwẹ obaro rẹ ogiribo.

¹⁴Vwẹ ovwọnvwọn, nighere, udidi rẹ oshọ! Bẹsiẹ rẹ ọke vwo rhie, ayen gbi herọ-ọ. Ọnana ẹkẹn rẹ ihwo re ghwọrọ avwanre na, kugbe ute rẹ ihwo ri gborho avwanre na.