Read urhobo Aizaya 19 Bible Online

Aizaya 19 - urhobo bible

Aizaya 19

¹Ona aroẹmrẹ kpahe Ijipt. Nighe, Ọrovwohwo rọ gua vughu vughu vwẹ ikoro ọ da rhe Ijipt, ema rẹ Ijipt ki che kpogho vwẹ obaro rọye, udu rẹ ihwo rẹ Ijipt ke cha wran vwẹ oma rayen.

²Ke me kpare ihwo re Ijipt vwọ so ohwohwo ayen ke họnre, ọniọvo vwọ so oniọvo, ohwo kohwo ke họnre ọrivẹ rọye, orere vwọ so orere, uvie vwọ so uvie;

³Erhi re ihwo re ljipt na kọ rhan nẹ ayen oma, ki mi phi ozighi phihọ iroro rayen; ke ayen diotọ rọye vwẹ obọ rẹ ema vẹ ebọepha, vwẹ obọ rẹ irivwi vẹ erieda;

⁴Ki mi siobọ nẹ ihwo rẹ Ijipt vwọ kẹ onini rọ goma; ovie rọ djoma ko che sun ayen, eriyin Ọrovwohwo, Ọrovwohwo rẹ otuofovwi na tare.

⁵Ame rẹ urhie ri Nile kọ cha kpo muotọ, urhie na kọ yamu kohro;

⁶igbo rẹ urhie na ki miovwi, eghọn rẹ Nile re Ijipt na ke ya kpo muotọ, ẹgo vẹ igbodigbo ejobi ki gbo kufia.

⁷Oma rẹ Nile na kọ dia phẹphẹ kakare, vwẹ ẹgbẹn ri Nile na, kemu kemu ra kọnre vwẹ oma ri Nile na ke yamu, ka djẹ ayen kufia, e gbe dia ọfa-a.

⁸Ihwiyeri ke viẹ muomahọ, ihwo ri si eghọre vwi Nile, ayen ke laghoma ayen otu re vwe ariri tan ame na.

⁹Ihwo re kọn ugbo rẹ iruru ofu ko dje ayen, kugbe iri rhuo oruru ọfuanfon.

¹⁰Ihwo re dia igbuyovwi rẹ otọ na ka guọghọ ayen, iri ru iruo re osa ivun ki miovwo ayen.

¹¹Isun ri Zoan ayen ghẹre tototo; eboiroro ri Fero se iroro rẹ ẹkpa. Komavọ wọ vwọ sa ta kẹ Fero, nẹ Mẹvwẹ ọmọ re ọvwẹghwanre, ọmọ rẹ ivie rẹ awanre?

¹²Evwẹghwanre wẹn na kẹ erhọ? Jẹn ayen ta kẹ wẹ ru wọ riẹn iroro rẹ Ọrovwohwo jẹn kpahe Ijipt.

¹³Isun ri Zoan rhi hirhe vwọ ẹkpa, Isun ri Memphis a phiẹn ayen ghẹn, ihwo re dia igbuyovwi rẹ ẹgborho na ayen sun Ijipt ghwru

¹⁴Ọrovwohwo phi erhi rẹ ọguọgua erhi rẹ ozighi; ọ da nẹrhẹ Ijipt gele vwẹ idjerhe rọye ejobi kirobo rẹ ọdaidi gele vwẹ ekpakpa rọye.

¹⁵Emu ọvuọvo gbi chekọ kẹ Ijipt re uyovwi eye urhurhuvwu, uhohi eye eyareya, se ru-u.

¹⁶Vwẹ ẹdẹ yena, ihwo rẹ Ijipt na ke cha họhọ eya, ke cha phariẹ vẹ oshọ vwọ kẹ obọ na rẹ Ọrovwohwo rẹ otuofovwi che kpogho phihọ ayen na.

¹⁷Otọ ri Juda kọ cha dia uguegue kẹ ihwo rẹ Ijipt kohwo kohwo re se odẹ rọye kẹ oshọ ko che muo fiki rẹ iroro rẹ Ọrovwohwo re otuofovwi na jẹ kpahe ayen.

¹⁸Vwẹ edẹ yena irere iyori cha dia vwẹ otọ rẹ Ijipt na re cha jẹn ephẹrẹ ri Kenan ke cha vwẹ uyovwi te otọ kẹ Ọrovwohwo rẹ otuofovwi na Ọvo vwẹ usun rayen ke che se nẹ Orere rẹ Ọnre.

¹⁹Vwẹ ẹdẹ yena ka cha so agbada kẹ Ọrovwohwo vwẹ uherevie re otọ rẹ Ijipt na, ka cha ma osusu kẹ Ọrovwohwo vwẹ ughwru rọye.

²⁰Kọ dia oka vẹ iseri kẹ Ọrovwohwo rẹ otuofovwi na vwẹ otọ rẹ Ijipt ọke rẹ ayen de che kperi se Ọrovwohwo fiki rẹ oshenyẹ kọ vwẹ osivwi rhe ayen, kọ chochọ rayen o mi sivwi ayen.

²¹Ọrovwohwo kọ vwẹ oma rọye kẹ ihwo re Ijipt riẹn, ihwo rẹ Ijipt ke riẹn Ọrovwohwo vwẹ ẹdẹ yena kẹ ayen ga vẹ izobo kugbe izobo ẹtorhẹ, ayen ki ve ive kẹ Ọrovwohwo kẹ ayen hwaosa rẹ ive na.

²²Ọrovwohwo kọ ghwiẹ Ijipt ọ ghwiẹ jẹn o sivwẹ, ayen ki rhivwi bru Ọrovwohwo rhe, ko nyo orẹ rayen o mi sivwi ayen.

²³Vwe ẹdẹ yena idjerhe rode kọ cha dia nẹ Ijipt re te Asiria ihwo rẹ Asiria ke rhe Ijipt, ihwo re Ijipt ke re Asiria, ihwo re Ijipt kugbe Asiria ki kuomaghe ga vwe asan ọvo.

²⁴Vwe ẹdẹ yena Izrẹl kọ cha dia Ọrerha kugbe Ijipt ve Asiria ke dia ebruphihọ vwẹ uherevie rẹ akpọ na,

²⁵re Ọrovwohwo rẹ Ọghẹnẹ rẹ otuofovwi bruba ke na, tanẹ, Ebruba kẹ Ijipt ihwo mẹ, kẹ Asiria iruo rẹ obọ mẹ, kẹ Izrẹl ọreuku mẹ.