Read urhobo Aizaya 2 Bible Online

Aizaya 2 - urhobo bible

Aizaya 2

¹Ota rẹ Aizaya rẹ ọmọ rẹ Amọz rọ mrẹre kpahe Juda kugbe Jerusalẹm.

²Ọke che te vwẹ ukuko rẹ ẹdẹ na, re ugbenu rẹ uwevwi rẹ Ọrovwohwo che vwo mudia gogorogo vwẹ usun rẹ igbenu na, ko che kpenu nọ igbenu na; irere na ejobi ki che rhurie ruọ,

³ihwo buebu ke cha rhe, ayen me ta: Yanrhe, e je kpọ ugbenu rẹ Ọrovwohwo na, kpo uwevwin rẹ Ọghẹnẹ ri Jekọp, rere o yono avwanre idjerhe rọye re avwanre nene ada rọye, kidie evun ri Zayọn ọye urhi che nurhe, ota rẹ Ọghẹnẹ ko nẹ Jerusalẹm rhe.

⁴Ko che guẹdjọ rẹ orere vẹ orere, ko che brorhiẹ rẹ ihwo buebu kẹ ayen che duvwu oda rayen phihọ ighwro, ibiri rayen phihọ egbage, orere gbe cha kparo oda vwọ so orere, eyẹ ayen gbe cha kpare ofovwi ọfa-a.

⁵E uwevwi ri Jekọp, yanrhe, je avwanre yan vwẹ urhukpẹ rẹ Ọrovwohwo.

⁶Kidie wo se ihwo wẹn, uwevwi ri Jekọp, kidie ayen vọnre vẹ emraro ri nẹ obọrhe rhe vẹ ẹboepha kerẹ ihwo ri Filistia ayen vẹ erhorha kere gbe mu ugbeyan.

⁷Otọ rayen vọnre vẹ idọnọ kugbe iro, efe rayen vwo oba-a otọ rayen vọnre vẹ iyesi, ekpẹrẹ rẹ ofovwi rayen vwo unu-u.

⁸Otọ rayen vọnre vẹ ema ayen diguẹ kẹ iruo rẹ obọ rayen, kẹ obo rẹ ayen vwẹ irhiabọ rayen ru.

⁹Etiọye ayen phọphọ ohwo, ayen da vwẹ ihwo gbe otọ — wo vwo ghovwo aye-en!

¹⁰Ro evun rẹ oragha na, si oma nu vwẹ evun rẹ iwurhie vwo nẹ uguegue rẹ Ọrovwohwo na, vwo ne urinrin re ọrho rọye

¹¹Inieni ọbrabra rẹ ohwo ki che kpotọ eheri rẹ ihwo ka phọphọ ayen; Ọrovwohwo na ọvo kọye a kpare kpenu vwẹ ẹdẹ yena.

¹²Kidie Ọrovwohwo rẹ ofovwi na vwẹ ẹdẹ kẹ ihwo ri herẹ kugbe iri phuoma, kẹ ihwo ri mu oma kpenu,

¹³vwọ kẹ igedu ri Lebanọn, ri kpenu gogorogo; vwo kẹ ehahe ri Bashan,

¹⁴vwo kẹ igbenu ri kpenu, ke igbenu ejobi ri kpenu;

¹⁵vwọ kẹ uwevwi kuwevwi rẹ ẹrhẹrẹ vwọ kẹ ogba kogba re firi,

¹⁶vwọ kẹ eko ejobi ri Tarshish; ke ekọ ri yovwiri ejobi.

¹⁷Obrabra rẹ ohwo kọ mrẹ ẹphọphọ eheri rẹ ihwo ke che vwo kpotọ; Ọrovwohwo ọvo a kpare kpenu vwẹ ẹdẹ yena.

¹⁸Ema na ejobi ke wanvrẹn kpae.

¹⁹Ihwo ke cha ro emwa rẹ eragha na kugbe inu rẹ otọ na, vwo nẹ uguegue rẹ Ọrovwohwo na, vwo nẹ urinrin rẹ ọrho rọye ọke ro de vrẹn ri guegue akpọ na.

²⁰Vwẹ ẹdẹ yena ihwo ki ku ema rẹ idọnọ kugbe ema rẹ iro rayen kufia, rẹ ayen ru kẹ oma rayen nẹ ayen ga vwọ kẹ irherhe kugbe edja,

²¹rẹ ayen ro ẹmwa rẹ eragha na kugbe ighrighri re, igbenu na vwo ne uguegue re Ọrovwohwo na, vwo nẹ urinrin, rẹ ọrho rọye vwẹ ọke ro de vrẹn rhe ri guegue akpọ na.

²²Chuko ku ohwo rẹ akpọ rọ vwẹ unwe nwẹn, kidie o firi?