Read urhobo Aizaya 22 Bible Online

Aizaya 22 - urhobo bible

Aizaya 22

¹Arọẹmrẹ kpahe iyara rẹ emramrẹ. Die wo rori ri wo vwo yeri kpenu, ovwan ejobi, vwo yeri kpo enu re uwevwi,

²ovwan re vọnre vẹ unuebo na, orere rẹ edo, orho ro mu oma kpenu? irivwi wẹn dia ọlọkọ e vwọ hwe aye-e, eyẹ i ghwu vwẹ ofovwi.

³Isun wẹn ejobi koko djẹ, ọ dia fiki rẹ umurhabọ-ọ e mu ayen. Ovwan ejobi ra mrẹre e muru, owene ayen dje re shesheri.

⁴Fiki rẹ ọtiọye na me da ta. Wo gbi ni vwe-e, ju vwe viẹ oviẹ rọ yara; wọ lagha oma bru vwe uche-e fiki rẹ ẹghwọrọ rẹ emetẹ rẹ ihwo mẹ.

⁵Kidie Ọrovwohwo Ọghẹnẹ rẹ otuofovwi o vwo ẹdẹ ọvo rẹ edo vẹ echivwo muotọ kugbe ozighi vwẹ iyara rẹ emramrẹ, ra cha vwọ san igbẹhẹ tueghe re che vwo kperi se igbenu

⁶Elam ghwa ekpọ rẹ ibigẹn vẹ ekpẹrẹ kugbe ihwo re gua iyesi, Kir da guọnọ ekpọfia na phia.

⁷Iyara wẹn ri me yovwi na vọnre vẹ ekpẹrẹ ihwo re gua iyesi na nabọ gbro phihọ vwẹ Inurhoro na.

⁸O si amwa re vwọ phopho Juda no oma. Vwẹ ẹdẹ yena ku wo che ni ekuakua rẹ ofovwi rẹ uwevwi rẹ obo egbo na,

⁹wọ da mrẹ asan buebu re tuegheri vwẹ orere ri Devid, wo de yorho ame rẹ ẹtẹrhe rẹ obotọ na,

¹⁰wo de keri iwevwi rẹ Jerusalẹm, wo da guọghọ iwevwi na toto rere wo vwo ru igbẹhẹ na gan

¹¹Wọ da tọn ọgọdọ phihọ uvwre re igbẹhẹ na rere ame rẹ ẹtẹrhe rẹ awanre na vwọ djẹ ruọ. Ẹkẹvuọvo wo gbi rhe ni ohwo ro ruro-o, eyẹ wo rhe se ohwo rọ jẹn iroro na phihọ otọ rhabae rhe gbe emu-u.

¹²Vwẹ ẹdẹ yena Ọrovwohwo Ọghẹnẹ rẹ otuofovwi ko che se ihwo rhe viẹ rhi muomahọ, rhe wanre uyovwi korie rhe, vwẹ esiso rhuo,

¹³gbe nighere, aghọghọ vẹ omavwerhe, e hwe irhuẹn e hwe igodẹ, e ria uvwo rẹ eranvwe ayen da idi. Jẹn avwanre re ra da, kidie odẹ rọ cha ki me ghwu.

¹⁴Ọrovwohwo rẹ otuofovwi na vwẹ oma rọye phia ke vwẹ nyo. Uyota orukuruku nana e se vwo ghovwo uvwe-e bẹsiẹ wo vwo ghwu eriyin Ọrovwohwo Ọghẹnẹ rẹ otuofovwi tare.

¹⁵Enẹ Ọrovwohwo Ọghẹnẹ rẹ otuofovwi tare, Yanrhe, yanran bru omuemu nana, bru Shebna, re phihọ enu rẹ evwruwevwi na, re wọ ta kẹ:

¹⁶Die wo rhi ru vwẹ etinẹ kugbe ono wo vwo vwẹ etinẹ, ru wọ vwọ tọn ushi vwẹ etinẹ kẹ oma wẹn, wẹ rọ tọn ushi phihọ enu rẹ ugbenu na, wọ da kare ẹdia kẹ oma wẹn vwẹ evun rẹ oragha na?

¹⁷Nighe, Ọrovwohwo na che kpono uwe gidi gidi, E wẹ rẹ ọgba na. O shabọ phihọ we, ghwaghwa.

¹⁸kọ dju we riariẹ vughu vughu, ko phi we kerẹ ubi rẹ udoro teye otọ ophẹphẹ, kẹ Etiyin we de ghwu, kẹ etiyin ekpẹrẹ wẹn re esiri na cha guọghọ phihọ, wẹ rọ dia omẹvuọ kẹ uwevwi rẹ onini wẹn.

¹⁹Ke me djẹ wẹ nẹ iruo wẹn, ke si we kpotọ nẹ ẹdia wẹn.

²⁰Vwẹ ẹdẹ yena ki mi che se odibo mẹ Eliakim rẹ ọmọ ri Hilkiah,

²¹ki mi che ku adagba wẹn phihọ oma, ke me vwẹ umuamwa wẹn vwo muo, ki mi phi ogangan wẹn phihọ obọ, kọ cha dia ọsẹ kẹ ihwo ri Jerusalẹm kugbe uwevwi rẹ Juda.

²²Ke me vwẹ usiaphrẹ rẹ uwevwi ri Devid vwọ yan igabọ rọye; ko novie, ohwo ọvuọvo rhe se huho-o, ko huho, ohwo ọvuọvo rhe se rhie-e.

²³Ki mi hwe ke kerẹ eghere phihọ ẹdia rọye, kọ cha dia kerẹ ekete rẹ ọghọ kẹ uwevwi rẹ ọsẹ rọye.

²⁴Ayen ki mu oghwa rẹ uwevwi rẹ ọsẹ rọye ejobi vwọ ya te emọuyovwi te ivwrọmọ, te emekuakua na ejobi, nẹ iko ra ro etoto.

²⁵Vwẹ ẹdẹ yena, eriyin Ọrovwohwo rẹ otuofovwi tare, ughere re hwe mu omamọ re asan ko che yoro, ka nyavwọ she, oghwa ra vwọ ya ejobi ka nyavwe ayen no, kidie Ọrovwohwo tarọ nure.