Read urhobo Aizaya 24 Bible Online

Aizaya 24 - urhobo bible

Aizaya 24

¹Nighere, Ọrovwohwo cha guọghọ akpọ na ejobi ọ ee kua fiotọ ko zighi enu rọye ọ me hra ihwo re dia enu rọye.

²Eriyin ọ cha dia, obọ rọ dia kẹ ihwo na, ọtiọye ọ je dia kẹ irherẹn na, obo rọ dia kẹ ọviẹn, ọtiọye ọ je dia kẹ ọrovworo, obo rọ dia kẹ ukọpha, ọtiọye ọ je dia kẹ ọpha, obo rọ dia kẹ ọ rọ dẹ, ọtiọye o je dia keẹ ọrọshẹ, ọbo rọ dia kẹ ọ ro momo kẹ ihwo ọtiọye ọ je dia kẹ ọ re o momo kẹ obo rọ dia kẹ ọrọvwigho ọtiọye ọ je dia kẹ ọriesa.

³Akpọ na ejobi ka guọghọ kakare ke miovwo; kidie Ọrovwohwo ta ọnana nure.

⁴Akpọ na re muomahọ o re vwioro, akpọ na ro brenu ọ rọ fẹbe; idjuvwu nene akpọ na viẹ.

⁵Ihwo rẹ akpọ na gbe akpọ na ku tughu tughu kidie ayen gbe irhi rọye ku, ayen de miovwo irhi na, ayen da ghwọrọ ọphọ ri bẹdẹ na.

⁶Fiki rẹ ọtiọye na ekan kọ ghwọrọ akpọ na, ihwo re dia ke re oja fiki rẹ abe rayen; fiki rẹ ọtiọye na ihwo re dia akpọ na ejobi yamu, imihwo tutuno keye chekọ.

⁷Wain muomahọ, irhe ri vain rọ brenu, ihwo rẹ oma vwerha ra fiunu.

⁸Aghọghọ vẹ edo rẹ igogo efọre, edo rẹ ihwo re ghọghọ fueri, aghọghọ rẹ ekpata ejobi fọre riẹi.

⁹Ayen gbe so ine da udi ọfa-a; Udi ọgangan kọ cha yare kẹ ihwo re da

¹⁰Orere rẹ ozighi na a guọgherọ tẹ otọ, uwevwi kuwevwi a kaerọ ohwo ọvuọvo gbe sa ruọ-ọ

¹¹Unuebo ọ hẹ ẹvun rẹ irhuvwu fiki ri wain rọ kanrẹ; aghọghọ ejobi te ovwọnvwọn rọye rẹ ọmavwerhovwẹ rẹ akpọ na reri kakare

¹²Orere na ejobi kua fiotọ re kakare, A teyọ inurhoro na ejobi guọghọ phihọ irhurhu.

¹³Enẹ ọ cha dia vwẹ uherevie rẹ akpọ na kugbe uherevie rẹ ẹgborho na, kerẹ ẹsiẹ rẹ urhe rẹ ọliv e de vwirhi, vwẹ ọke ra da kọrọ otiẹ nu.

¹⁴Ayen kparẹ urhuru rayen kpenu, ayen so ine rẹ aghọghọ, fiki rẹ ọrhọ rẹ Ọrovwohwo ayen dori vwẹ obuko ọnre.

¹⁵Fiki rẹ ọtiọye na vwẹ urinrin kẹ Ọrovwohwo vwẹ obaro ọnre, vwẹ orhoma re abadi na ejobi, vwẹ urinrin kẹ odẹ re Ọrovwohwo, Ọghẹnẹ re Izrẹl.

¹⁶Me nyo une rẹ ejiro nẹ oba rẹ akpọ na rhe, rọ vwe urinrin kẹ Ọvwata na Ẹkẹvuọvo me da ta, Mi vwiorore, Mi vwioro kufia Ekan kẹ vwe! Kidie ohwo ogbarogba na ji ruẹ emu ogbarogba, ohwo ogbarogba na ji ruẹ emu ogbarogba gangan

¹⁷Oshọ, ve ọgọdọ, ve ufi i bru we cha, E ihwo re akpọ na.

¹⁸Ohwo rọ mrẹ edo rẹ oshọ dje ko she phihọ ọgọdọ na, ohwo ro pho nẹ ọgọdọ na rhe ufi na kọ muo. Kidie evakpo rẹ odjuvwu rhie phihọ re, Ichivwo rẹ otọ rẹ akpọ na ki kpogho

¹⁹Akpọ na vwirhire tototo, akpọ na bẹre ẹbẹre ivẹ, akpọ na re kpogho revwi revwi.

²⁰Akpọ na re gbe kerẹ ohwo rọ da udi, ọ rọ vuẹ kerẹ utughẹ, ogbeku rọye pha họhọhọ yẹgbẹ vwẹ enu rọye, o sheri, o rhe se vrẹn ọfa-a

²¹Vwẹ ẹdẹ yena Ọrovwohwo ko hwe otu rẹ ofovwi rẹ odjuvwu, vwẹ obo odjuvwu, ivie rẹ akpọ na, vwẹ evun rẹ akpọ na.

²²Ka ghwẹ ayen ejobi koko kerẹ ihwo ra kanre phihọ evun rẹ ọgọdọ; ka kanre ayen phihọ uwodi ẹdẹ buebu da wan nu ke hwe ayen.

²³Ọke yena emeranvwe kọ dia bisi bisi, ọnre na oma kọ cha vuọ, kidie Ọrovwohwo rẹ otuofovwi na cha re uvie vwe enu rẹ Ugbenu ri Zayọn vwi Jerusalẹm vwẹ obaro rẹ ekpako rọye ọ da vwe urinrm rọye phia