Read urhobo Aizaya 30 Bible Online

Aizaya 30 - urhobo bible

Aizaya 30

¹Ekan kẹ emọ ri gbe ozighi, eriyin Ọrovwohwo tare, ri ruẹ obo rẹ ayen ta phihọ otọ, yẹ ẹkẹvuọvo ọ dia ọmẹ-ẹ; re gba oma koko, ẹkẹvuọvo yọ dia ọ rẹ erhi mẹ-ẹ, rere ayen mrasan vwẹ umwemwu ba umwemwu,

²ri mu oyan nẹ ayen kpo Ijipt yẹ ayen nọre vwẹ obọ mẹ tavwe-e, ri re se oma nu vwẹ otọ ri Fero, re ra vwẹ oma da vwẹ otọ rẹ uhoho rẹ Ijipt.

³Fiki rẹ ọtiọye na ochọ ri Fero che hirhe phihọ ọmaẹvuọ oma wọ vwọ da uhoho rẹ Ijipt kọ dia oma ephọphọ.

⁴Owene inotu rọye dia Zoan dede Iyinkọn rọye de te Hanis,

⁵ọvuọvo rọye cha mrẹ omaẹvuọ vwẹ oma re ihwo ri fi erere kẹ aye-en, re ke ayen ọchuko eyẹ erere-e, ẹkẹvuọvo omaẹvuọ vẹ omaẹphọphọ.

⁶Epha kpahe eranvwe ri Nẹgẹb. vwọ kpahe otọ rẹ ukpokpogho vẹ ivuemiovwo, asan rẹ okpohrokpo rẹ aye vẹ ọshare nẹcha, asan re ọrobiebi vẹ asiweri nẹcha, ayen kru efe rayen kpahe uko rẹ ekẹtẹkẹtẹ, eyere rayen kpahe ekpo rẹ iyesi, vwo rhe ihwo re cha vwẹ erere kẹ aye-en.

⁷Kidie ọchuko rẹ Ijipt fi emuovo-o, odiodi gheghe, kọye mi vwo mu odẹ kẹ nẹ Rahab ro di tidia gbiẹi.

⁸Asakiephana, yanran, re sio phihọ isemeti vwọ kẹ ayen, re wọ tuọn phihọ ọbe, rere ọ vwọ dia vwẹ ọke rọ cha kerẹ iseri bẹdẹ.

⁹Kidie ena ihwo ri gbe ozighi, emọ re vwọrọn efian, emọ ri jẹ eme enyo ri nyo uyono rẹ Ọrovwohwo na-a,

¹⁰re ta kẹ emrẹ na nẹ, Wa mrẹ-ẹ kugbe emraro na neẹ, Wa mraro rẹ uyota na kẹ avwanre-e, ta avwerhe kẹ avwanre, mraro ri ghevweghe,

¹¹ji idjerhe na vwo, gbobọnyẹ idjerhe na, wo gbi jẹn avwanre nyo ota rẹ Ọfuanfon Ọvuọvo rẹ Izrẹl na ọfa-a.

¹²Eriyin na enẹ Ọfuanfon Ọvuọvo rẹ Izrẹl na tare, Fikiridie wọ jẹn ota nana fia, wọ da vwẹ ẹro so oshenyẹ vẹ otaephre, wọ da vwẹ oma kpahe ayen;

¹³fiki rẹ ọtiọye na orukuruku na kọ cha dia kẹ wẹ kerẹ ova vwẹ oma rẹ igbẹhẹ, rọ vẹn tutu kpo uko, ro che rhurie she, ro che she ẹsiẹvuọvo kpregede,

¹⁴koọ ghwọrọ ivwivwuvwu kerẹ ochẹ rọ mema rọ guọghọ mwumwerhe, ra gbe sa mrẹ igbẹphẹre ọvuọvo vwọ bẹdẹ-ẹ ra vwọ wan erhanre nẹ enyerhanre-e, eyẹ ra vwọ sẹghrẹ ame nẹ orhare rhe-e.

¹⁵Kidie enẹ Ọrovwohwo rẹ Ọghẹnẹ tare, Ọfuanfon Ọvuọvo rẹ Izrẹl na, Vwẹ omaẹrha kugbe omaerovwo ọye ovwan da rhọ, vwẹ oma ehwemuẹ kugbe ẹro ẹvwọ suọ ọye ogangan rẹ ovwan epha. Yẹ ovwan rhọvwa-a,

¹⁶ẹkẹvuọvo wọ tare nẹ, Ẹjo! Avwanre djẹ fafa vwẹ enu rẹ iyesi, vwẹ otiọye na gba djẹ yanran, yẹ, Avwanre ke gua vwe enu rẹ iyesi re eshare kpata kpata, vwẹ ọtiọye na ihwo re vwo tua wẹn na ke djẹ gangan.

¹⁷Uriori ke cha mrẹ ohwo ọvo djẹ, ihwo iyori ọvo kọ cha nẹrhẹ owẹ djẹ, bẹsiẹ wẹ ọvo che vwo chekọ kerẹ urhe rẹ aphiana vwẹ enu rẹ ugbenu, kere oka vwẹ enu rẹ ugbenu.

¹⁸Fiki rẹ ọtiọye na Ọrovwohwo vwọ hẹrhẹ rọ vwọ ni arodọvwẹ wẹ kọye ọ da vwẹ oma rọye kpenu ro vwo dje aruẹdọn rọye kẹ wẹ. Kidie Ọrovwohwo ọye Ọghẹnẹ rẹ ọsoso ebruba kẹ ayen ihwo re hẹrhereẹ.

¹⁹Uyota, E ihwo ri Zayọn re dia Jerusalẹm, wa gbe cha viẹ ọfa-a. Vwe uyota ko ni aruẹdọn ke we vwe ọke wọ da viẹ se, ọke ro de nyo ko kpahe ke wẹ.

²⁰O da tọhọ dianẹ Ọrovwohwo ke we ikara re ukpokpogho kugbe ame re ọdjarhe, dede na Oyono wẹn gbi se si oma nu ọfa-a, ẹkẹvuọvo ẹro wẹn cha mrẹ Oyono wẹn.

²¹Erhọn wẹn ki che nyo ota vwẹ obuko wẹn, tanẹ. Ọnana he Idjerhe na, yan nene, vwe ọke wọ da rhẹriẹ oma kpo obọrhe kugbe ọke wọ da rhẹriẹ oma kpọ ọhọhwere.

²²vwe ọke yena ku wọ che gbe ema wẹn ra vwe idọnọ efuanfon kugbe e ra vwe iro ma ẹgua Ku wọ hra ayen kerẹ imu igbegbe, ku wo ta ke ayen ne, Wa yanran!

²³Kọ rhọ ọsio phihọ emamọ ra kọn phihọ otọ na, te ekti ve obo ra kọn phihọotọ na ejobi, ki che yovwi buebu. Vwe edẹ yena uchuru wẹn ke cha re ọdi vwẹ asan ọrhuarhọ;

²⁴te erhuẹn te ekẹtẹkẹtẹ re vwo voro otọ na ke re ẹbe eyaya re tue ughweraka ku, ra nabọ vwẹ ovwẹvwẹ vẹ ako vwọ gua kugbe

²⁵Vwi kenu kenu rẹ ugbenu rọ kpenu gangan kugbe igbenu itete na ejobi ke cha vọn ve etẹrhe re dje ve ame, vwẹ ẹdẹ rẹ ehwe rode na, re eherhe na de che she.

²⁶Ọ rọ ma rho urhukpẹ re emeranvwe kọ cha họhọ orẹmrẹ rẹ ọnre, ọremre re ọnre kọ rhọ asakueghwre kere orẹmrẹ rẹ edẹ ighwrẹ, vwẹ ẹdẹ rẹ Ọrovwohwo da cha gba ora rẹ ihwo rọye, ko sivwi ora rẹ ọye ọvo bruru.

²⁷Nighe, odẹ rẹ Ọrovwohwo che ne ogboko rhe, ọtorhẹ vẹ ophu rọye, vwe evun rẹ ọkpan rẹ ivwirhi, ẹbẹrunu rọye vọnre vẹ ophu, ẹrenvwe kerẹ ẹkuerhanre rọ torhẹ;

²⁸ẹnwen rọye kẹrẹ utọ ro ko phoro ro rhi re ohwo te ohọre; ro che phorhi ẹgborho kpo ẹghwọrọ, kọ cha gba urhe mu unu re ihwo na re o sun ayen ghwru.

²⁹Ku wọ cha so ine vwẹ ason ra da re orẹ ọfuanfon; kugbe aghọghọ re udu, kere ọke rẹ ohwo de gbe cha nene edo re owanre kpo enu rẹ ugbenu re Ọrovwohwo, vwo kpo obo Oragha rẹ Izrẹl.

³⁰Ọrovwohwo ko che ru re de nyo urhuru rẹ ọrho rọye ka je cha mrẹ odju rẹ ochẹ rẹ ighabọ rọye, vwẹ ophu ọtuatua kugbe ela ve ẹtorhẹ re erhanre, vẹ ikoro rọ bẹre vẹ ọgiribọ kugbe iblosio rẹ erhanre.

³¹Ihwo rẹ Asiria ke cha phariẹ yeyeghe re ayen de nyo urhuru rẹ Ọrovwohwo na, vwẹ ọke re ọkpọ rọye da ghwiẹ

³²Kohọ kọhọ rẹ Ọrovwohwo da vwẹ ọkpọ rọye na ghwie ayen, kọ cha dia kere edo rẹ igogo kugbe isorogun, obọ rọye rọ nyavwaro kpenu kpene kọye o vwo nene ayen phi ofovwi

³³Kidie a rhuẹrẹ asan rọ torhẹ phihọ otọ kẹ ayen kri re, Uyota, vwọ ke ovie na a rhuẹrẹ hẹrhẹ, omamọ re iyara m tọnre kokodo hehere, vẹ irhe kugbe erhanre re koko phihọ gbidi, ẹnwẹn re Ọrovwohwo, kere uto re ihiosio re erhanre re koko phihọ.