Read urhobo Aizaya 40 Bible Online

Aizaya 40 - urhobo bible

Aizaya 40

¹Bruche, bru ihwo mẹ uche, eriyin Ọghẹnẹ wẹn tare.

²Ta ota dẹndẹn kẹ Jerusalẹm, ru wo kperi kẹ tanẹ ofovwi rọye rere, nẹ a vwẹ orukuruku rọye ghovwo, nẹ ọ reyọ osa mie Ọrovwohwo ọhwọhwọ ivẹ fiki rẹ umwemwu rọye.

³Urhuru de kperi. Vwẹ evun rẹ aghwa, rhuẹrẹ idjerhe rẹ Ọrovwohwo, ru idjerhe rode phiọnphiọn phihọ evun rẹ aton kẹ Ọghẹnẹ rẹ avwanre.

⁴Iyara kiyara na ejobi vọn kpenu, igbenu ride vẹ itete na ke kporo ayen te otọ, asan ogugunu ka phio kpọvi, otọ chochohri ka riẹriẹ kugbe.

⁵Urinrin rẹ Ọrovwohwo ka cha vwọ phia, Ihwo ejobi ke cha mrẹ kugbe, kidie unu rẹ Ọrovwohwo tarọ nure.

⁶Urhuru ọvo da ta, Kperi Me da ta, Kidie mi kperi? Ihwo ejobi odi, erhuvwu rọye ejobi họhọ ododo rọ he evun rẹ aghwa.

⁷Odi na vwioro, ododo phoriẹ, vwẹ ọke rẹ Ọrovwohwo da nwẹn kuo, uyota ohwo na họhọ odi.

⁸Odi vwioro, ododo phoriẹ, ẹkẹvuọvo ota rẹ Ọghẹnẹ rẹ avwanre mudia bẹdẹ.

⁹Yanran kpo enu rẹ ugbenu ro kpenu, E Zayọn, aghwoghwo rẹ ikun esiri na, kpare urhuru wẹn kpenu vẹ ogangan, E Jerusalẹm, aghwoghwo rẹ ikun esiri na, vrẹn mudia, wọ dje oshọ-ọ, ta ke irere ri Juda, Nighere Ọghẹnẹ wẹn na.

¹⁰Nighere, Ọrovwohwo Ọghẹnẹ ra cha vẹ ẹgba, igbabọ rọye ri suẹn kẹ, nighere, osa rọye rhere, osa ẹhwa na e hẹ obaro rọye.

¹¹Ọ ghẹrẹ uchuru rọye kerẹ osuigodẹ, o mu emọ rẹ igodẹ na phihọ igbabọ rọye, ọ mu ayen phihọ agada rọye, ko sun e re ghẹrẹ emọ dẹndẹn.

¹²Ọ rọ vwanvwọn ame na phihọ okokodo rẹ obọ rọye ọ da vwẹ isabọ vwọ ma odjuvwu na, o da ghwẹ iwurhie rẹ akpọ na phihọ uchunu, ọ da vwẹ uwan vwọ vwanvwọn igbenu na, igbenu rẹ itete na kẹ uwan?

¹³Kono ri sun Erhi rẹ Ọrovwohwo, eyẹ kono ọvwiroro rọye ro yono?

¹⁴Kono ọ vuẹre tavwe ro ki vwo ẹriẹn rọye onọ ri yoniro idjedje rẹ ọsoso, ono ri yoniro erianriẹn, ono vwẹ edjerhe rẹ ẹruọ vwọ nẹ?

¹⁵Nighere, irere na họhọ umuku rẹ ame ro suẹn nẹ usiobọ cha e de kere kerẹ iwurhie rọ hẹ enu rẹ uwan, nighere, o di mu ibrotọ na kerẹ iwurhie vworo vworo.

¹⁶Irhe ri Lẹbanọn gbi te vwo mu erhanre-e, eyẹ eranvwe rọye che te vwo ze izobo-o.

¹⁷Ẹgborho na ejobi na fi emu ọvuọvo kẹ-ẹ o roro ayen ejobi havwe nọ emu diodi.

¹⁸Kono ghwrara wo vwo dje Ọghẹnẹ, eyẹ ki didi emu re họherọ?

¹⁹Oma na, ọwena re kaerọ, Oduvwiro ọ da vwẹ oro pharọ, o de duvwu ọjọrọn rẹ idọnọ vwọ kẹ.

²⁰Ohwo rọ dia ogbere ko jẹ izobo ke oma rọye, urhe ro je gbo, ọ me guọnọ omamọ rẹ ọwena rọ nabọ kare oma ro jẹ yan.

²¹Wọ je riẹ-ẹn? wo ji nyo-o? A je ta kẹ wẹ nẹ otọrhe-e? Wọ je riẹn nẹ emuohọ rẹ akpọ na rhe?

²²Ọye ri tidia phihọ usikẹ rọ hẹ obenu rẹ akpọ na, ihwo re dia ejobi họhọ ebaka; ohwo rọ vwẹ odjuvwu tan kerẹ amwa, rọ vwe rọ tan kerẹ utughẹ ra dia;

²³ohwo ro hirhe emọ rẹ ivie phihọ emu diodi, o mi ni isun rẹ akpọ na ejobi phihọ ighevweghe.

²⁴Ugbegangan a vwọ kọn ayen, ugbegangan e vwo voro, ugbegangan ugbẹn rayen vwọ dje ruotọ, ọke rẹ odju de dju ayen re ki phiorọ, aphopho ko djuẹ ayen yanran kerẹ iphopho.

²⁵Kono wo vwo dje vwe, re me họhọ? eriyin Ọfuanfon Ọvuọvo na tare.

²⁶Kpare ẹro wẹn kpenu re wọ mrẹ, ono ma enana? Ọye ohwo rọ reyọ ayen rhe gbidiki, ro mu odẹ kẹ ayen ejobi, vwẹ orhuarho rẹ ẹgba rọye, kidie ọ ganre vẹ egba ọvuọvo rọye se ghwru-u

²⁷Die wọ vwọ ta, E Jakọp, re wọ vwọ ta, E Izrẹl, Idjerhe mẹ djahere kẹ Ọrovwohwo na Ọghẹnẹ mẹ se ute mẹ gbe emu-u?

²⁸Wọ je riẹ-en? Wọ ji nyo-ọ? Ne Ọrovwohwo na ọye Ọghẹnẹ ri bẹdẹ na, ọye Ọmema rẹ oba rẹ akpọ na. Oma rhọ-ọ eyẹ oma ghwọrọ-ọ, ẹruọ rọye ọ bẹn evughe.

²⁹Ọ vwẹ ogangan kẹ ohwo rẹ oma rhọ? ọ rẹ ọgangan rheri-i ọ me vwọ ba kẹ

³⁰Imighene dede oma sa rhọ ayen, oma sa ghwọrọ ayen,

³¹ẹkẹvuọvo ihwo re hẹrhẹ Ọrovwohwo cha rhiọ ogangan rayen, ke cha tan ibekpe kerẹ ugo, ayen cha dje oma ghwọrọ aye-en, ayen cha yan oma che ro aye-en