Read urhobo Aizaya 45 Bible Online

Aizaya 45 - urhobo bible

Aizaya 45

¹Enẹ Ọrovwohwo tare kẹ ọmọ rọye rọ vwẹ evwri ghworo na Sairọs, re me yọnrọn obọrhe rọye na, re mi phi irere na kua kẹ na re Me ban ivie phihọ keẹ, re mi rhie ẹchẹ phihọ hẹrhẹ rere e je ẹchẹ yena ehuho,

²Me ka obaro kẹ wẹ re Me riẹriẹ igbenu na, Mi vwirhi ẹchẹ rẹ ẹrovwo na ibribro, ki Mi vwirhi egbẹ re itehru na,

³Ki Mi vwẹ efe re ebri na kẹ wẹ kugbe obo ra ghwẹ koko vwẹ odjahọ ejobi rere wọ vwọ riẹn nẹ Mẹvwẹ ọye, Ọrovwohwo na, Ọghẹnẹ rẹ Izrẹl, ro mu odẹ wẹn se we.

⁴Kidie fiki rẹ odibo mẹ Jekọp, kugbe Izrẹl re Me jẹreyọ na. Mẹvwẹ vwẹ odẹ wẹn se we, Ode wẹ rivẹ, dede na wọ riẹn vwẹ-ẹ.

⁵Mẹvwẹ Ọrovwohwo na, ọfa gbe herọ-ọ, Ọghẹnẹ ọfa rọ ba vwẹ gbe herọ-ọ; Me vwẹ amwa rhuo we, dede na wọ riẹn vwẹ-ẹ,

⁶rere ihwo vwọ riẹn, nẹ ẹvacha rẹ ọnre rhe nẹ obuko ọnre rhe nẹ, ọfa rọ ba vwẹ gbe hẹrọ-ọ. Mẹvwẹ Ọrovwohwo na, o gbi vwo ọfa-a.

⁷Mẹvwẹ re ma orẹmrẹ kugbe ebri, Mẹvwẹ rẹ ma efe mẹvwẹ re ma okpetu, Mẹvwẹ Ọrovwohwo na, rọ ma imu nana ejobi na Ọrovwohwo hẹ Ọmẹna

⁸Eghwẹghwẹ, E idjuvwu, jo tue nẹ obenu rhe, jẹn obenu na rhọ osio rẹ ọvwata phihọ otọ na; jẹn otọ na rhie phihọ, rere esivwo va nẹ otọ na rhe, ro jẹn ọvwata va djẹ nẹ otọ na rhe, Mẹvwẹ Ọrovwohwo na re marọ

⁹Ekan kẹ ohwo ro nene ọ rọ marọ pharhe, ema ra mare vẹ ọmema. Ophiẹn kọ ta kẹ ọmema nẹ, Die wọ vwọ ma vwẹ? eyẹ nẹ, Iruo wẹn vwo obọ-ọ?

¹⁰Ekan kẹ ohwo rọ ta kẹ ọsẹ rọye nẹ, Die wo vwo vwiẹ? eyẹ vwọ kẹ aye nẹ, Die wọ vwọ chuẹ uvwiẹ?

¹¹Enẹ Ọrovwohwo tare, Ọfuanfon Ọvuọvo rẹ Izrẹl na, kugbe Ọ rọ marọ Wọ nọ vwẹ orhiẹn kpahe emọ mẹ, eyẹ ji urhi kẹ vwẹ kpahe iruo rẹ obọ mẹ?

¹²Mẹvwẹ re ma akpọ na, Me da ma ohwo phihọ enu rọye, obọ mẹ me vwọ riẹn idjuvwu na phihọ, Mẹvwẹ re vwẹ urhi kẹ otu rẹ herọ ejobi.

¹³Me kparọ vwẹ ọvwata mẹ, ki mi ru idjerhe rọye ejobi phiọnphiọn, kọ bọn orere mẹ ighuvwu Me ke siobọ nẹ ayen, ọ dia ọ rẹ osa eyẹ ẹse-e, eriyin Ọrovwohwo rẹ otuofovwi na tare.

¹⁴Enẹ Ọrovwohwo rẹ otuofovwi na tare. Efe rẹ Ijipt kugbe oghwa rẹ ineki rẹ Etiopia, kugbe ihwo ri Seba, eshare puma, ki bru we rhe ke dia ewẹn ki nenẹ uwe. ke rhe vẹ igoni vwẹ obọ rhi shiguẹ kẹ wẹ. Ayen ke rẹ wẹ tanẹ; Ọghẹnẹ vẹ owẹ ọvo re gba herọ, ọfa gbe herọ-ọ, Ọghẹnẹ ọfa rọ barọ gbe herọ-ọ.

¹⁵Uyota, wẹ Ọghẹnẹ ro siẹ oma wẹn nẹ; E Ọghẹnẹ rẹ Izrẹl, Osivwi na.

¹⁶Oma vo ayen ejobi e phi ayen phihọ ozighi, ihwo re ma ẹdjọ ayen ejobi che zighi kugbe.

¹⁷Ẹkẹvuọvo Izrẹl Ọrovwohwo ri sivwiro vẹ esivwo ri bẹdẹ, wọ cha mrẹ omaẹvuọ-ọ eyẹ ozighi-i rhiri bẹdẹ.

¹⁸Kidie enẹ Ọrovwohwo tare, rọ ma idjuvwu na (ọye Ọghẹnẹ) rọ mama otọ na rọ maro (ọye muro vi) ọ vwẹ ozighi ma-a, o marọ ra vwọ dia. Mẹvwẹ Ọrovwohwo na, o gbi vwo ọfa-a.

¹⁹Me ta ota vwẹ odjahọ-ọ, vwẹ otọ rẹ ebri; Me ta kẹ uvwiẹ ri Jekọp re, Guọnọ ovwẹ vwẹ ozighi. Mẹvwẹ rẹ Ọrovwohwo ta uyota, Me ta obo re gbare.

²⁰Ghwẹ oma wẹn koko re wọ rhe, we siọma koko, ovwan ihwo ri ghwu chekọ vwẹ ẹgborho na, Ayen vwo erianriẹ-ẹn ri mu ẹdjọ re ibrirhe ghoro na, re ra nẹ ẹrhovwo kẹ edjọ ro se sivwẹ-ẹ.

²¹Dje ru wo gu ẹdjọ wẹn rhe jẹn ayen jẹ iroro kugbe Ono ri gbe ikun nana rhabae? Ono ri djere vwẹ ọke rẹ awanre? O dia Mẹvwẹ, rẹ Ọrovwohwo na? Yẹ Ọghẹnẹ ọfa gbe herọ ba vwẹ-ẹ, Ọghẹnẹ rẹ ọvwata kugbe Osivwi, ọfa gbe herọ vrẹn vwẹ-ẹ

²²Rhoma bru vwe rhe re wọ rho, oba rẹ akpọ na ejobi na: Kidie Mẹvwẹ Ọghẹnẹ, o gbi vwo ọfa-a

²³Vwẹ oma mẹ ọvo mi vwo duvwu iyori, Unu Me ọye ọvwata na nurhe ota ro che se rhivwi-i: Mẹvwẹ igbo na ejobi che wurhu kẹ, ẹrenvwe ejobi che vwo duvwu iyori.

²⁴Vwẹ oma rẹ Ọrovwohwo ọvo, ọye a da cha ta kpahe ovwẹ nẹ, ọye ọvwata vẹ ogangan epha, kọye ayen che bru rhe oma kọ vo ayen, ayen ejobi ri mu ophu kpahọ.

²⁵Vwẹ evun rẹ Ọrovwohwo ọye uvwiẹ re Izrẹl ejobi da kparobọ vwẹ urinrin.