Read urhobo Aizaya 49 Bible Online

Aizaya 49 - urhobo bible

Aizaya 49

¹Kerhọn mẹ, E erhuru na, wa kerhọn, ovwan ihwo ri nẹ ogboko rhe na. Ọrovwohwo ri se vwe nẹ evun rhe, nẹ obo evun rẹ oni Mẹ o de mu odẹ kẹ vwẹ.

²O de ru unu Mẹ dandan kerẹ ọlọkọ, vwẹ evun rẹ uhoho re obọ rọye o de si vwe nu, o de ru vwe kerẹ ubigẹ ra phọnre, vwẹ evun rẹ ako rọye o de si vwe nu.

³Ọ da ta kẹ vwẹ, Wẹ odibo Mẹ, Izrẹl, oma we mi de vwo ejiro,

⁴Ẹkẹvuọvo Me da ta, Me wian kufia, Me ghwọrọ ogangan mẹ kufia ghevweghe, dede na uyota uyoyovwi mẹ rhe Ọrovwohwo, osa ẹhwa mẹ rhe Ọghẹnẹ mẹ.

⁵Asakiephana Ọrovwohwo tare, rọ ma vwẹ nẹ evun rhe nẹ Me dia odibo rọye, vwọ reyọ Jekọp vwo rhivwi rhe, ra vwọ ghwẹ Izrẹl kokọ bro ra, kidie Mi vwo ọghọ vwe obaro rẹ Ọrovwohwo, Ọghẹnẹ Me rhi hirhe phihọ ogangan mẹ re —

⁶ọ da ta, Emu ọphapharhe rere wọ vwọ dia odibo mẹ ra vwọ kpare uvwiẹ ri Jekọp vrẹn kugbe rere a vwọ sẹro rẹ uchekotọ rẹ Izrẹl; Me vwẹ owẹ ru urhukpẹ kẹ ẹgborho na, rere esivwo Mẹ rhi vwo te oba rẹ akpọ na.

⁷Enẹ Ọrovwohwo tare, Ọtan rẹ Izrẹl kugbe Ọfuanfon Ọvuọvo rọye na, vwọ ke ọvo ra jẹfia gangan, ro tu ẹgborho na oma, odibo rẹ isun na. Ivie ke mrẹ ki vrẹn; isun, kugbe ayen ki she diguẹ; fiki rẹ Ọrovwohwo, rẹ ohwo rẹ uyota, Ọfuanfon Ọvuọvo rẹ Izrẹl na, rọ je wẹn reyọ na.

⁸Enẹ Ọrovwohwo tare Vwe ọke re aroestri Me da jẹ wẹ reyọ, vwẹ ẹdẹ re esivwo Me da cha wẹ uko, Me sẹro wẹ Me da vwẹ owẹ ru kerẹ ọphọ vwọ kẹ ihwo na, re vwo rherhe otọ na vi, ra vwọ gharọ utetemute ughwẹ ra kua jovwo na,

⁹rọ ta ke ihwo re he uwodi na nẹ, Yan phia, vwọ kẹ ihwo re hẹ ebri na, Vwẹ oma phia. Ayen cha re emu yan vwẹ oma re idjerhe na, vwe enu rẹ igbenu phrẹphrẹphrẹ na ejobi kẹ etiyin egbri cha dia,

¹⁰owẹvwe eye urhuru rẹ ame che hwe aye-en, eye uvo gbaegbae vẹ odju che mu aye-en, kidie ohwo rọ re ehrọre kẹ ayen ko sun ayen, vwẹ oma rẹ ova rẹ ame kẹ etiyin e de sun ayen.

¹¹Ki mi che ru igbenu Mẹ ejobi phihọ idjerhe, idjerhe ride Mẹ ejobi ka vọnrhọn ayen kpenu.

¹²No, enana cha no ogboko rhe, nighere, enana cha nẹ obọhwẹre vẹ obuko ọnre rhe, enana ki che nẹ obọ ri Syene rhe.

¹³So ine rẹ aghọghọ, E idjuvwu, kparọ kpenu, E akpọ kperi phia, E igbenu na, re wa so ine! kidie Ọrovwohwo bru ihwo rọye uche, kọ re ehrọre rẹ otu re he ukpokpogho.

¹⁴Ẹkẹvuọvo Zayọn da ta, Ọrovwohwo sen vwẹ, Ọrovwovwe gbe karohọ ovwẹ-ẹ.

¹⁵Ke ọmọ ro vievie sa chọrọ aye ẹro, ro vwo jẹ ehrọre ẹriọ kẹ ọmọ rẹ ọrhen rọye? Ọ da tobọ dianẹ enana chọrọ ẹro, yu wọ sa chọrọ ovwẹ ẹro-o

¹⁶Nighere, Mi vi we phihọ ẹhẹrhobọ mẹ; igbẹhẹ wẹn he obaro Mẹ kọke kọke

¹⁷Ihwo re bọn wẹn ọ phẹrẹ ayen obọ nọ otu re guọghọ owẹ, ihwo ri kporo uwe te otọ ma yan ju we vwo.

¹⁸Ni oma riariẹ rere wọ mrẹ; ayen ra ghwẹ koko, ayen re bru we cha. Kirobo re Me herọ na, eriyin Ọrovwohwo tare, wo ku ayen phihọ oma kerẹ ekuakua rẹ osẹvwe, wo gba ayen mu oma kirobo re ọpha ruẹ.

¹⁹Uyota asan ofefe wẹn ra kua jovwo kugbe otọ wẹn ra ghwọrọ re na — uyota ọ cha hwa nọ kẹ ihwo wẹn re dia, ihwo re rọ we kpo evun na ke cha dia shesheri.

²⁰Emọ re vwiẹri vwẹ ọke rẹ ihwo wẹn vwo ghwu na ke cha ta phihọ erhọn wẹn, Asan na hwa nọ kẹ vwẹ, kẹ vwẹ asan re Me dia.

²¹Ọke yena ko wọ ta vwẹ udu wẹn Konọ vwiẹ enana kẹ vwẹ? Ihwo Mẹ ghwuru Me ke rha dia ẹga, e mu ayen ighuvwu a dje ayen kufia, ẹkẹvuọvo kono rha rhoma vwiẹ enana? Nighe, Mẹvwẹ obo ri chekọ, ki tivo enana rhe nurhe?

²²Enẹ Ọrovwohwo rẹ Ọghẹnẹ tare , Nighere, Me riẹn obọ mẹ kpahe ẹgborho na, ke Me vwẹ oka Mẹ vi ke ihwo na; ayen ki mu emọ rayen phihọ agada rayen rhe, emetẹ wẹn ke mu ayen kpahe akoko rayen,

²³Ivie ke dia ese rẹ aruakpọ wẹn, ivie re eya ke dia ini re ghẹre ovwan. Ayen ki diguẹ bọvwọn epharo rhuotọ kẹ wẹ, ke rare ekpẹn re awọ wẹn. Etiyin wo ke riẹn nẹ Mẹvwẹ Ọrovwohwo na Otu re hẹrhẹ ovwẹ oma sa vo aye-en.

²⁴Ke si emuọre nẹ unu rẹ ọgba, eyẹ oghuvwu ne obọ rẹ odiphri?

²⁵Uyota, enẹ Ọrovwohwo tare vwevwe rẹ ighuvwu rẹ ọgba na a je cha reyọ ayen, emuọre rẹ odiphri na e ji che sivwo mie, kidie ihwo ri nene uwe ghwo ki mi nene ayen ghwọ, ki mi sivwi emọ wẹn.

²⁶Mi ru otu ri shenyẹ wẹn vwọ re uvwo rẹ omobọ rayen, ọbara rẹ omobọ rayen ko che mu ayen kere udi. Etiyin ihwo ejobi ke riẹn nẹ Mẹvwẹ Ọrovwohwo Osivwi wẹn, Ọtan wẹn, Ọgba Ọvuọvo ri Jekọp.