Read urhobo Aizaya 50 Bible Online

Aizaya 50 - urhobo bible

Aizaya 50

¹Enẹ Ọrovwohwo tare Tivọ ọbe rẹ obo esiono re oni wẹn epha, ri mi vwo siobọ no? Eyẹ ọriesa na rhọ ọ ra she ẹẹ ke na? Nighere, fiki rẹ orukuruku wẹn a vwọ shẹ wẹ, ji vwi fiki rẹ ogbeku na e vwo siobọ nẹ oni wẹn.

²Mavọ, ọke Me vwọ rhe, ohwo gbe herọ-ọ? Ọke Mi vwo se, o rhe vwo ohwo ro nyori-i? Obọ Mẹ krẹnọ, ro vwo je ohwo ẹtan? Gbine Mi vwo ogangan re vwo sivwẹ-ẹ? Nighere, vwẹ ẹghwọ re unu mẹ abadi na kọ kpọ, Mi ru urhie na phihọ aton, iyeri rayen ki gbo kidie ame herọ-ọ i mu ghwu fiki r;pe urhuru rẹ ame.

³Me vwẹ ebri vwo rhuo idjuvwu na, esiso kọye ayen vwo phopho.

⁴Ọrovwohwo Ọghẹnẹ kẹ vwe ẹrenvwe rẹ ihwo re yonori, rere Me vwo riẹn obo ra sa vwẹ ota yọnrọn ohwo rẹ oma rhọ Irhiọkẹ kirhiọkẹ o vwo vrẹn, ọ rhọvwọ erhọn mẹ rọ vwo nyo kere ihwo re yonori

⁵Ọrovwohwo Ọghẹnẹ rhie erhọn Me, Mi rhe vwo udu-u, Mi rhe chu uko kuo-o

⁶Me vwe uko mẹ kẹ ọ rọ ghwiẹ vwẹ, ohwa Me vwọ kẹ otu re savwe ẹtuegha mẹ; Mi si opharo Mẹ nu-u vwọ kẹ omaẹvuọ vẹ enya edje kuo.

⁷Kidie Ọrovwohwo Ọghẹnẹ cha vwẹ uko, fiki rẹ ọtiọye na oma gbe vo vwẹ-ẹ, fiki rẹ ọtiọye na ke Me tọn opharo Mẹ vi kerẹ umomo, Me riẹnre nẹ a gbe cha sa phọphọ ovwẹ-ẹ,

⁸ohwo ro brorhiẹ Mẹ o bi kẹrẹ ovwẹ. Kono ri nene uvwe pharhe? Jẹn avwanre vrẹn mudia kugbe. Kono re dia ukọn Mẹ? E jọ yan bru vwe rhe.

⁹Nighere, Ọrovwohwo Ọghẹnẹ cha vwẹ uko; kono ri bru orhiẹn hwe vwe? Nighere, ayen ejobi cha phoriẹn kerẹ ewun, eghwọghwọ ke re ayen nu.

¹⁰Ono vwẹ usun rẹ ovwan na re dje oshọ rẹ Ọrovwohwo ro mu ọghọ kẹ urhuru rẹ idibo rọye, re yan vwẹ evun rẹ ebri ri vwo urhukpẹ-eẹ, dede na yẹ ayen vwẹ ẹro so odẹ rẹ Ọrovwohwo re vwẹ oma da Ọghẹnẹ rọye?

¹¹Nighere, ovwan ejobi ri koko erhanre, ri phopho imwerhanre la! Gba vwẹ urhukpẹ re erhanre wẹn vwọ yan, kugbe imwerhanre ri wo koko phihọ! Ọnana kọye wọ cha mrẹ reyọ vwẹ obọ Mẹ ku wo che ghunie vwẹ ọdjarhe.