Read urhobo Aizaya 51 Bible Online

Aizaya 51 - urhobo bible

Aizaya 51

¹Kerhọn Mẹ, ovwan re vwọ tua esivwo ovwan re guọnọ Ọrovwohwo; gbe ni oragha re she we nurhe, kugbe ọgọdọ ra tọn wẹ nurhe.

²Ki Ebraham rẹ ọsẹ wẹn kugbe Sera ro vwiẹ wẹ, kidie ọke re ọye ọvo sogono vwọ herọ Mi de se, Me da nẹ ẹrhovwo kẹ mi de ruo bu.

³Kidie Ọrovwohwo se bru Zayọn uche, ko bru asan ra ghwọre ejobi na uche, ko ru aghwa rọye kerẹ Idẹn, aghọghọ vẹ omavwerhe keye a mrẹ vwọ, ẹkpẹvwẹ kugbe urhuru rẹ ine.

⁴Kerhọn Mẹ, ihwo Mẹ, rhie erhọn wẹ kẹ vwẹ, egborho mẹ, kidie urhi che nẹ obọ Mẹ rhe ọsoso Mẹ kọ dia urhukpẹ kẹ ihwo na.

⁵Esivwo Mẹ re siẹ kẹrẹ okpokpakpa, esivwo Mẹ yan phiare, igbabọ Mẹ ro sun ihwo na, erhuru na ra hẹrhẹ ovwẹ, igbabọ Mẹ kọye ayen phi ẹro phihọ.

⁶Kpare ẹro kpo obo odjuvwu, re wo ni akpọ rọ he obo otọ, kidie idjuvwu na cha ravwiẹn kerẹ ivwirhi akpọ na cha phoriẹn kerẹ ewun, ihwo re dia evun rọye na ki che ghwu kerẹ oro; ẹkẹvuọvo esivwo Mẹ kọ dia bẹdẹ, esivwo Mẹ gbi se vwo oba bẹdẹ-ẹ.

⁷Kerhọn Mẹ, ovwan ihwo re riẹn ọvwata, ihwo re urhi Mẹ dia evun rayen, wa dje oshọ rẹ ẹghwọ rẹ ihwo rẹ akpọ-ọ, we jẹ ofu dje ovwan rẹ ayen da harhe owẹ-ẹ.

⁸Kidie eghwọghwọ cha re ayen kerẹ ewun, ihori ke cha re ayen kerẹ ẹton rẹ ogegede; ẹkẹvuọvo esivwo Mẹ kọ dia bẹdẹ, arhọ Mẹ kọ dia kẹ uvwiẹ na ejobi.

⁹Vrẹn vrẹn, ku ogangan wẹn phihọ, E igbabọ rẹ Ọrovwohwo; vrẹn, kerẹ ọke rẹ awanre, kerẹ orua ro kri otọ re. Ọ dia owẹ re nyavwe Rahab ibribro, wẹ ri duvwu dragọn fi wan?

¹⁰Ọ dia owẹ re nẹrhẹ urhie na kpọ mu, ame okokodo rode na; we ri ru idjerhe phihọ okokodo rẹ urhie rere e ra tan hirhe na vwọ wan vrẹn?

¹¹i re si nẹ ijọpha re Ọrovwohwo na mrasan rhivwi, ayen Me rhe vẹ ine ẹsuọ vwọ rhe Zayọn, aghọghọ ri bẹdẹ na kọ dia uyovwi rayen, kẹ ayen vwo aghọghọ vẹ omavwerhe, te oja vẹ unuẹfiọn ke dje ghwru.

¹²Mẹvwẹ, Mẹvwẹ he ohwo ro bru we uche, ono owẹ rọ djẹ oshọ rẹ ohwo rẹ akpọ ro ghwẹ, re ọmọ re ohwo ra mare kerẹ odi ghevweghe,

¹³rẹ Ọrovwohwo chọẹro, Ọ rọ Ma wẹ, rọ riẹn odjuvwu phihọ rọ tọn uchivwo rẹ akpọ na phihọ, rọ djẹ oshọ kẹdẹ kẹdẹ fiki rẹ ophu rẹ ohwo ro shenyẹ ihwo na, ro phi oma rọye phihọ oghwọrọ? Ki tivo ophu rẹ ohwo ro shenyẹ na epha?

¹⁴Ohwo ro turuko jovwo cha kpoma vi nanana, o che ghwu rọ da yanran kpo obo Ukpotọ-ọ, eyẹ emuọre rọye se re-e.

¹⁵Kidie Mẹvwẹ Ọrovwohwo Ọghẹnẹ wẹn, ro kpogho abadi rọ ke họnra — Ọrovwohwo rẹ otuofovwi na ọye he odẹ rọye.

¹⁶Mi de phi ota mẹ phihọ unu wẹn, mi de si we nu vwẹ uhoho rẹ obọ mẹ, Me da riẹn idjuvwu na phihọ ma da ton uchivwo rẹ akpọ na phihọ, ta ke Zayọn nẹ, Ovwan ihwo Mẹ.

¹⁷Jẹjẹ oma wẹn, Jẹjẹ oma wẹn, Vrẹn mudia, E Jerusalẹm, we rọ da evun vọn vwẹ obọ rẹ Ọrovwohwo uko re ophu rọye, rọ darọ da ekete udjokpo re egele na.

¹⁸Ovwo ohwo ọvuọvo ro suo-o vwẹ usun rẹ emọ rọ vwiẹri na, o vwo ohwo ọvuọvo rọ yọnrọn obọ-ọ vwẹ usun rẹ emọ rọ yọnre ghwẹro na.

¹⁹lmu ivẹ nana ri she vwa wẹn — kono ri bru we uche? — evẹre kugbe ẹghwọrọ, owẹvwe kugbe ọlọkọ; kono ri se bru we uche?

²⁰Emọ wẹn shero, ayen riẹn phihọ unuada rẹ urhuvwu kerẹ uguzuma ro mu ariri, ayen vọnre vẹ ophu rẹ Ọrovwohwo, ekan eharhọ rẹ Ọghẹnẹ wẹn

²¹Fiki rẹ ọtiọye na, gbe nyo ọnana, ovwan re he ukpokpogho rẹ udi muẹ, ẹkẹvuọvo ye wa da udi-i:

²²E nẹ Ọrovwohwo wẹn tare, Ọrovwohwo na, Ọghẹnẹ wẹn ro mie we unu vwo guẹ kẹ ihwo rọye: Nighere, Me reyọ udjokpo rẹ egele mie we obọ; udjokpo rẹ ophu Mẹ wọ gbe cha da ọfa-a,

²³Ki Mi phio phihọ obọ rẹ ihwo ri gbe oja kẹ wẹ, re ta kẹ wẹ nẹ, Rhuẹn kpotọ, rere Me shariẹ owẹ vrẹn, Yi wo ru ugbuko wẹn kerẹ otọ kere urhuvwu kẹ ayen otu re wan vrẹn