Read urhobo Aizaya 53 Bible Online

Aizaya 53 - urhobo bible

Aizaya 53

¹Ono ri se iyenren rẹ avwanre gbuyota? ono a vwẹ igbabọ rẹ Ọrovwohwo phia kẹ?

²Kidie ọ rho vwẹ irharo rọye kerẹ urhe ọboba, kerẹ owọ rẹ urhe rọ djẹ nẹ otọ ọyaya rhe, o vwo irhen eye erhuvwu ro siurhuru re vwo no-o, erhuvwu ọvuọvo rhere ro vwo je ohwo-o.

³A jẹrẹfia ihwo serọ, ohwo re oja, ivuemiovwo rierierẹ oma, kerẹ ohwo ra mrẹ si opharo djẹ, a jẹrẹfia, avwanre sere gbe ohwo-o.

⁴Uyota ọye re ghwa odjadja rẹ avwanre, o de mu oja rẹ avwanre, dede na ohwo ra ghwiẹre na Me sere gbe ohwo-o, re Ọghẹnẹ ghwiẹrẹ, ra fare.

⁵Ẹkẹvuọvo a wanrọ oma fiki rẹ ogbeku rẹ avwanre, e bobiro oma fiki rẹ orukuruku rẹ avwanre, ophiaphie ro ru avwanre fon na ọye a vwọ fa, ophiaphie na keye e vwo sivwi avwanre.

⁶Avwanre ejobi kerẹ igodẹ suoso ghwru, dohwo didjerhe rọye vwo gbe, Ọrovwohwo dẹ kru nyẹ oghwa rẹ orukuruku rẹ avwanre ejobi.

⁷Eshenye, e gbe oja kẹ re, dede na o rhie unu rọye-e; kerẹ ọgegede ro diunu re re hwe, kerẹ ogegede ra ra bọrọ ẹton nu diunu na, eriyin o rhie unu rọye-e.

⁸Vwẹ oshenyẹ vẹ obruhwe a vwo reyọ yanran; vwọ kẹ uvwiẹ rọye, kono ro roiro nẹ e bruro kufia nẹ otọ rẹ ihwo ekpokpọ, a ghwiẹrẹ fiki rẹ ogbeku rẹ ihwo Mẹ.

⁹A da tọn ushi rọye kugbe iruimwemwu ọ vẹ ọdafe ọvo vwe ughwu rọye, ẹkẹvuọvo o gbe ozighi-i, o vwo ophiẹvwe ọvuọvo vwẹ unu rọye-e.

¹⁰Dede na yo je Ọrovwohwo nẹ ọ ghwiẹ, o da vwẹ oja riọ, vwẹ ọke rọ vwọ reyọ vwo ze izobo rẹ umwemwu nu, kọ cha mrẹ uvwiẹ rọye, ko ru ẹdẹ rọye yovwi, ọhọre rẹ Ọrovwohwo ko che yovwi vwẹ obọ rọye,

¹¹kọ cha mrẹ omamọ rẹ uvwiẹ ẹchuẹ rẹ erhi rọye evun kọ vọn, vwẹ erianriẹn rọye ọye ọvwata mẹ na, odibo mẹ, vwo ru ihwo buebu phihọ ọvwata; ko mu oghwa rẹ orukuruku rayen.

¹²Fiki rẹ ọtiọye na ke Me ghare ẹkẹn te vwẹ usun rẹ ihwo ride, ọ vẹ egba keye gba ghare ughwẹ; kidie o ku ọbara rọye phihọ otọ kẹ ughwu, e de kere kugbe otu ri gburhi ku; yẹ ọye re ghwa umwemwu rẹ ihwo buebu, ọ da re orẹ vwọ kẹ otu ri gburhi ku.