Read urhobo Aizaya 58 Bible Online

Aizaya 58 - urhobo bible

Aizaya 58

¹Bunu gangan, wo jovwo-o, van kperi kerẹ ekper-ẹ dje ogbeku re ihwo mẹ kẹ ayen, dje kẹ uwevwi ri Jekọp umwemwu rayen.

²Dede na yẹ ayen guọnọ ovwẹ kẹdẹ kẹdẹ, yẹ ayen guọnọ idjerhe mẹ riẹn vẹ aghọghọ, kerẹ ẹgborho ri ruẹ ọvwata re mrẹ iji rẹ Ọghẹnẹ rayen djẹ-ẹ; ayen nọ ekpẹn rẹ orhiebro rẹ ọvwata vwẹ obọ mẹ, ayen vwẹ omavwerhe vwo si kẹrẹ Ọghẹnẹ.

³Die avwanre vwo chirẹ owẹvwe, yu wọ gbe mrẹ-ẹ? Die avwanre vwọ vwẹ oma re avwanre kpotọ, yo wọ gbe rha riẹ-ẹn? Nighere, ẹdẹ wo de chire owẹvwe na yẹ avwerhe rẹ obọ wẹn wọ guọnọ, wo mie shenyẹ iruiruo wẹn.

⁴Nigherẹ, wo chire owẹvwe re wọ vwọ mrasan ghwọ họnre re wọ vwẹ ọchẹn phi ihwo. Owẹvwe echiro kerẹ owẹ na nonẹ na cha sa nẹrhẹ enyo urhuru wẹn vwẹ obenu-u.

⁵Oghẹre rẹ owẹvwe ọtiọna Me guọnọre, re ohwo vwọ vwẹ oma rọye kpotọ? Rere o vwo gbe uyovwi hẹ otọ kerẹ eyareya, rere ọ vwọ vwẹ esiso kugbe iwurhie hwa otọ? wo se ọnana owẹvwe echiro, kugbe ẹdẹ rẹ Ọrovwohwo jẹreyọ?

⁶Ọ dia oghẹre rẹ ewẹvwe ọtiọna Me jẹreyọ ra vwọ rhan ifi rẹ umwemwu, re vwo vwrẹn ifi rẹ urhekpe, re siobọ nẹ ohwo re shenyẹ kpo ọphẹ, rere e vwirhi kurhekpe kurhekpe?

⁷Ọ dianẹ wa vẹ ihwo rẹ owẹvwe hwe gba ghare emu wẹ-ẹn, ra reyọ ivwiogbere ri vwo uwevwi-i vwo kpo uwevwi wẹ-ẹn; ọke wọ da mrẹ ohwo rọ ba phihọ, wo mi rhuo, ne wo gbi si oma wẹn nẹ kẹ omobọ wẹ-ẹn?

⁸Ọke yena urhukpẹ wẹn kọ cha la phia kerẹ uvo, esivwo wẹn kọ cha va phia kpata kpata, ọvwata wẹn kọ cha ka obaro kẹ wẹ, urinrin rẹ Ọrovwohwo kọ ka ubuko kẹ wẹ.

⁹Ọke yena ku wo se, Ọrovwohwo ko nyo, ku wo kperi, kọ ta kẹ wẹ nẹ, Mẹvwẹ na. Ọ da dianẹ we si urhekpe na nẹ uherevie rẹ ovwan urhiabọ ra riẹn, kugbe ota umwemwu ra ta,

¹⁰ọ da dianẹ wọ ku oma wẹn phihọ otọ kẹ ihwo rẹ owẹvwe hwe rẹ evun da vọn ẹguọnọ re otu re hẹ ukpokpogho, ọke yena urhukpẹ wẹn ko che vrẹn vwẹ ẹvun rẹ ebri egho wẹn kọ cha dia kerẹ oghẹruvo.

¹¹Ọrovwohwo ko sun we kọke kọke, kọ vwẹ emu esiri vọn ẹguọuọ wẹu evun, kọ ru ibeku wẹn gan, ku wọ họhọ ogba re ku ame ku, kere ogbugbu rẹ ame, rẹ ame rọye jẹ ẹkpọ.

¹²Iwevwi rẹ awanre ri sheri ejobi ka rhoma bọn ayen, ku wọ vwẹ uchivwo rẹ uvwiẹ buebu vwo chivwi otọ; ke se we nẹ ọrhuẹrẹ iphrophro, ọrhuẹrẹ rẹ irhuvwu re i ja dia.

¹³Ọ da dianẹ wo chuko wẹ ku ẹdidjala na, wo de gbobọnyẹ avwerhe wẹn vwẹ ẹdẹ ọfuanfon mẹ na, wo de se ẹdidjala na ẹdẹ avwerhe, ẹdẹ ọfuanfon rẹ Ọrovwohwo na ẹdẹ rẹ ọghọ; wo de mu ọghọ kẹ, wo rhe nene idjerhe rẹ obọ wẹ-ẹn eyẹ wọ rha guọnọ avwerhe rẹ obọ wẹ-ẹn, wo de gbe ikun ogbigbigbe-e,

¹⁴ọke yena ku wo vwo avwerhe vwẹ evun rẹ Ọrovwohwo, ki Mi ru we vwọ gua vwẹ obenu rẹ akpọ na; ke Me vwẹ uku ri Jekọp ọsẹ wẹn vwọ ghẹrẹ owẹ, kidie unu rẹ Ọrovwohwo re tarọ.