Read urhobo Aizaya 59 Bible Online

Aizaya 59 - urhobo bible

Aizaya 59

¹Nighe, obọ rẹ Ọrovwohwo krẹnọ-ọ, ro de je se sivwo-o, eyẹ erhọn rọye diri, ro de je ẹme enyo-o,

²ẹkẹvuọvo imwemwu wẹn phi ohẹriẹ phihọ uvwre wẹn vẹ Ọghẹnẹ wẹn, umwemwu wẹn nẹrhẹ o si opharo rọye nu kẹ wẹ fiki rẹ ọtiọye na o gbi nyo-o.

³Kidie abọ wẹn gbe ẹgua rẹ ọbara irhiabọ wẹn vẹ orukuruku, ẹbẹrunu wẹn vwọrọn efian, ẹrenvwe wẹn re de irhivwẹ vwẹ evun rẹ umwemwu.

⁴O vwo ohwo ọvuọvo ro brorhiẹ rẹ ọsoso-o, o vwo ohwo ọvuọvo ro vwẹ evun esiri kpo ẹdjọ-ọ; ayen vwẹ ẹro so orẹ ofefe, ayen vwọrọn efian, ayen mrevun rẹ ozighl ayen de vwiẹ orukuruku.

⁵Ayen sa ikẹn rẹ ọrobiebi, ayen rhuo uwevwi rẹ akpẹkpẹ; ohwo rọ re ikẹn na ghwuru, nẹ evun rẹ ikẹn ra guọghọre na etiyin a da sa ọrobiebi.

⁶Uwevwi rayen che je vwo ru amwa-a; ihwo sa vwẹ amwa ra vwẹ ayen ru phopho-o. Iruo rayen iruo rẹ umwemwu, uruemu rẹ ozighi vọn abọ rayen.

⁷Awọ rayen djẹ ro umwemwu, ayen bru okpakpa suẹn ọbara rẹ ọvwata te otọ, iroro rayen iroro rẹ orukuruku, evẹre vẹ ẹghwọrọ e hẹ idjerhe rayen.

⁸Idjerhe rẹ ufuoma ayen riẹnrẹ-ẹ, o vwo ọsoso vwẹ idjerhe raye-en; ayen ru idjerhe rayen gugunu, o vwo ohwo ọvuọvo rọ wanrọ rọ riẹn ufuoma-a.

⁹Fiki rẹ ọtiọye na ọsoso vwo sheri kẹ avwanre, ọvwata rha sa djẹ mu avwanre-e, avwanre rhẹro rẹ urhukpẹ, nighere, kẹ ebri a mrẹre, elo, ẹkẹvuọvo kẹ egho avwanre da yan.

¹⁰Avwanre vwẹ abọ gbe igbẹhẹ kerẹ orhuẹro, avwanre vwẹ abọ gbe kerẹ ohwo ro vwo ẹro-o, avwanre ghorie she vwẹ oghẹruvo kerẹ ason, vwe uherevie rẹ ihwo gbrọgbrọ avwanre ke họhọ ihwo ri ghwuru.

¹¹Avwanre di muẹ guan kere ikorhi, avwanre di brenu, brenu kerẹ inekuku, avwanre rhẹro rẹ ọsoso, ẹkẹvuọvo kaka a mrẹre-e, rẹ esivwo, ẹkẹvuọvo ọ vẹ avwanre pha shesheri.

¹²Kidie ogbeku rẹ avwanre rhi bu phihọ vwẹ obaro wẹ, umwemwu rẹ avwanre se iseri hwe avwanre, kidie ogbeku rẹ avwanrc vẹ avwanre herọ, avwanre riẹn orukuruku rẹ avwanre:

¹³ogbeku, kugbe ẹsiọn rẹ Ọrovwohwo, kugbe uko re chuku Ọghẹnẹ rẹ avwanre, ota rẹ oshenyẹ eta kugbe ozighi egbe, iroro umwemwu re roro vwẹ udu kugbe ota re efian ra tanẹ udu cha.

¹⁴Ọsoso rhoma kpuko, ọvwata de tephe shesheri; kidie uyota she phihọ ọsuere, uyota gbe sa ruọ-ọ.

¹⁵Uyota kanre, ohwo ro si oma nẹ umwemwu vwe oma rọye mu ufi. Ọrovwohwo mrẹre, o gbi rhe je-e nẹ ọsoso herọ-ọ.

¹⁶Ọ mrere nẹ o vwo ohwo ọvuọvo-o o de gbe unu nẹ a mrẹ ohwo ro vwrẹ ohọnre-e; etiyin ugbobọ rọye da kẹ ephiokparobọ, ọvwata rọye kọye re yọnrerọ.

¹⁷Ọ da gba ọvwata mu ohọre kerẹ emekpo-udu, erhu rẹ esivwo ro vwo tughẹ uyovwi, o ku iwun rẹ ihri-eriọ phihọ kerẹ amwa, ọ da vwẹ ophu phopho oma kerẹ okpa.

¹⁸Kirobo rẹ uruemu rayen epha, eriyin ọ hwa osa te, ophu vwọ kẹ ukọn umwemwu rọye, osa ẹhwa kẹ ivwighrẹ rọye; vwọ kẹ erhuru na ọ cha hwa osa kẹ ayen.

¹⁹Ọtiọye na kẹ ayen cha djẹ oshọ rẹ Ọrovwohwo nẹ obuko ọnre rhe, urinrin rọye nẹ ẹvacha rẹ ọnre rhe, ọ cha rhe kerẹ uto rọ dje ọkẹre rẹ odju rẹ Ọrovwohwo muẹ vwọ djẹ.

²⁰Kọ cha rhe Zayọn kerẹ Ọtan, bru otu ri Jekọp ri kurhẹriẹ nẹ ogbigbiru, eriyin Ọrovwohwo tare.

²¹Vwọ kẹ vwẹ, Ọnana ọphọ re Me, vẹ ayen rere, eriyin Ọrovwohwo tare: erhi Mẹ rọ hẹ enu wẹ, kugbe eta Mẹ ri mi phi họ unu wẹn, che se nẹ unu wẹ-ẹn, eyẹ unu rẹ emọ wẹ-ẹn, eyẹ vwo nẹ unu rẹ ivwrọmọ wẹ-ẹn, eriyin Ọrovwohwo tare, nẹ ọke nana yanran rhiri bẹdẹ.