Read urhobo Aizaya 6 Bible Online

Aizaya 6 - urhobo bible

Aizaya 6

¹Vwẹ ukpe rẹ Ovie Uzaya ghwuru na me da mrẹ Ọrovwohwo ro tidia phihọ enu re ekete, ro kpenu gogorogo, ejọjọ rẹ ewun rọye da vọn ọgua na.

²Emakashe de mudia obaro rọye; ọvuọvo vwọ ibekpe esan, ọ vwẹ ivẹ rhurhu opharo, ọ vwẹ ivẹ rhurhu awọ, ivẹ kọye ọ vwọ rhan.

³Ọvo de se ọrivẹ ọ da tanẹ: Ẹfuọn, ẹfuọn, ẹfuọn ọye Ọrovwohwo rẹ otuofovwi na; akpọ na ejobi vọnre vẹ urinrin rọye.

⁴Uchivwo rẹ anurhoro na de kpogho rẹ urhuru na vwo se, uwevwi na da rhe vọn vẹ ivwirhi.

⁵Etiyin me da ta Ekan kẹ vwẹ! Fikiridie mi ghwruru, fikiridie mẹvwẹ ohwo rẹ ẹbẹrunu rọye jẹ ẹfuọn, me ke rha dia ohri rẹ ihwo rẹ ẹbẹrunu rayen jẹ ẹfuọn, fikiridie ẹro mẹ mrẹ Ovie na, Ọrovwohwo rẹ otuofovwi na!

⁶Etiyin ọvo vwẹ usun rẹ emakashe na da rhan bru vwe rhe, ọ vẹ umwerhanre weiwei vwẹ obọ rọ vwẹ ahwa mu nẹ agbada na rhe.

⁷O de vwo te unu mẹ o da ta: Nighere, Ọnana te ẹbẹrunu wẹn re; abe wẹn a kpaherọ kufia, a vwẹ umwemwu wẹn ghovwo uwe

⁸Mi de nyo urhuru rẹ Ọrovwohwo rọ tanẹ, Ono mi ji, kono re ra kẹ avwanre? Etiyin me da ta, Mẹvwẹ na! Ji vwe

⁹O da ta, Yanran, ra ta kẹ ihwo nana: Enyo we nyo, ẹkẹvuọvo wa san riẹn otọ rọye-e; ẹmrẹ wa mrẹ, ẹkẹvuọvo we se vughe-e.

¹⁰Ru udu rẹ ihwo nana vwo ọkpan, re erhọn rayen di, rhurhu ẹro rayen, ayen da vwẹ ẹro rayen mrẹ orẹ, ayen da vwẹ erhọn rayen nyo ẹme, ayen da vwẹ udu rayen vughe, ayen de kurhẹriẹ e de sivwi ayen.

¹¹Etiyin me da ta, Mavọ O krite, E Ọrovwohwo? Ọ da ta: Bẹsiẹ rẹ irere na vwọ dia ofefe re kaka ohwo gbe dia-a ihwo gbe dia evun re iwevwi na-a otọ na ejobi vwọ dia ofefe,

¹²rẹ Ọrovwohwo da kua ihwo na shesheri, asan ra kua jovwo ke cha dia buebu vwẹ uherevie rẹ otọ na.

¹³Ọ da tobọ dianẹ ẹkehwe chekọ vwọ, a cha torhẹ kirẹ uloho eyẹ ọhahe, rẹ uchuku rọye chekọ siẹ re de she nu. Ubi ọfuanfọn na ọye hẹ uchuku na.