Read urhobo Aizaya 60 Bible Online

Aizaya 60 - urhobo bible

Aizaya 60

¹Vrẹn lo, kidie urhukpẹ wẹn rhire, urinrin rẹ Ọrovwohwo bẹre mu we re.

²Kidie nighere, ebri che rhurhu akpọ na, egho prirhẹ che rhurhu ihwo na; ẹkẹvuọvo Ọrovwohwo che vrẹn vwọ kpahe owẹ, ka cha mrẹ urinrm rọye vwẹ oma wẹ.

³Irere buebu ki che bru urhukpẹ wẹn na rhe, ivie ki bru elo wẹn ro vacha na rhe.

⁴Kpare ẹro wẹn ri wo ni riariẹ, re wọ mrẹ; ayen ejobi ghwẹ oma koko, ayen bru we cha, emọ wẹn che nẹ ogboko rhe, emetẹ wẹn ke che mu ayen kpahe igbabọ.

⁵Etiyin ayen ke cha mrẹ ke ayen sa edada rẹ elo, udu wẹn kọ vọn vẹ omavwerhe vẹ aghọghọ; fikiridie oburhubu rẹ abadi na ejobi ki rhivwi bru uwe, efe rẹ ẹgborho na ki che bru we rhe.

⁶Urogho rẹ iyesi ko rhurhu we pitiki, upene re iyesi ri Midian kugbe Ephah, otu ri Sheba ejobi cha rhe. Ayen cha ghwẹ oro vẹ adjija rhe, ayen ke che ghwoghwo urinrin rẹ Ọrovwohwo.

⁷Uchuru ri Keda ejobi ke ghwẹ koko bru we rhe, egho ri Nebaiọth che gbe odibo kẹ wẹ, ayen cha rhe vẹ ẹreyọ vwẹ enu rẹ ẹshẹ Mẹ, ke Me vwẹ ejiro kẹ uwevwi rẹ urinrin mẹ na.

⁸Ena amono re rhan kerẹ ikoro na, kerẹ inekuku re rhan kpo evakpo rayen na?

⁹Kidie erhuru na cha hẹrhẹ ovwẹ, ekpo ri Tarshish re dia ẹsosuọ, re cha reyọ emọ wẹn nẹ ogboko rhe, cha reyọ idọnọ vẹ iro boma rhe, fiki rẹ odẹ rẹ Ọrovwohwo Ọghẹnẹ wẹn, kugbe Ọfuanfon Ọvuọvo rẹ Izrẹl na, kidie ọ vwẹ urinrin kẹ wẹ.

¹⁰Erhorha keye che fi igbẹhẹ wẹn kẹ wẹ, ivie rayen ki che gbe odibo kẹ wẹ, kidie vwẹ ophu Mẹ Me da ghwiẹ wẹ, ẹkẹvuọvo vwẹ evun esiri Me da re ehrọre wẹ.

¹¹Ke rhie anurhoro weẹ phihọ kẹse kẹse, te ason te uvo e gbi huhu aye-en; rere ihwo vwọ ghwẹ efe rẹ ẹgborho na rhe we, vẹ ivie rayen re tẹrẹ usun.

¹²Kidie ẹgborho na vẹ uvie na re ga we-e na ke ghwọrọ kufia, ẹgbọrho yena ke ghwọrọ kufia tototo.

¹³Urinrin ri Lẹbanọn ko bru we rhe, Te owangha te afon, te ubioriẹn, ke cha vwẹ erhuvwu vwọ keẹ ẹshẹ Mẹ, ki Mi ru asan Me ghwẹ awọ phihọ vwo vwo urinrin.

¹⁴Emọ re ihwo ri shenyẹ wẹ ke cha rhe ri shiguẹ te otọ kẹ wẹ, kugbe ihwo ejobi re je wẹ fia ki che shiguẹ vwẹ asan awọ wẹn, ke ayen che se we Orere rẹ Ọrovwohwo, Zayọn rẹ Ọfuanfon Ọvuọvo rẹ Izrẹl na.

¹⁵Kirobo ra sen wẹ re tuoma wẹ jovwo na, re ohwo ọvuọvo wan wẹ vrẹn jovwo-o na, ki Mi ru we rhuarho bẹdẹ, aghọghọ nẹ oge re te oge.

¹⁶Wo che viẹ ame ivie rẹ ẹgborho na, ku wo viẹ ivie rẹ ivie; ku wọ riẹn nẹ Mẹvwẹ, Ọrovwohwo na, Osivwi wẹn Ọtan wẹn, Ọgba Ọvuọvo ri Jekọp na.

¹⁷Vwẹ ẹdia re odje ke Me kẹ wẹ oro, vwẹ ẹdia re utehru ke Me kẹ wẹn idọnọ, vwẹ ẹdia rẹ urhe, odje, vwẹ ẹdia re oragha, utehru. Ki Mi ru olori rẹ ovwan ufuoma onotu rẹ ovwan kẹ ọvwata.

¹⁸E gbi nyo umri rẹ ozighi vwẹ otọ wẹn na-a, evẹre eyẹ ẹghwọrọ vwẹ ughwru wẹ-ẹn; ku wọ se igbẹheẹ na Esivwo, anurhoro wẹn kẹ Ejiro.

¹⁹Ọnre gbe cha dia urhukpẹ wẹn vwẹ ogheruvo-o, eyẹ elo rẹ emeranvwe gbe sa kẹ wẹ orẹmrẹ vwe aso-on, ẹkẹvuọvo Ọrovwohwo kọ dia urhukpẹ wẹn bẹdẹ, Ọghẹnẹ wẹn kọ dia urinrin wẹn.

²⁰Ọnre wẹn gbi che she kpotọ-ọ, eyẹ emeranvwe wẹn gbi si reyọ-ọ, kidie Ọrovwohwo re cha dia urhukpẹ wẹn bẹdẹ, ẹdẹ rẹ oma emuophihọ ko che vwo oba.

²¹Ihwo wẹn ejobi ke cha dia evwata; ayen ki che vwo otọ na bẹdẹ, eyoro cha rẹ ekankọn Mẹ, iruo re abọ Mẹ, rere a mrasan vwe urinrin kẹ vwẹ.

²²Unuwevwi ọvo ko hirhe phihọ ẹgborho, ọ rọ ma havwe ejobi kẹ ẹgborho rode, Mẹvwẹ he Ọrovwohwo na; vwẹ ọke rọye ki Mi ruo kpata kpata.