Read urhobo Aizaya 7 Bible Online

Aizaya 7 - urhobo bible

Aizaya 7

¹Vwẹ ọke rẹ Ehaz ọmọ ri Jotam, ọmọ rẹ Uzaya, Ovie ri Juda, Rezin Ovie ri Siria kugbe Pekah ọmọ rẹ Remaliah, ovie rẹ Izrẹl da kpare ofovwi kpo Jerusalẹm, ẹkẹvuọvo ayen se phio kua-a.

²Ọke ra vwọ ta kẹ uwevwi ri Devid nẹ, Siria vẹ Ifrem kuoma kugbe, udu rọye kugbe udu re ihwo rọye de kpogho kẹre irhe rẹ egbo rẹ odju kpogho.

³Ọrovwohwo da ta kẹ Aizaya, Yanran ra vwa Ehaz, wẹn kugbe Shejashub rẹ ọmọ wẹn, vwẹ obo oba rẹ ugbogho rẹ ame rẹ ẹtẹrhe rẹ hẹ obenu rẹ idjerhe rode rọ wan kpe asan ra da fọrhọ emwa,

⁴re wọ ta kẹ, Kẹnẹ oma, wo hwe oma mu wọ djẹ oshọ-ọ, wo je udu bru uwe fiki rẹ uchuku rẹ utuerhanre ive nana-a, fiki rẹ ophu ọtuatua rẹ Rezin kugbe Siria kugbe ọmọ ri Remeliah.

⁵Fikiridie Siria, vẹ Ifrem kugbe ọmọ ri Remaliah, ayen jẹn iroro ọbrabra kpahe owẹ tanẹ,

⁶E jẹ avwanre kpare ohọnre vwọ so Juda re eguegue, rere avwanre phio kua kẹ oma rẹ avwanre, rere a reyọ ọmọ ri Tahe-el vwo mu ovie vwẹ ẹdia rọye.

⁷Enẹ Ọrovwohwo Ọghẹnẹ tare O che se mudia-a, O che se ruo-o.

⁸Kidie uyovwi ri Siria ọye Damaskọs, uyovwi ri Damaskọs ọye Rezin. (Bẹsiẹ ro vwo te ikpe ujorha gbe iyori ka cha guọghọ Ifrem ibribro ayen gbe cha dia ihwo ọfa-a)

⁹Uyovwi rẹ Ifrem ọye Sameria, uyovwi ri Sameria ọye ọmọ rẹ Remeliah Wọ rhe se segbuyota-a, uyota wo rhe se mudia ga-an.

¹⁰Ọfa Ọrovwohwo da ta kẹ Ehaz,

¹¹Nọ ekpẹn rẹ oka vwẹ obọ rẹ Ọrovwohwo rẹ Ọghẹnẹ wẹn; gbe je okodo prẹ kerẹ erivwi eyẹ okpenu kerẹ odjuvwu.

¹²Ẹkẹvuọvo Ehaz da ta, Me sa nọ-ọ, me je sa davwe Ọrovwohwo ni-i.

¹³O da ta, Gbe nyo E uwevwi ri Devid! Emu otete re wọ vwọ lagha ihwo, rere wọ je lagha Ọghẹnẹ me rhe?

¹⁴Fiki rẹ ọtiọye na Ọrovwohwo ọvo kọye cha vwẹ oka kẹ wẹn. Nighe, eghene aye cha mrevun, ko che vwiẹ ọmọ, ke se odẹ rọye Imanuẹl.

¹⁵O cha re ameive ro djeri kugbe onyọn vwẹ ọke rọ da riẹn obo ra sian ọbrabra ra jẹn ọresiri.

¹⁶Kidie bẹsiẹ rẹ ọmọ na vwo riẹn obo ra sian ọbrabra ra jẹn ọresiri, otọ rẹ ivie ivẹ na ri mu ovwan oshọ na, ke cha dia ofefe.

¹⁷Ọrovwohwo cha vwẹ ẹdẹ kẹ wẹ kugbe ihwo wẹn vẹ uwevwi rẹ ọsẹ wẹn tiẹ oghẹre rẹ ẹdẹ ọtiọye rọ je rhe dẹvo-o rẹ Ifrem vwọ hẹriẹ oma nẹ Juda na — Oviẹ rẹ Asiria.

¹⁸Vwẹ ẹdẹ yena Ọrovwohwo na kọ cha kudje kẹ uyẹn rọ hẹ obọ esiri rẹ imirho rẹ Ijipt, vwọ kẹ ọnyọn rẹ hẹ obotọ re Asiria.

¹⁹Ayen ejobi ke cha rhe ri wo phihọ ikpotọ chochohri na, ọ vẹ igbogho rẹ eragha na, ọ vẹ aghwa re inwe na, kugbe enu rẹ odi na.

²⁰Vwẹ ẹdẹ yena Ọrovwohwo kọ vwẹ are wanre ihwo re durhie nẹ ovrẹn rẹ Urhie na rhe — vẹ ovie rẹ Asiria — uyovwi vẹ ẹto rẹ awọ ka je wanre ẹtuegba rayen rhe.

²¹Vwẹ ọke yena ohwo ko churu ọmọ rẹ erhuẹn kugbe imigodẹ ivẹ;

²²fiki rẹ ameivie buebu ro che hwẹ kẹ, kọ re ameivie ri djeri; kohwo kohwo ro chekọ otọ na kọ re ameivie ro djeri kugbe ọnyọn.

²³Vwẹ ẹdẹ yena kasan kasan rẹ irhe ri vain uriori djẹ phihọ, re ghare te ovwanvwọn rẹ idọnọ uriori ko che hirhe phihọ ekpia vẹ Idjighe.

²⁴Umurhabọ vẹ Ibigẹ kọye ihwo cha ghwa kpo etiyin, kidie otọ na ejobi cha vọn vẹ ekpia kugbe idjigbẹ;

²⁵vwo kẹ igbenu na ejobi ra vwẹ eghwro voro jovwo na, wo gbi yivwi si kẹrẹ-ẹ vẹ oshọ rẹ ekpia vẹ idjigbe; ẹkẹvuọvo kẹ ayen họhọ asan rẹ irhuẹn vẹ igegede che gbe sẹkẹ sẹkẹ.