Read urhobo Aizaya 8 Bible Online

Aizaya 8 - urhobo bible

Aizaya 8

¹Etiyin Ọrovwohwo da ta kẹ vwẹ nẹ, Reyọ ophapha rode ri wo si phihọ re ihwo ejobi se vughe, Ophapha re Mahashalal-hashbaz.

²Me da reyọ omamọ rẹ iseri, Yuraya rẹ orherẹn kugbe Zekaraya, rẹ ọmọ ri Jebirikaya, ri se iseri kẹ vwẹ.

³Mi de bru ọmraro rẹ aye na ra, ọ da mrevun o de vwiẹ ọmọshare. Etiyin Ọrovwohwo da ta kẹ vwẹ, se odẹ rọye Mahashalal-hashbaz;

⁴kidie tavwe re ọmọ na kẹ riẹn obo re se Ọsẹ mẹ eyẹ Oni mẹ, efe ri Damaskọs vẹ eyere ri Sameria ejobi ka cha kua ayen yanran vwọ rhe ovie rẹ Asiria.

⁵Ọrovwohwo da rhoma ta kẹ vwẹ.

⁶Fikiridie ihwo nana sen ame ri Shiloah rọ djẹ vwiọrọvwiọrọ na, ke wra fiki rẹ oshọ ri Rezin ọmọ ri Rimaliah,

⁷fiki rẹ ọtiọye na nighe, Ọrovwohwo cha reyọ ame rẹ Urhie na vwo ku ayen ame rode buebu, ovie rẹ Asiria kugbe urinrin rọye ejobi; ame na ko che phoro igbo na ejobi kugbe egbẹn rayen,

⁸kọ hworhẹ ayen rọ Juda, kọ vọn hwẹ o me djẹ hẹ obaro, bẹsiẹ ro vwo te ohọre, ko che ku reghereghe te asan re otọ wẹn heri te, E Imanuẹl.

⁹Je oma ghwọrọ ovwan ihwo na, re oma rhọ ovwan, kerhọn, ovwan ihwo rẹ irere oshesheri; chobiẹ re oma ghwọrọ ovwan; wa chobiẹ re oma ghwọrọ ovwan.

¹⁰Wa jẹ iroro kugbe, ẹkẹvuọvo o che vwo otọ-ọ ta ota ọvo ẹkẹvuọvo o che mudia-a, kidie Ọghẹnẹ vẹ avwanre herọ.

¹¹Kidie enẹ Ọrovwohwo ta kẹ vwẹ vẹ obọ ọgangan rọye rọ ghwẹ kpahọ vwẹ, ọ da kpa okpa kẹ vwẹ nẹ me wan idjerhe rẹ ihwo nana-a, tanẹ.

¹²Wo se ọnana ero-o, ọnana rẹ ihwo na ejobi se ẹro na, wọ djẹ oshọ rẹ obọ rayen djẹ oshọ rọye na-a, eyẹ wọ phariẹ-ẹ.

¹³Ẹkẹvuọvo Ọrovwohwo rẹ otuofovwi na, ọye ọvo wọ reyọ nẹ ọ fonro rọ dia oshọ wẹn, re ọ je dia ophariẹ wẹn.

¹⁴Kọ cha dia ẹshẹ kugbe oragha rẹ ogbeku kugbe uchukurhe umwemwu kẹ uwevwi ivẹ rẹ Izrẹl ufi kugbe ugodo kẹ ihwo re dia Jerusalẹm.

¹⁵Buebu ki che she teyọ, ayen che she ayen mi vwirhi, ufi che mu ayen reyọ.

¹⁶Gba Iseri mẹ na, ka oka phihọ uyono mẹ vwẹ ohri rẹ idibo mẹ.

¹⁷Me hẹrhẹ Ọrovwohwo, ro si opharo rọye nu kẹ uwevwi ri Jekọp, ki mi phi ẹro phihọ.

¹⁸Nighe, Mẹvwẹ vẹ emọ rẹ Ọrovwohwo vwọ kẹ vwẹ na eka vẹ asaumwemwu ro nẹ obọ rẹ Ọrovwohwo rẹ ofovwi na rhe ke Izrẹl, Ọrovwohwo dia Ugbenu rẹ Zayọn.

¹⁹Ọke rẹ ayen da ta kẹ ovwan nẹ, Eru ẹboepha kugbe otu re azẹ ri tue, ihwo rhe brẹ Ọghẹnẹ rayen ra kpo epha-a? Kẹ ihwo ra bọ epha vwẹ obọ rẹ ohwo ghweghwu fiki rẹ ohwo ọkpokpọ?

²⁰Uyono na kugbe iseri na keye ayen bru ra! omuẹro kidie ota nana rayen tare na o gbi vwo ọke erhie kẹ aye-en.

²¹Ayen cha wan otọ na vrẹn, vẹ oma ẹghwọrọ rode kugbe owẹvwe; ọke rẹ owẹvwe de hwe ayen re, ophu ko mu ayen duvwu iyori kẹ ovie rayen kugbe Ọghẹnẹ rayen, ke ayen hirhe opharo ku enu;

²²ayen ki ni otọ na, ẹkẹvuọvo nighe, odjadja kugbe ebri hwi, omaemuohọ rẹ ivuemiovwo, ke keke ayen phihọ ebri hwi.