Read urhobo Aizaya 9 Bible Online

Aizaya 9 - urhobo bible

Aizaya 9

¹Ẹkẹvuọvo o gbi vwo omaemuohọ vwọ kẹ ihwo rẹ ivun miovwe-e. Vwẹ ọke rẹ awanre jovwo ọ da vwẹ otọ ri Zẹbulọn kugbe Naftali vwọ jehwẹ, ẹkẹvuọvo vwẹ ukuko na ko ru irere re obo urhie na yovwi, otọ re hẹ abọ oboyi ri Jọdan, Galili rẹ ọguagua na.

²Ihwo re yan vwẹ evun rẹ ebri jovwo rhe mrẹ urhukpẹ rode, ihwo re dia otọ rẹ ebri hwi, ayen urhukpẹ la mu.

³Wo ru irere na bu phihọ wo ru aghọghọ rọye rho phihọ, ayen ra ghọghọ vwẹ obaro wẹn kerẹ aghọghọ rẹ ọke ọrhọ, kerẹsiẹ rẹ ihwo a da ghọghọ rẹ ayen da ghare emu rẹ ofovwi.

⁴Kidie urhekpe re oghwa rọye, vẹ ugbọphogho rẹ igabọ rọye, ọkpọ rẹ oshenyẹ na, ku wo vwirhi ayen kerẹ ọke ri Midian.

⁵Kidie edo rẹ isabatọ rẹ ọgba ofovwi vwo chiyi otọ kugbe ewun ejobi ri gbunie ọbara ke torhẹ kerẹ irhe vwẹ erhanre.

⁶Kidie avwanre e vwiẹ ọmọ na kẹ, avwanre a vwẹ ọmọ na kẹ, isuesun na kẹ igabọ rọye ọ cha dia, ke se odẹ rọye Ọgba-Aghwanre, Ọghẹnẹ ro vwo Ogangan, Ọsẹ ri Bẹdẹ, Ọmọ rẹ ovie rẹ Ufuoma.

⁷Obuebu rẹ isuesun rọye vẹ ufuoma rọye se vwo oba-a vwe enu rẹ ekete ri Devid, kugbe enu rẹ uvie rọye, rọ tọn phihọ, rọ yọnrọn vwẹ ọsoso vẹ ọvwata ne ọke nana yanran rhiri bẹdẹ. Oruru rẹ Ọrovwohwo rẹ otuofovwi na yi ri ru ọna.

⁸Ọrovwohwo vuẹ uwevwi kpahe Jekọp, ko pho mu Izrẹl,

⁹Ihwo na ejobi ke riẹn, Ifrem kugbe ihwo ri Sameria ejobi, re vwẹ eheri vẹ eyan vwọ ta vwẹ udu rayen.

¹⁰Ikori ekpẹn na she re, ẹkẹvuọvo avwanre vwẹ eragha ra kare vwọ bọn, e she sikamọ na teye otọ ẹkẹvuọvo ke phi igedu phihọ ẹdia rọye.

¹¹Eriyin Ọrovwohwo reyọ ukon vwọ so ayen, ọ me kpare ophu rẹ ivwighrẹ rayen.

¹²Otu ri Siria vwẹ obaro ọnre kugbe Filistia vwẹ obuko ọnre mi rhie unu vwo mu Izrẹl rọ. Kidie vwẹ enana ejobi na ophu rọye feuri-i yẹn obọ rọye je riẹn phia.

¹³Ihwo na rhivwi bru ọ rọ ghwiẹ aye-en eyẹ vwọ guọnọ Ọrovwohwo rẹ otuofovwi na-a.

¹⁴Etiọye Ọrovwohwo de bru uyovwi kugbe urhurhuvwun nu Izrẹl ewanvwe kugbe eyareya vwẹ ẹdẹ ọvo —

¹⁵ọkpako kugbe ohwo ro vwo oghọ ọye uyovwi, ọmraro ro yono efian ọye urhurhuvwun,

¹⁶kidie ihwo ri sun ihwo nana sun ayen ghwru, ihwo rẹ ayen sunrun ejobi e mu ayen rọ.

¹⁷Fiki rẹ ọtiọye na oma gbe vwerhe Ọrovwohwo kpahe imighene raye-en, o gbe re ehrọre rẹ ọmọphrorivwi vẹ eyauku raye-en, kidie ayen ohwo ọvuọvo vwo Ọghẹnẹ-e, ayen iruimwemwu rẹ unu rayen ọvuọvo ta ota rẹ ẹkpa. Kidie vwẹ enana ejobi na ophu rọye ji fue-e, yẹn obọ rọye je riẹn phia.

¹⁸Kidie umwemwu torhẹ kerẹ erhanre, kọ torhẹ ekpia vẹ idjigbẹ, etu na kugbe egbo etu na kugbe egbo na ki muẹ la, ki bru ikori rẹ ivwirhi kpenu.

¹⁹Fiki rẹ ophu rẹ Ọrovwohwo rẹ otuofovwi na otọ na vwọ torhẹ na ihwo na kerẹ irhe re vwo mu erhanre, o vwo ohwo ọvo rọ yan jẹ oniọvo rọye vwo-o.

²⁰Ayen vwẹ obọrhe frẹ, ẹkẹvuọvo owẹvwe ji hwe ayen, ayen ghwa vwẹ obọhwẹre frẹ ria, ẹkẹvuọvo evun vọn aye-en; ayen ohwohwo re uvwo rẹ ọrivẹ rọye.

²¹Manasse ria ọ rẹ Ifrem, Ifrem ria ọ ri Manasse, ayen de koko vwọ so Juda. Vwẹ enana ejobi na ophu rọye fueri-i yẹ obọ rọye je riẹn phia.