Read urhobo Livitikọs 11 Bible Online

Livitikọs 11 - urhobo bible

Livitikọs 11

¹Kọye Ọrovwohwo da ta kẹ Mosis vẹ Erọn nẹ,

²Ta kẹ ihwo rẹ Izrẹl, Enana obo ri vwo arhọ rẹ ovwan sa re vwẹ ohri rẹ eranvwe rẹ otọ na.

³Eranvwe keranvwe rẹ bẹre ichihrawọ ejobi rọ ria egba vwẹ ohri rẹ eranvwe na ọye ovwan re.

⁴Ẹkẹvuọvo vwẹ ohri rẹ eranvwe re bẹre ichihrawọ eye e re ria ẹgba na, ovwan ria enana-a, ovwan ria kamẹl na-a, kidie ọ ria egba yọ bẹre awọ-ọ, vwẹ ọtiọye na o rha fon kẹ ovwa-an.

⁵Kugbe afiotọ kidie ọ ria egba yọ bẹre awọ-ọ vwẹ ọtiọye na o rha fon kẹ ovwa-an.

⁶Kugbe uzo, kidie ọ ria egba yọ bẹre awọ-ọ, ọ je fon kẹ ovwa-an.

⁷Kugbe esi, kidie ọ bẹre owọ ẹkẹvuọvo ọ rha ria egba-a, ọ rha fon kẹ ovwa-an.

⁸Ovwan ria uvwo raye-en, ovwan je vwẹ obọ te oghweghwu raye-en kidie eyen ijẹfuọn kẹ ovwan.

⁹Enana kẹ eye ovwan re, e re dia evun rẹ ame ejobi na. Emu kemu ro vwo evwarevwa kugbe esẹn, re dia evun rẹ abadi eyẹ urhie ejobi ovwan re ayen.

¹⁰Ẹkẹvuọvo emu kemu rọ evun rẹ urhie eyẹ abadi ejobi ro vwo evwarevwa-a eyẹ esẹ-ẹn vwẹ usun rẹ obo ri biẹyi re dia evun rẹ ame kugbe erọvwọ ekpọkpọ re evun rẹ ame, ẹgua vwọ kẹ ovwan.

¹¹Ẹgua ayen dia vwọ kẹ ovwan, ovwan ria uvwo raye-en, orivwi rayen je vwẹ ẹgua kẹ ovwan.

¹²Emu kemu rọ evun rẹ ame na ejobi ro vwo evwarevwa-a eyẹrẹ esẹ-ẹn yẹ ẹgua vwọ kẹ ovwan.

¹³Vwẹ ohri rẹ ephran na ejobi, enana eye ẹgua kẹ ovwan, ovwan re aye-en, kidie ayen ẹgua kẹ ovwan. Ena, ugo, egodi,

¹⁴ọso, Apiapia vẹ oghẹre rọye ejobi,

¹⁵Oghẹre rẹ okpemu ejobi,

¹⁶Ogomugoro, Ọmọphrebri ọkeghọrọ, ọso vẹ oghẹre rọye,

¹⁷Okukughu, asa, ọkeghọrọ

¹⁸ọhọ ame, oko, ekala,

¹⁹ọkẹkẹrẹn, obo vẹ oghẹre rọye evwu kugbe adja.

²⁰Emeraravwe ejobi na re vwẹ awọ ẹne yan ejobi yẹ ẹgua kẹ ovwan.

²¹Ẹkẹvuọvo vwẹ ohri rẹ emeraravwe ri vwo ibekpe re je sa vwẹ awọ ẹne yan na, ovwan sa re e ri vwo irhiawọ vwẹ awọ rẹ ayen, ri se vwo pho vwẹ otọ na.

²²Vwẹ ohri rẹ ayen na, ovwan sa re abaka ejobi kugbe ekpakpadjoko vẹ oghẹre rọye, vẹ orherhe ejobi vẹ oghẹre rọye.

²³Ẹkẹvuọvo emeraravwe vẹ ibekpe ri chekọ ri vwo awọ ẹne na ejobi yẹ ẹgua vwọ kẹ ovwan.

²⁴Vwẹ oma rẹ enana kọye wo vwo gbe ẹgua; ohwo kohwo rọ vwẹ oma te orivwi rẹ emu nana ejobi yẹ o gbe ẹgua kọ dia vwi ijẹfuọn re te ovwọnvwọn.

²⁵Ohwo kohwo rọ rha ghwa orivwi rayen kọ fọnrhọ emwa rọye ọ Me rha dia vwi ijẹfuọn re te ovwọnvwọn.

²⁶Eranvwe keranvwe ejobi rọ bẹre awọ rọ rha hẹriẹ irhiawọ rọye-e eyẹ ọ rha je re egba-a, ọ fon kẹ ovwa-an; ohwo kohwo rọ vwẹ oma te ejobi kọ dia vwẹ ijẹfuọn.

²⁷Vwẹ ohri rẹ eranvwe re vwẹ awọ ẹne yan ejobi, e re vwẹ ẹkuobọ yan ejobi, yẹ ijẹfuọn kẹ ovwan; ohwo kohwo rọ vwẹ oma te orivwi rayen ejobi kọ dia vwẹ ijẹfuọn re te ovwọnvwọn,

²⁸ohwo rọ rha ghwa orivwi rayen kọ fọnrhọn emwa rọye ọ Me rha dia vwẹ ijẹfuọn re te ovwọnvwọn; eyena ẹgua vẹ ijẹfuọn kẹ ovwanvwan.

²⁹Vwẹ usun rẹ erọvwọ nana ri biẹyi ejobi vwẹ enu rẹ otọ na, enana ijẹfuọn vwọ kẹ ovwan Ọkpọbia, Oghresi, Ọnwọnrhon vẹ oghoghẹre rọye,

³⁰Ohẹrhẹruwevwi, ẹvan, oghoghori, unọrọ, kugbe eghwughwẹ.

³¹Enana ijẹfuọn kẹ ovwan vwẹ usun rẹ erọvwọ ri biẹyi na ejobi, Ohwo kohwo rọ vwẹ obọ te ayen ejobi siẹ ri de ghwu nu kọ dia vwẹ ijẹfuọn re te ovwọnvwọn.

³²Emu kemu rẹ orivwi rayen she teye ejobi kọ dia vwẹ ijẹfuọn, owene ọ dia emu ra vwẹ urhe kanre eyẹ ophiẹn eyẹ ekpo, koravwọ koravwọ ejobi re vwo ru iruo nure; ke bio phihọ ame, ọ Me dia vwẹ ijẹfuọn re te ovwọnvwọn; kẹsiẹye ọ ke fon.

³³Ọ da rha dia ochẹ o she phihọ eyẹ ẹvwẹrẹ, emu kemu rọ evun rayen ejobi kọ dia vwẹ ijẹfuọn, ovwan mi hwe kufia.

³⁴Emu ra ria da evun rọye rẹ ame se te, kọ dia vwi ijẹfuọn; ame yẹrẹ obo ra sa vwẹ orọvwọ otiọye na da ejobi je ghwa vwẹ ijẹfuọn.

³⁵Emu kemu ejobi rẹ orivwi rẹ enana she teye ejobi je ghwa vwi ijẹfuọn, ọ dia enyerhanre eyẹ egangan kẹ a guọghọ ayen ejobi, kidie e gbe fo-on, ke dia ijẹfuọn kẹ ovwanvwan.

³⁶Dede i de she phihọ ogbugbu rẹ ame eyẹ orhanre rọ vwo ame yo je fo-on ẹkẹvuọvo ohwo kohwo rọ vwẹ oma te orivwi rọye kọ dia vwẹ ijẹfuọn.

³⁷I de rhe she teye emamọ ra cha kọn jovwo ka je kọn ayen yọ fonro,

³⁸ẹkẹvuọvo e de ku ame phihọ ibi na vẹrhe ri ki rhi she phihọ kọ dia vwi ijẹfuọn kẹ ovwan.

³⁹Eranvwe keranvwe rẹ ovwan ria jovwo na de ghwu, ohwo rọ vwẹ oma te orivwi rọye kọ dia vwẹ ijẹfuọn nẹ urhiọke re te ovwọnvwọn,

⁴⁰Ohwo rọ rha re ọ ro ghwuru na kọ fọnrhọn emwa rọye ọ Me dia vwẹ ijẹfuọn re te ovwọnvwọn, ohwo de rhe mu oghweghwu rọye na kọ je fọnrhọn emwa rọye, Ọ Me rha dia vwi ijẹfuọn re te ovwọnvwọn.

⁴¹Erọvwọ ri biẹyi ri di biẹ vwẹ otọ na ejobi ẹgua vwọ kẹ ovwan; ovwan re aye-en.

⁴²Emu kemu rọ vwe evun kpono otọ ejobi, kugbe ere vwẹ abọ vẹ awọ yan ejobi eyẹ e ri vwo awọ buebu, ri di biẹ vwọ otọ na ejobi na, ovwan re aye-en, kidie ayen ejobi ẹgua kẹ ovwan.

⁴³Ovwan gbe oma rẹ ovwan ẹgua vwẹ oma rẹ emu kemu ejobi ri di biẹyi-i; ovwan ji te ovwan oma-a, ovwan de rhe gbe ẹgua.

⁴⁴Kidie Mẹvwẹ Ọrovwohwo rẹ Ọghẹnẹ wẹn, vwẹ ọtiọye na ovwan gbe phorho oma rẹ ovwan re wọ fon, kidie Me pha fuanfon. Ovwan gbe ẹgua vwi fiki rẹ emu ri biẹyi re shọrọ vwẹ otọ na-a.

⁴⁵Kidie Mẹvwẹ Ọrovwohwo rọ reyọ ovwan nẹ otọ rẹ Ijipt rhe, rọ dia Ọghẹnẹ rẹ ovwan; vwẹ ọtiọye na ovwan ke dia fuanfon kidie Me pha fuanfon.

⁴⁶Ọnana urhi na vwẹ oma rẹ eranvwe rẹ aghwa vẹ ephran re hẹ enu kugbe eranvwe keranvwe re yan vwẹ evun rẹ ame kugbe e re vwẹ abọ vẹ awọ yan ejobi vwẹ otọ rẹ akpọ na,

⁴⁷rere e vwo dje ofẹnẹ rẹ obo ri jẹfuọn vẹ e re fonro kugbe re a vwọ riẹn eranvwe ra re vẹ e re jẹriọ.