Read urhobo Livitikọs 15 Bible Online

Livitikọs 15 - urhobo bible

Livitikọs 15

¹Ọrovwohwo da ta kẹ Mosis vẹ Erọn,

²Ta kẹ ihwo ri Izrẹl nẹ, ohwo kohwo rẹ ame hwẹ nẹ oma rọye rhe ejobi, ọ ro hwẹ rhe na yẹ obo ri jẹfuọn.

³Ọnana kọye urhi rẹ ijẹfuọn rọye fiki rẹ obo ro hwẹ nẹ oma rhe na ọ da dianẹ oma na ji hwẹ eyẹ a da ehwẹ na ji dede, yọ hẹ evun ri jẹfuọn nure.

⁴Ehwa kehwa rẹ ohwo na shevwerhẹ ejobi ko je dia vwẹ ijẹfuọn, eriyin ji te asan ro tidia ejobi.

⁵Ohwo kohwo rọ vwẹ obo te ehwa rọye kọ fọnrhọn emwa rọye, ọ Me rha họ vwẹ evun rẹ ame kẹsiẹye ọ ke dia vwẹ ijẹfuọn re te ovwọnvwọn rẹ ẹdẹ yena.

⁶Ohwo diodi ọfa ro rhe tidia orọvwọ rẹ ohwo ro hwẹ na tidia jovwo Me fọnrhọn emwa rọye, ọ Me họ oma rọye kọ dia vwi ijẹfuọn re te ovwọnvwọn rẹ ẹdẹ yena.

⁷Ohwo rọ rha vwẹ obọ te ohwo ro hwe na kọ fọnrhọn emwa rọye, ọ Me rha họ oma rọye kẹsiẹye ọ ke dia vwẹ ijẹfuọn re te ovwọnvwọn rẹ ẹdẹ yena.

⁸Ohwo ro hwẹ na de rhe dje enya ku ohwo rọ fonro, ohwo yena Me ra fọnrhọn emwa rọye, ọ Me rha họ, ọ Me dia vwi jẹfuọn re te ovwọnvwọn.

⁹Ọ da dianẹ ohwo ro hwẹ na tidia asan ra da gua esi eyẹ idjighere asan yena kọ dia vwẹ ijẹfuọn.

¹⁰Ohwo rọ vwẹ obọ te emu rọ he obotọ rọye ejobi kọ dia vwi jẹfuọn re te ovwọnvwọn, ohwo rọ rha ghwa emu ọtiọye na kọ fọnrhọn emwa rọye, ọ Me rha họ oma rọye, ọ Me dia vwẹ ijẹfuọn re te ovwọnvwọn.

¹¹Ohwo kohwo rẹ ohwo ro hwẹ na vwẹ obọ te ejobi yọ je ghworiẹ obọ vwẹ ame-e kọ fọnrhọn emwa rọye, ọ Me rha họ oma rọye vwẹ ame, ọ Me dia vwi ijẹfuọn re te ovwọnvwọn.

¹²Ohwo otiọye na da vwẹ oma te ẹvwẹrẹ e mi hwe nu; ọ da dia urho a Me nabọ hworhẹ vwẹ evun rẹ ame.

¹³Ọke re de ru ohwo rẹ oma rọye hwẹri jovwo na fon nẹ ẹgua rẹ ehwẹ rọye nu, o mi kere ẹdẹ ighwrẹn kẹ oma rọye ọ Me fọnrhọn emwa rọye, ọ Me họ vwẹ evun rẹ ame rọ djẹ ọkẹre, kẹsiẹye ọ ke fon nẹ ẹgua na.

¹⁴Ẹdẹ rẹ ẹrenren de te ọ Me reyọ irurẹ ivẹ eyẹ inekuku ivẹ, ọ Me ra vwẹ oma phia kẹ Ọrovwohwo na vwẹ unurhoro rẹ utughẹ ra da vwa oma na, ọ Me vwẹ ayen kẹ orherẹn na;

¹⁵Orherẹn na Me vwẹ ayen ze, ọvo vwọ kẹ izobo rẹ umwemwu ọrivẹ vwọ kẹ izobo rẹ ẹtorhẹ, orherẹn na Me gọ ẹgua rẹ ehwẹ na nẹ ohwo na oma vwẹ obaro rẹ Ọrovwohwo na.

¹⁶Ameoma rẹ ọshare de rhe hwẹ rhe, ọshare na kọ nabọ họ vwẹ evun rẹ ame, ọ Me rha dia vwẹ ijẹfuọn re te ovwọnvwọn.

¹⁷Amwa eyẹ ewun rẹ ameoma na teri ejobi vẹ asan vwẹ oma na rẹ Ameoma na teri ka nabọ hworhẹ ayen e Me rha dia vwẹ ijẹfuọn re te ovwọnvwọn.

¹⁸Ọshare vẹ aye de shevwerhẹ, ameoma rẹ ọshare de mu hwe rhe, ayen ihwo ivẹ na Me ra họ vwẹ evun rẹ ame, ayen Me rha dia vwẹ ijẹfuọn re te ovwọnvwọn.

¹⁹Oma rẹ aye de muhọ ehwẹ rẹ ehwẹ yena da dia afe rọye rọ mrẹ jovwo, kọ dia ehoho ẹdẹ ighwrẹn fiki rẹ ijẹfuọn rọye, ohwo rọ vwẹ oma te kọ dia vwẹ ijẹfuọn re te ovwọnvwọn.

²⁰Kemu kemu rọ vwọ vwerhe vwẹ ọke rẹ afe rọye na ye emu ro jẹfuọn; kugbe emu kemu kemu ro vwo tidia kọ dia vwẹ ijẹfuọn.

²¹Ohwo kohwo ro dje obọ te ehwa rọyen ejobi ọ me ra fọnrhọn emwa rọyen, ọ me vwẹ ame họ, kẹ ọ dia vwẹ ijẹfuọn re te ovwọnvwọn,

²²Ohwo kohwo ro dje obọ te emu kemu ro chedia, kẹ ọ fọrhọn emwa rọyen, ọ me je vwẹ ame vwọ họ. Kẹ ọ dia vwẹ ijẹfuọn rhi te ovwọnvwọn.

²³Owene ọ dia ehwa eyẹ emu ro vwo tidia ejobi ohwo rọ vwẹ oma te ayen ejobi kọ dia vwẹ ijẹfuọn re te ovwọnvwọn.

²⁴Ohwo ro du aye afe na kọ dia vwẹ ijẹfuọn ẹdẹ ighwrẹn, ehwa ro shevwerhẹ ejobi je ghwa herọ vwẹ ijẹfuọn.

²⁵Ọ da dianẹ oma rẹ aye hiro hwẹ ọbara ẹdẹ buebu yọ dianẹ ọ dia afe-e, eyẹ ke afe rọye hwẹ kri vrẹn ọke rọye, ọke yena ejobi na kọ je dia vwẹ ijẹfuọn kerẹ ẹsiẹ ra mrẹ nẹ ọ dia afe, ijẹfuọn kọye ọ ọpha.

²⁶Ehwa kehwa ro shevwerhẹ ejobi, vwẹ ọke ro hwe te ejobi, kọ dia ehwa rẹ afe vwọ kẹ; emu kemu ro tidia ọ rha fo-on; kirobo rọ dia vwẹ ọke rẹ afe rọye vẹrhe.

²⁷Ohwo rọ rha vwẹ obọ te erọvwọ tieye na yọ ijẹfuọn, kọ fọnrhọn emwa rọye, ọ Me họ vwẹ evun rẹ ame, ọ ke rha dia vwẹ ijẹfuọn re te ovwọnvwọn.

²⁸Ẹkẹvuọvo ọ da họ nu, o mi kere ẹdẹ ighwrẹn kẹ oma rọye, tavwe re ọ ke fon.

²⁹Ẹdẹ rẹ ẹrenren ọ Me reyọ irurẹ ivẹ eyẹ upene rẹ inekuku eboba ivẹ ọ Me vwẹ ayen rhe orherẹn na, vwẹ asan unu rẹ utughẹ ra da vwa oma na.

³⁰Orherẹn na Me vwẹ ọvo ze izobo fiki rẹ izobo rẹ umwemwu Ọrivẹ ke izobo rẹ ẹtorhẹ, kọye orherẹn na vwọ gọ ẹgua no oma vwẹ obaro rẹ Ọrovwohwo na fiki rẹ afe rọye.

³¹Ọtiọna kọye wo vwo si ihwo rẹ Izrẹl nẹ ijẹfuọn rayen, ọ rha dia ọtiọye-e kẹ ayen che ghwu vwẹ ijẹfuọn rayen rẹ ayen de gbe ọgarivi mẹ rọ hẹ ohri rẹ ayen ẹgua.

³²Ọnana hẹ urhi vwọ kẹ ohwo ro hwẹ ọbara eyẹ ohwo rẹ ameoma rọye hwẹri, rọ da nẹrhẹ o gbe ẹgua

³³urhi na ọye ji te aye rọ dia afe, ihwo ejobi, te ọshare te aye, rẹ ame hwẹ nẹ oma rhe, je vwọ kẹ ọshare ro du aye afe.